నా చిన్నిప్రపంచం

కలకానిది... విలువైనదీ...!

2012-01-25T21:15:00.003+05:30

నాకు ఇష్టమైన మరొక ఇన్స్పిరేషన్ సాంగ్ "కలకానిది విలువైనదీ"
"వెలుగు నీడలు" సినిమాలోని ఈ పాటకు "శ్రీ శ్రీ" గారు రచించిన అద్భుతమైన సాహిత్యం
ఈ పాటను చిరస్థాయిగా మనస్సులో నిలిచేలా చేసింది.
సినిమాలో సావిత్రి భర్త జగ్గయ్య అనుకోని ప్రమాదంలో చనిపోతాడు.అప్పుడు ఆ దిగులుతో బాధపడుతున్న
సావిత్రిని ఓదారుస్తూ జీవితంలో కష్టాలు వస్తే వాటి గురించే బాధపడుతూ.. ఎంతో విలువైన జీవితాన్ని వ్యర్ధం చేసుకోకూడదని చెప్తూ, నాగేశ్వరరావు పాడే ఈ పాట అప్పడు... ఇప్పుడు ఒక ఆణిముత్యం.

ఈ పాటలో నాకు నచ్చే మహాకవి శ్రీ శ్రీ గారి inspirational words ...

"అగాధమౌ జలనిధిలోన ఆణిముత్యమున్నటులే
శోకాల మరుగున దాగి సుఖమున్నదిలే "

"ఏదీ తనంత తానై నీ దరికి రాదు
శోధించి సాధించాలి అదియే ధీరగుణం"

కల కానిది విలువైనదీ

బ్రతుకు కన్నీటి ధారలలోనే బలి చేయకు
కల కానిది విలువైనదీ
బ్రతుకు కన్నీటి ధారలలోనే బలి చేయకు

గాలి వీచి పూవుల తీగ నేల వాలిపోగా
గాలి వీచి పూవుల తీగ నేల వాలిపోగా
జాలి వీడి అటులే దాన్ని వదిలివైతువా
చేరదీసి నీరు పోసి చిగురించనీయవా

కల కానిది విలువైనదీ
బ్రతుకు కన్నీటి ధారలలోనే బలి చేయకు

అలముకున్న చీకటిలోనే అలమటించనేలా
అలముకున్న చీకటిలోనే అలమటించనేలా
కలతలకే లొంగిపోయి కలువరించనేలా
సాహసమను జ్యోతినీ చేకొని సాగిపో

కల కానిది విలువైనదీ
బ్రతుకు కన్నీటి ధారలలోనే బలి చేయకు

అగాధమౌ జలనిధిలోనా ఆణిముత్యమున్నటులే
శోకాల మరుగున దాగి సుఖమున్నదిలే
అగాధమౌ జలనిధిలోనా ఆణిముత్యమున్నటులే
శోకాల మరుగున దాగి సుఖమున్నదిలే

ఏదీ తనంత తానై నీ దరికి రాదు
శోధించి సాధించాలి అదియే ధీరగుణం
కల కానిది విలువైనదీ
బ్రతుకు కన్నీటి ధారలలోనే బలి చేయకు
బ్రతుకూ ... బలిచేయకు

సినిమా: వెలుగు నీడలు (1961)
సంగీతం : పెండ్యాల నాగేశ్వర రావు
లిరిక్స్ : శ్రీ శ్రీ
గానం : ఘంటసాల

యాదగిరిగుట్ట ట్రిప్ విశేషాలు

2012-01-25T09:14:00.005+05:30

మా చెల్లి వాళ్ళ ఫామిలీతో ఈ వీకెండ్ కి మేము వెళ్ళిన ట్రిప్ యాదగిరిగుట్ట.
ఇంతవరకు మేము చూడని ప్లేస్ ఇది.మిర్యాలగూడెం నుండి భువనగిరి వెళ్లి,
అక్కడి నుండి యాదగిరి గుట్ట వెళ్ళాము.

నల్గొండ జిల్లాలోని భువనగిరి లో ఎంటర్ అవ్వగానే కనపడే గుండ్రాయి లాంటి
నున్నటి కొండ మీద వున్న భువనగిరి కోట చాలా బాగుంది.
భువనగిరిలో ఉన్న ఈ కోట కాకతీయుల కాలంలో ప్రసిద్ధి చెందినది.
ఈ కోట పశ్చిమ చాళుక్య వంశానికి చెందిన పాలకుడైన త్రిభువన మల్ల విక్రమదిత్య (ఆరవ) చే
ఏకశిలారాతి గుట్టపై నిర్మించబడింది. అతని పేరు మీదుగా దీనికి త్రిభువనగిరి అని పేరు వచ్చింది.
ఈ పేరు క్రమంగా భువనగిరి అయ్యింది.

అద్భుతమైన ఆనాటి కట్టడం చూడటం ఒక గొప్ప అనుభూతి.. ఆధునిక కట్టడాలకి ఉపయోగించే
భారీ పరికరాలేమీ లేకుండా ఆ రోజుల్లో నిర్మించిన ఈ కట్టడాలు ఇప్పటికీ కాలం తో పోటీ పడుతూ..
నిలిచి వున్న పూర్వ వైభవానికి,రాజసానికి ప్రతీక అనిపిస్తుంది.

ఇక్కడి నుండి యాదగిరిగుట్ట లోని "కుందా సత్యనారాయణ కళాధామం,సురేంద్రపురి" వెళ్ళాము.

టీవీలో ఎప్పటి నుండో చూపిస్తున్న యాడ్ చూసి యాదగిరి గుట్ట వెళ్ళినప్పుడు ఇది కూడా తప్పకుండా చూడాలనుకున్నాము.

ప్రధాన ద్వారంలోనే ఇంద్రుడు తన ఐరావతం సమేతంగా ఆసీనుడై వచ్చిన వాళ్ళను
స్వాగతిస్తున్నట్లు వుంటుంది.లోపలి వెళ్ళగానే 60 అడుగుల పంచముఖ హనుమంతుడు ఒకవైపు,
పరమేశ్వరుడు మరొకవైపు ఒకే శిల్పంలో వున్న విగ్రహం కనపడుతుంది.

ఇక్కడి నుండి పెద్దలకు 250,పిల్లలకు 200 టికెట్ తీసుకుని గాయత్రి మాత విగ్రహం ముందు నుండి
లోపలికి వెళ్ళాలి.ఇంక అప్పుడు మొదలవుతుంది పౌరాణిక పాత్రల పరిచయం..
భారతం,రామాయణం,కాళీయ మర్దనం,శక్తి పీఠాలు,దక్షిణ,ఉత్తర భారతదేశాల్లోని అనేక పుణ్యక్షేత్రాలు,
కైలాసం,వైకుంఠం,విశ్వరూపం,యమలోకం,పాతాళ లోకం,మయసభ చివరిగా పద్మవ్యూహం
ఇలా ఏదేదో వింత లోకాల్లో తిరిగి తిరిగి బయటికి వస్తాము.లోపల ఫోటోలు తీయకూడదు
ముందు ఇవన్నీ చూస్తూ నడవటం సరదాగానే అనిపించినా ఇంతదూరం నడిచి,మెట్లెక్కి
అందరికీ నీరసం వచ్చేసింది .ఇక్కడ నడవటం కొంచెం కష్టమే అనిపించింది.

టీవీ యాడ్ లో నారదుల వారు హనుమంతుడు లడ్డూ ప్రసాదం ఇస్తారు అని చెప్తారు.
నిజంగానే చివరిలో హనుమంతుడి చేతిలోనుండి లడ్డు ప్రసాదం ఇస్తారు కానీ ఉచితంగా కాదు
20 రూపాయలు తీసుకుని.మేము కూడా తీసుకున్నాము.
ఒక ప్లాస్టిక్ బంతి లో వున్న రవ్వలడ్డు ను ప్రసాదంగా ఇచ్చారు.

శ్రీలక్ష్మీ నరసింహస్వామి దేవస్థానం - యాదగిరి గుట్ట

తర్వాత లక్ష్మీ నరసింహ స్వామి దర్శనంచేసుకున్నాము.
సాయంత్రం కొండ మీద చల్లటి గాలులతో వాతావరణం కొంచెం చలిగానే వున్నాఇబ్బంది అనిపించలేదు.
గర్భగుడి విద్యుత్ దీపాల కాంతులతో వెలిగిపోతూ,ఆలయం లోపల వున్న చిత్రపటాలు,
అలంకరణ చాలా బాగుంది.లక్ష్మీ సమేతుడై కొండపై గల గుహలో వెలసిన నరసింహ స్వామిని దర్శనం చేసుకుని,తీర్ధ,ప్రసాదాలు తీసుకుని,
వెరైటీగా అట్టపెట్టెల్లో పెట్టి అమ్ముతున్న లడ్డుప్రసాదం కొనుక్కుని,
బయటికి వచ్చాము.ఇక్కడ కోతులు గుంపులు గుంపులుగా వున్నాయి...
కానీ ఎవరినీ ఏమీ అనకుండా తిరుగుతున్నాయి.
ఇవీ మేము మొదటిసారి వెళ్ళిన మా యాదగిరిగుట్ట యాత్రా విశేషాలు..
మా చెల్లి,మరిది గారు సర్ప్రైజింగ్ గా అప్పటికప్పుడు చెప్పి మమ్మల్ని తీసుకు వెళ్ళిన ఈ ట్రిప్ ఒక మంచి జ్ఞాపకం..

బిజినెస్ మేన్ Vs సద్గురు

2012-01-22T18:24:00.005+05:30

బిజినెస్ మాన్ కి సద్గురుకి సంబంధం ఏమిటి అనుకుంటున్నారా
హైదరాబాద్ లో బిజినెస్ మాన్ సినిమా చూడటానికి వెళ్ళిన వాళ్లకి
"ISHA FOUNDATION"వాళ్ళు ఒక సి.డి ఇచ్చారు ఉచితంగా ..

ఆ సి.డి పేరు "Technologies for Wellbeing" "సద్గురు జగ్గి వాసుదేవ్"
అనే ఒక spiritual Guru ఆధ్వర్యంలోని Isha Yoga Center గురించి, యోగా ప్రాధాన్యతను గురించి
ఈ సి.డి లో చెప్పారు.సి.డి చూసిన తర్వాత నెట్ లో "Isha Foundation" గురించి సెర్చ్ చేశాను.

ఈ సద్గురు కూడా ఈ మధ్య కాలంలోని కొంతమంది యోగా గురువుల్లాగానే యోగా తో పాటు,Health,Education,Environment లాంటి కొన్ని సమాజహిత కార్య క్రమాలు కూడా నిర్వహిస్తున్నారు.

యోగా,సోషల్ సర్వీస్ ఇలాంటివన్నీ అందరూ చేసేవే అయినా ఈ సద్గురు ఆశ్రమం లో
నాకు చాలా నచ్చింది ఆశ్రమంలోని ధ్యాన లింగం,లింగభైరవి ఆలయాలు .
శివాలయం,అమ్మవారి ఆలయాలు ఒక మంచి ఆధ్యాత్మిక అనుభూతిని కలిగించేలాగా,
తప్పకుండా చూడాలి అనిపించేలా వున్నాయి.

Dhyanalinga Yogic Temple

లింగ భైరవి ఆలయం

“One who earns the Grace of Bhairavi neither has to live in
concern or fear of life or death, of poverty, or of failure.
All that a human being considers as wellbeing will be his,
if only he earns the Grace of Bhairavi.”

– Sadhguru

"ISHA FOUNDATION"
Velliangiri Foothills Semmedu (P.O)
Coimbatore.
గురించి "సద్గురు" గురించి తెలుసుకోవాలంటే ఈ లింక్ లు చూడండి.
http://sadhguru.org/
http://www.ishafoundation.org/
http://lingabhairavi.org/

శుభపర్వాల నాంది... సంక్రాంతి శుభాకాంక్షలు.

2012-01-15T11:10:00.006+05:30

సింగారమొలికించు చెలికత్తెలను కూడి
పడతులు తీర్చిదిద్దిన పసిడి ముగ్గులు
ముగ్గు మధ్యన గొబ్బెమ్మ ముద్దులొలుక
ధాన్యపు రాశులతో పొంగి పొరలెడి
వ్యవసాయదారుని వడ్లగూళ్ళు
సన్నాయినూదుచు చనుదెంచి యాచించు
గంగిరెద్దుల వాని గడుసు పాట
భక్తిభావముతోడ భజనలు సల్పెడి
హరిదాసు కీర్తనల
గంగిరెద్దుల మెడల చిరుగంటలు మ్రోగ
పాడి పంటలు, వాకిళ్ళ కళకళలతో
తీపితీపి వంటల ఘుమఘుమలతో
బంధుమిత్రుల సంతోష,సంరంభాలతో
అరుదెంచింది సంక్రాంతి లక్ష్మి

ఈ సంక్రాంతి ప్రతి ఇంటా సిరులు పండించాలని,
అందరినీ భోగ భాగ్యాలతో,ఆయురారోగ్యాలతో దీవించాలని కోరుకుంటూ
అందరికీ సంక్రాంతి శుభాకాంక్షలు.

భోగి పండుగ శుభాకాంక్షలు...

2012-01-14T08:46:00.008+05:30

గతానికి వీడ్కోలు పలుకుతూ ... జీవితంలోకి కొత్త కాంతులను ఆహ్వానిస్తూ
భోగిమంటల వెలుగులతో సంక్రాంతి లక్ష్మికి స్వాగతం పలుకుతూ
వచ్చిన 'భోగి'పర్వం భోగ భాగ్యలను అందించాలని కోరుకుంటూ
అందరికీ భోగి పండుగ శుభాకాంక్షలు.

ముద్దబంతులు ..మువ్వమోతలు
నట్టింట కాలు పెట్టు పాడిపంటలు
వెండిముగ్గులు..పైడి కాంతులు
పుట్టింట దీపమెట్టు ఆడపడుచులు
కలబోసి విరబూసే మహాదండిగా మదినిండగా
చలిపండగే సంక్రాంతి.

Video By :Raaji

బాపుబొమ్మల సంక్రాంతి శుభాకాంక్షలు ...

2012-01-13T19:13:00.003+05:30

ముంగిళ్ళలో మెరిసే ముగ్గులు,
ముగ్గుల మెలికల మధ్య ఒదిగిన గొబ్బెమ్మలు,
హరిదాసు కీర్తనలు,జంగందేవర దీవెనలు,
తియ్య తియ్యని పిండివంటలు,
బంధుమిత్రుల కోలాహలాల మధ్య
తెలుగుతనం ఉట్టిపడేలా సంక్రాంతి పండగ జరుపుకుంటున్నఅందరికీ
బాపు బొమ్మలతో బుడుగు సీగాన పెసూనాంబల
సంక్రాంతి శుభాకాంక్షలు.

మా సంక్రాంతి ముగ్గులు

2012-01-12T13:11:00.000+05:30

ఓ కాలమా నీ పనే బాగుంది సుమా...!

2012-01-11T19:12:00.001+05:30

కాలమా నీ పనే బాగుంది సుమా...!
కాలమా ఎంత అల్ప సంతోషివి నీవు?
నీ "రోజుల" చక్రానికి ఆయువు
ఇరవైనాలుగు గంటలు చాలనుకుంటావు
ధ్యానములోని తాపసిలా
ఎంత ప్రశాంతంగా ఉంటావు..!

కాలమా నీదెంత అదృష్టం..
గడచిన దాన్ని గురించి బాధపడక,
జరగబోయే దానికి చింతించక,
ఎవరి కోసం వేచి చూడక,
నిర్లిప్తంగా ముందుకు సాగుతూ...
ఈ క్షణం మాత్రమే నిజం అంటావు,
ఏ బంధాలకి బందీ కానంటావు.

వెనుకకి తిరిగి చూడటం తెలియని
నిన్ను చూస్తుంటే నాకు అసూయగా ఉంది.
ఒకరి చింత నీకు లేదు
ఎవరి నుంచి భయము లేదు.
ఎవరికీ ఏమి దాచవు
ఎవరి నుండి ఏమీ ఆశించవు.
ఓ కాలమా నీ పనే బాగుంది సుమా!

విలేజ్ లో వినాయకుడు

2012-01-08T18:30:00.004+05:30

ఈ రోజు జీ తెలుగు లో విలేజ్ లో వినాయకుడు సినిమా చూశాక ఆ సినిమా గురించి
నా బ్లాగ్ లో రాద్దామనిపించింది..
నాకు ఇష్టమైన సినిమాల్లో ఇది కూడా ఒకటి.

చక్కని పల్లెటూరి వాతావరణంలో తీసిన ఈ సినిమాలో హీరో (కార్తీక్) కృష్ణుడు కిండర్ గార్డెన్ టీచర్.
హీరోయిన్ కావ్య ( శరణ్యా మోహన్) మెడికో ఇద్దరు మంచి స్నేహితులు, ప్రేమికులు.
వాళ్ళ ప్రేమ విషయం తండ్రికి చెప్పి పెళ్ళికి ఒప్పించటానికి ఇంటికి వచ్చిన కావ్య తన పిన్ని,బాబాయిలు అందరికీ
ఈ విషయం చెప్పి వాళ్ళ పెళ్ళికి తండ్రిని ఒప్పించమని అడిగేలోపే కార్తీక్ కావ్య వాళ్ళ ఇంటికి వచ్చేస్తాడు.

లావుగా వున్న కార్తీక్ ని చూసిన అందరూ ఈ పెళ్లి మాకిష్టం లేదని చెప్పేస్తారు.
ఇంక కావ్య తండ్రికి కావ్యకి కాబోయే భర్త మీద ఎన్నో ఆశలు కోరికలు వుంటాయి
అల్లుడు పెద్ద హోదాలో వుండాలని డిసిప్లిన్ వుండాలని,అందగాడై వుండాలని ఇలా ఎన్నో..
అంతగా అల్లుడిని ఊహించుకున్న అతనికి కార్తీక్ ని చూడగానే ఎక్కడలేని కోపం వచ్చేస్తుంది.
అతన్ని ఎలాగైనా వెళ్ళగొట్టాలని తన స్నేహితుడైన యండమూరి వీరేంద్రనాథ్ కి చెప్తాడు.
అందులో భాగం గా యండమూరి ఎన్నో ప్రయత్నాలు చేస్తుంటాడు..
ఇటు కార్తీక్ ఆ కుటుంబం లో ఒకడిగా కలిసిపోవాలని వాళ్ళ ప్రేమాభిమానాలను పొందటం కోసం,
ప్రయత్నిస్తుంటాడు.
అందులో భాగంగానే ఇంట్లో కొన్ని విషయాల్లో జోక్యం చేసుకున్న కార్తీక్ ని ఇంటినుంచి వెళ్ళగొడతాడు కావ్య తండ్రి.
చివరికి కార్తీక్ మంచితనాన్ని అర్ధం చేసుకున్న కావ్య వాళ్ళ నాన్న పెళ్లి జరిపించటంతో ఈ కధ సుఖాంతమవుతుంది.

ఇంక ఈసినిమాలో మనసులో ఏదున్నా చెప్పేసే..అమాయకమైన,ఎదుటి వాళ్ళ బాధను అర్ధం చేసుకునే
వ్యక్తిగా,చిన్నపిల్లాడి మనస్తత్వం తో కార్తీక్ నటన చాలా బాగుంటుంది.
యండమూరి కావ్య తండ్రికి ఆస్తి లేదు అప్పుల్లో వున్నారని చెప్పినప్పుడు తెగ ఫీల్ అయ్యి ,
ఇంటికి వచ్చి వాళ్ళ కష్టాల్లో పాలుపంచుకోవాలని ప్రయత్నించే కార్తీక్ కారెక్టర్ చాలా బాగుంటుంది.

నాకు ఇలాంటి కారెక్టర్స్ చూసినప్పుడు అనిపిస్తుంది వాస్తవంగా ఇలాంటి వాళ్ళు ఉంటారా అని..

ఇంక ఈ సినిమాలో కావ్య తండ్రి లాంటి తల్లిదండ్రులకి ఈ లోకంలో కొదువ లేదు ...
అల్లుడి ఆస్తిపాస్తులు,వుద్యోగం,హోదాలకి ఇచ్చినంత ప్రాముఖ్యత అతని మనస్తత్వానికి ఇవ్వరు.
వాళ్ళు కష్టపడ్డా వాళ్ళమ్మాయి సుఖంగా వుండాలని ఎంత కట్నాలైనా ఇచ్చి పెళ్లి చేస్తారు..
ఎంత గొప్ప స్థాయిలో వున్నా,ఆస్తిపాస్తులున్నా మంచి మనసు,ప్రేమ ,
ఎదుటి వాళ్ళ హృదయానికి తగినట్లు స్పందించే గుణంలేని వాళ్ళతో కూతురు పడే కష్టాన్ని
చూసిన తల్లిదండ్రులు తర్వాత ఎంత బాధపడినా వాళ్ళు చేసిన తప్పు సరిదిద్దుకోలేరు.

అమ్మాయిలూ,తల్లిదండ్రులు తెలుసుకోవాల్సింది ఒకటే అబ్బాయిల అందంలో,ఆస్తిపాస్తుల్లో,
హోదాలో మాత్రమే సుఖసంతోషాలు లేవు..

జీవితం అంటే ప్రేమించటం ... ప్రేమించబడటం.

"Love means each person is free
to follow his or her own heart."

చినుకై వరదై సెలయేటి తరగై...
ఉరికే మదిని కడలల్లె కరిగించి కలిపేసుకున్నావు..

హిందీ ఓల్డ్ ఈజ్ గోల్డ్ సాంగ్స్ ..

2012-01-07T16:32:00.008+05:30

నిన్న "నా జీవనగమనం" లో నాని గారి బ్లాగ్ లో ఓల్డ్ హిందీ సాంగ్స్ పోస్ట్ చేశారు.
అవి చూశాక నా దగ్గర వున్న హిందీ సాంగ్స్ కలెక్షన్ లో నాకు చాలా నచ్చిన
కొన్ని పాటలు పోస్ట్ చేయాలనిపించింది.
నాకు చాలా చాలా ఇష్టమైన ఎప్పుడూ నా మొబైల్ లో నేను వినే

హిందీ ఓల్డ్ ఈజ్ గోల్డ్ సాంగ్స్.

ప్రేమ ప్రేమ ఇంతేగా ప్రేమ...!

2012-01-07T10:02:00.006+05:30

ఎవ్వరినెప్పుడు తనవలలో బంధిస్తుందో ఈ ప్రేమ

ఏ మదినెప్పుడు మబ్బులలో ఎగరేస్తుందో ఈ ప్రేమ
అర్ధంకాని పుస్తకమే అయినా కాని ఈ ప్రేమ
జీవితపరమార్ధం తానే అనిపిస్తుంది ఈ ప్రేమ

ప్రేమ ప్రేమ ఇంతేగా ప్రేమ

ఇంతకుముందర ఎందరితో ఆటాడిందో ఈ ప్రేమ
ప్రతి ఇద్దరితో మీగాధే మొదలంటుంది ఈ ప్రేమ
కలవని జంటల మంటలలో కనిపిస్తుంది ఈ ప్రేమ
కలిసిన వెంటనే ఏమవునో చెప్పదు పాపం ఈ ప్రేమ

ప్రేమ ప్రేమ ఇంతేగా ప్రేమ

కలల కౌగిలి - The Value Of Time

2012-01-06T14:07:00.000+05:30

దోసిళ్లలో ఇసుక రేణువుల్లా జారిపోతున్నావే
ఎంతగా పిడికిలి బిగించినా
ఎంతగా బంధిద్దామని ప్రయత్నించినా
అంత త్వరత్వరగా పారిపోతున్నావే!

కలలకౌగిలి కరిగిపోక ముందే
మదిలో తలపులు తరలిపోకముందే
ఆలోచనలు అంతమవ్వకముందే
వెడలిపోతున్నావు…నీకెందుకంత తొందర?

జీవితం ఆస్వాదిద్దామన్నా
ప్రేయసి(ప్రియుడు) ప్రేమలో తరిద్దామన్నా
స్వప్నాల లోకంలో విహరిద్దామన్నా
దేనికీ సహకరించవే?

నిమ్మళంగా పనులు చక్కపెడదామన్నా
ప్రశాంతంగా కాసేపు కూర్చుందామన్నా
బద్దకంగా మరికాసేపు ఒద్దిగిల్లుదామన్నా
తీరికగా కబుర్లు చెప్పుకుందామన్నా
దేనికీ కాసేపు ఆగవే?

గాయం చేసేది నువ్వే ... మానిపేదీ నువ్వే
గుర్తు తెచ్చేదే నువ్వే ... మరిపించేదీ నువ్వే
బాధ పెట్టేదీ నువ్వే ... సంతోషాన్నీ మోసుకొచ్చేదీ నువ్వే
ఇంత శక్తి నీకెవరిచ్చారు?

ఎదురుచుపులో నత్తనడక నీదే
హడావుడిలో గుర్రపు స్వారీ నీదే
మాతోనే ఉన్నట్లు భ్రమ కలిగిస్తావు
సహకరించినట్లే వుంటావు
అందీ అందనట్లు పరుగులు తీస్తావు

నీ పరుగులో...మా అడుగులు జతపరచకపోతే
మిగిలేది శూన్యమే!

From: FaceBook TeluguQuotes

జయజనార్ధనా కృష్ణా రాధికాపతే...

2012-01-05T11:08:00.004+05:30

జయజనార్ధనా కృష్ణా రాధికాపతే

జనవిమోచనా కృష్ణా జన్మమోచనా
గరుడవాహనా కృష్ణా గోపికాపతే
నయనమోహనా కృష్ణా నీరజేక్షణా
జయజనార్ధనా కృష్ణ రాధికాపతే
జనవిమోచనా కృష్ణ జన్మమోచనా

సుజనబాంధవా కృష్ణా సుందరాకృతే
మదనకోమలా కృష్ణా మాధవాహరే
వసుమతీపతే కృష్ణా వాసవానుజా
వరగుణాకరా కృష్ణా వైష్ణవాకృతే
సురుచిరాననా కృష్ణా శౌర్యవారిదే
మురహరావిభో కృష్ణా ముక్తిదాయక
విమలపాలకా కృష్ణా వల్లభిపతే
కమలలోచనా కృష్ణా కామ్యదాయకా

జయజనార్ధనా కృష్ణ రాధికాపతే
జనవిమోచనా కృష్ణ జన్మమోచనా

విమలగాత్రనే కృష్ణా భక్తవత్సలా
చరణపల్లవం కృష్ణా కరుణకోమలం
కువలయేక్షనా కృష్ణా కోమలాకృతే
తవపదాంబుజం కృష్ణా శరణమాశ్రయే
భువననాయకా కృష్ణా పావనాకృతే
గుణగణోజ్వలా కృష్ణా నళినలోచనా
ప్రణయవారిధే కృష్ణా గుణగణాకరా
దామసోదరా కృష్ణా దీనవత్సలా

జయజనార్ధనా కృష్ణ రాధికాపతే
జనవిమోచనా కృష్ణ జన్మమోచనా

కామసుందరా కృష్ణా పాహిసర్వదా
నరకనాశనా కృష్ణా నరసహయకా
దేవకీసుతా కృష్ణా కారున్యాంబుదే
కంసనాశనా కృష్ణా ద్వారక స్థితా
పావనాత్మకా కృష్ణా దేహిమంగళం
త్వత్పదాంబుజం కృష్ణా శ్యామకోమలం
భక్తవత్సలా కృష్ణా కామ్యదాయకా
పాలిసెన్ననూ కృష్ణా శ్రీహరీనమో

జయజనార్ధనా కృష్ణ రాధికాపతే
జనవిమోచనా కృష్ణ జన్మమోచనా

భక్తదాసనా కృష్ణా హరసునీ సదా
కాదునింతెనా కృష్ణా సలహయావిభో
గరుడవాహనా కృష్ణా గోపికాపతే
నయనమోహనా కృష్ణా నీరజేక్షణా
జయజనార్ధనా కృష్ణా రాధికాపతే
జనవిమోచనా కృష్ణా జన్మమోచనా
గరుడవాహనా కృష్ణా గోపికాపతే
నయనమోహనా కృష్ణా నీరజేక్షణా

జయజనార్ధనా కృష్ణా రాధికాపతే
జనవిమోచనా కృష్ణ జన్మమోచనా

అందరికీ వైకుంఠ ఏకాదశి పర్వదిన శుభాకాంక్షలు.

కొంటె బాపు గీతలు - ముళ్ళపూడి రాతలు

2012-01-04T10:10:00.002+05:30

మొన్న ఆదివారం ఈ టీవీలో "పరిపూర్ణ మహిళ" చూశాను అందులో ఒక ఆవిడని మీరు,మీ వారు
10 రోజులుగా ఏవో గొడవలవల్ల మాట్లాడుకోవటం లేదు.అప్పుడు మీ వారు మిమ్మల్ని బుజ్జగించి,
నచ్చచెప్పే ప్రయత్నం చేస్తే అది ఎలా చేస్తారో మీ వారిలాగా మీరు యాక్ట్ చేసి చూపించండి
అని అడిగారు జడ్జెస్.కానీ ఆవిడకి సరిగా చేయటం రాలేదు..

నాకనిపించింది ఈవిడ పెళ్లి పుస్తకం సినిమా చూస్తే ఖచ్చితంగా విన్ అయ్యేది.
పాపం సినిమా చూడలేదో , లేకపోతె ఆ సీన్ గుర్తుకు రాలేదో అని.
పెళ్లి పుస్తకం సినిమాలో రాజేంద్రప్రసాద్ బాస్ కూతురుతో చనువుగా ఉంటున్నాడని దివ్యవాణి అలిగితే,
ఆ అలకని రాజేంద్రప్రసాద్ ఎంత చక్కగా తీర్చాడో చూడండి.

కొంటె బాపు గీతలున్న,ముళ్ళపూడి రాతలున్న "పెళ్లి పుస్తకాన్ని" చదివి అప్పచెప్పుదాం
అన్నరేంజ్ లో గుర్తుంచుకుని పాటించాల్సిన మంచి విషయాలు ఎన్నో వున్నాయి ఈ సినిమాలో
నాకు ఎప్పటికీ నచ్చే సినిమాల్లో పెళ్లి పుస్తకం ఒకటి. ఇందులో ఈ సీన్,ఈ పాట రెండు చాలా బాగుంటాయి .

సరికొత్త చీర ఊహించినాను

Welcome 2012

2012-01-01T00:24:00.004+05:30

ఈ నూతన సంవత్సరంలో అందరూ
ప్రతి క్షణాన్ని ఆస్వాదిస్తూ .. ఆనందిస్తూ
సుఖ సంతోషాలతో .. ఆయురారోగ్యాలతో
చెరగని చిరునవ్వుతో..ధైర్యం తో
జీవన పయనం సాగించాలని కోరుకుంటూ ...
నా కుటుంబ సభ్యులకు,బంధువులకు,
నా బ్లాగ్ మిత్రులకు
హృదయపూర్వక నూతన సంవత్సర శుభాకాంక్షలు.

నా చిన్నిప్రపంచం 2011 - Sweet Memories !

2011-12-31T19:22:00.021+05:30

జీవితం సప్తసాగర గీతం ... వెలుగు నీడల వేదం

సాగనీ పయనం ... కలా ఇలా కౌగిలించే చోటా..

నా చిన్నిప్రపంచంలో 2011 ఎంతో సంతోషంగా ,సందడిగా గడిచింది.
అప్పుడప్పుడు కొన్ని సమస్యలు మనుషుల జీవితాల్లో సహజం కాబట్టి..వాటిని పట్టించుకోకుండా
చిన్న చిన్న సమస్యలకు భయపడకుండా నా కుటుంబ సభ్యులందరం ఒకరికొకరం అన్నట్లు
నా చిన్నిప్రపంచం ఈ సంవత్సరం ఎన్నో మధురానుభూతులను సొంతం చేసుకుంది.

ఇంక నా విషయంలో పెద్దగా సమస్యలేవీ లేకుండా యధాతధ స్థితి కొనసాగినా
నేను సెలెక్ట్ అవుతాననుకున్న 'జూనియర్ సివిల్ జడ్జ్ ఎక్జాం' క్వాలిఫై అవ్వలేకపోవటం
ఒక చిన్ని అపజయం.
అలాగే నా చిన్నిప్రపంచం ఎందరో మంచి బ్లాగ్ మిత్రులను పరిచయం చేసింది.

" 2011 "ఇంకొన్ని గంటల్లో వీడ్కోలు తీసుకోబోతున్న సమయంలో
నా చిన్నిప్రపంచానికి " 2011 "అందించిన కొన్ని మధురానుభూతులు..

రాబోయే నూతన సంవత్సరం 2012 కూడా నా చిన్ని ప్రపంచంలో, ఈ ప్రపంచానికంతటికీ
ఆనందాన్ని,మంచి విజయాలను,మధురానుభూతులను అందించి,
శుభకరంగా సంతోషంగా వుండాలని కోరుకుంటూ ,
నా చిన్నిప్రపంచం తరపున అందరికీ నూతన సంవత్సర శుభాకాంక్షలు.

2012 కి చామంతిపూల స్వాగతం..

2011-12-31T13:10:00.005+05:30

మా ఇంటి తోటలో పూచిన చామంతిపూలు
సంతోషంగా..నూతన సంవత్సరానికి
స్వాగతం చెప్తున్నాయి.

వస్తున్నా నేస్తం అందిస్తాలే నవ జీవితం

A.P. STATE BAR COUNCIL Elections..

2011-12-30T11:57:00.009+05:30

అభ్యర్ధుల ప్రచారాస్త్రాలు..

ఈ రోజు స్టేట్ బార్ కౌన్సిల్ Elections జరుగుతున్నాయి. ఐదేళ్లకొక సారి జరిగే ఎన్నికల్లో

ఈసారి 134 మంది అభ్యర్ధులు పోటీలో వున్నారు.వీరిలో నుండి 25 మంది సభ్యులను ఎన్నుకోవాల్సి వుంటుంది.
రాష్ట్రవ్యాప్తంగా 68,000 పైగా న్యాయవాదులు ఓటు హక్కు వినియోగించుకుంటున్నారు .
గుంటూరు జిల్లానుండి 12 మంది న్యాయవాదులు పోటీలో వున్నారు.
గుంటూరు జిల్లాలో 3,677 మంది న్యాయవాదులకు ఓటుహక్కు వుంది.
అందులో నా ఓటు కూడా ఒకటి

All The Best Participants..

నా కవిత...!

2011-12-30T11:50:00.004+05:30

ఓ చేతిలో కలంతో కాగితంపై గీస్తూ
మరోచేతి గోళ్ళను మునిపంటితో కొరికేస్తూ
కలువల్లాంటి కళ్ళకి శూన్యాన్ని చూపిస్తూ
మెదడుకు మేతను తినిపిస్తూ...

హృదయాన్ని తికమక పెట్టేస్తూ
మీ పెదవులపై నవ్వుని విరబూయిస్తూ
మంచి కవితనొకటి రాయాలని యోచిస్తూ
నడిరేయంతా మేల్కొన్నాను ఆలోచిస్తూ...

నాలుగక్షరాలని అటువిటు రాస్తూ
మురిసిపోయాను పైన, క్రింద చదివేస్తూ
నా పిచ్చిరాతలనుండి మిమ్మల్ని రక్షిస్తూ
సమయం మేల్కొల్పింది నన్ను వెక్కిరిస్తూ...

Facebook Telugu Quotes community

ఏకులమైనా ...ఏ మతమైనా భరతమాతకొకటే లేరా !

2011-12-27T19:59:00.012+05:30

ఈ రోజు "raafsun" గారి బ్లాగ్ లో
"వీళ్ళు ముస్లిములు కారు.....వీళ్ళ మతం ఇస్లాం కాదు...."
అన్న పోస్ట్ చూసిన తర్వాత ,కొంత మంది అలా వున్నా మనమందరం భారతీయులం,
భారతీయులంతా ఒక్కటే అనుకునే వాళ్ళు కూడా వుంటారు అని నేను నమ్ముతాను. అందుకే ఈ పోస్ట్..

దేశం మనదే ...తేజం మనదే

దేశం మనదే ...తేజం మనదే
దేశంమనదే ...తేజంమనదే
ఎగురుతున్నజండామనదే
నీతి మనదే ... జాతిమనదే
ప్రజల అండదండా మనదే

అందాల బంధం వుంది ఈనేలలో
ఆత్మీయరాగం వుంది ఈగాలిలో .
ఏకులమైన ... ఏమతమైనా
ఏకులమైన ... ఏమతమైనా భరతమాత కొకటేలేరా ...

ఎన్నిబేధాలున్నా ... మాకెన్నితేడాలున్నా
దేశమంటే ఏకమవుతాం అంతా ఈవేళా
వందేమాతరం అందాం అందరం
వందేమాతరం అందాం అందరం

దేశంమనదే ...తేజంమనదే
ఎగురుతున్నజండామనదే
నీతిమనదే ...జాతిమనదే
ప్రజల అండదండా మనదే
అందాల బంధం వుంది ఈనేలలో
ఆత్మీయరాగం వుంది ఈగాలిలో ..

ఏకులమైనా ...ఏమతమైనా
భరతమాత కొకటేలేరా
రాజులు ఐనా పేదలుఐనా
భరతమాత సుతులేలేరా...

ఎన్నిదేశాలున్నా... మాకెన్నిదోషాలున్నా
దేశమంటే ప్ర్రాణమిస్తాం అంతాఈవేళా
వందేమాతరం అందాంఅందరం

శతవసంతాల మన "జనగణమన"...!

2011-12-27T12:06:00.010+05:30

జాతీయ గీతం జనగణమనకు ఈ రోజుతో వందేళ్ళు పూర్తి అయ్యాయి.
విశ్వకవి రవీంద్రనాథ్ ఠాగూర్ రాసిన 'జనగణమన' మొట్టమొదటి సారిగా 1911 లో డిసెంబర్ 27 న
కలకత్తాలో జరిగిన భారత జాతీయ కాంగ్రెస్ సమావేశంలో ఆలపించారు.
స్వాతంత్ర్యం వచ్చిన తర్వాత 1950,జనవరి 24 న ఈ గీతానికి జాతీయగీతం హోదాదక్కింది.
'జనగణమన' భారతీయ స్ఫూర్తిని,భారతీయుల భిన్నత్వంలో ఏకత్వాన్ని చాటే అపురూప గేయం.
భరతమాత కీర్తి ప్రతిష్టతలను చాటుతూ...భారత దేశ భౌగోళిక స్వరూపాన్నిదాని అంతస్సారంతో వర్ణించే అక్షర చిత్రమిది.

'ప్రజలందరి మనస్సుకు అధినేతవు,భారత భాగ్య విధాతవు అయిన నీకు జయమగుగాక,
పంజాబ్,సింధు,గుజరాత్,మహారాష్ట్ర,ద్రావిడ,ఉత్కళ,వంగ దేశాలతోనూ,
వింధ్య,హిమాలయ పర్వతాలతోనూ,యమునా,గంగ ప్రవాహాలతో ఉవ్వెత్తున లేచే సముద్ర తరంగాలతోను
శోభించే ఓ భాగ్య విధాత,వాటికి నీ శుభనామం ఉద్భోధనిస్తుంది.
అవి నీ ఆశీస్సులు ఆకాంక్షిస్తాయి.నీ జయ గాధల్ని గానం చేస్తాయి.
సకల జనులకు మంగళ కారకమైన,భారత భాగ్య విధాతవు అయిన నీకు
జయమగు గాక! జయమగు గాక! జయమగు గాక!'

మొత్తం 31 చరణాలతో రవీంద్రుడు జనగణమన రాయగా అందులో ఏడు చరణాలను మనం జాతీయ గీతంగా ఆలపిస్తున్నాం.జాతీయ గీతం రచించిన భాష సంస్కృత మిళిత బెంగాలీ అయినా,
భారతీయులంతా దీన్ని తమమాతృ గీతం గా అనుభూతి చెంది పాడుకునేలా మన జాతీయ గీతం రూపు దిద్దుకుంది.

Janaganamana
(full song of National Anthem of India)

ఉదయాన్నే స్కూల్ అసెంబ్లీ లో ..సాయంత్రం స్కూల్స్ వదిలే టైం లో
విద్యార్ధుల గొంతులో స్వరమై చేరి,భారతీయుడి జీవితంపై చెరగని ముద్ర వేసిన ఈ శుభ గానం
వందేళ్ళైనా,ఇంక ఎన్నేళ్ళైనా... ప్రతి క్షణం భారత దేశ సమున్నతిని చాటుతూనే వుంటుంది.

నీ అనుమతి లేకుండా నిన్నెవరూ బాధపెట్టలేరు...

2011-12-24T13:00:00.000+05:30

"నీ అనుమతి లేకుండా నిన్నెవరూ బాధపెట్టలేరు" అంటారు మహాత్మా గాంధీ..
ఎదుటి వ్యక్తి ఎవరైనా మనల్ని ఏదైనా అన్నప్పుడు అదే పనిగా మనం బాధపడుతున్నామంటే
మన మీద మనకు విశ్వాసం లేనట్లే..

సమాజం తమను గుర్తించాల్సినంతగా గుర్తించటం లేదన్న అసంతృప్తి చాలా మందిలో వుంటుంది.
సమాజం మనల్ని గుర్తించటానికి మనం మరింత ఎదగాలేమో,మనదైన రంగంలో
ఇంకా పరిపూర్ణత సాధించాలేమో అని ఎందుకు అనుకోకూడదు?
ఇతరుల్ని చూసి అసూయ పడుతున్నామంటే,మనలో లేని గొప్ప లక్షణాలేవో వాళ్ళలో ఉన్నట్లే కదా!
అవేమిటో తెలుసుకుంటే విజయం మనకు సొంతమైనట్లే.

ఒకసారి బుద్ధుడు తన ప్రియ శిష్యుడైన ఆనందుడిని వెంట పెట్టుకుని భిక్షాటనకి వెళ్ళాడు.
ఓ ఇంటి ముందు నిలబడి భిక్షాం దేహి అని అర్ధించాడు.ఆ ఇంటి ఇల్లాలు కోపంగా ఉన్నట్లుంది.
'అడుక్కు తినటానికి సిగ్గుగా లేదూ కష్టపడి పని చేసుకోవచ్చుగా'అని తిట్టిపోసింది.
బుద్ధుడు మౌనంగా ముందుకెళ్ళాడు.గురువుగార్ని అంతమాట అన్నందుకు,ఆనందుడు చాలా బాధపడ్డాడు.
ఇద్దరూ ఆరామానికి బయలుదేరారు.తన చేతిలోని భిక్ష పాత్రను శిష్యుడి చేతికి ఇచ్చాడు బుద్ధుడు.
కొంత దూరం వెళ్ళాక 'ఈ పాత్ర ఎవరిది' అనడిగాడు 'మీదే గురువు గారూ' అని చెప్పాడు ఆనందుడు.
'నీకే ఇచ్చేస్తున్నా తీసుకో' అని చెప్పాడు.
బుద్ధుడు ఇంకాస్త దూరం వెళ్ళాక 'ఆ పాత్ర ఎవరిది?' అని మరోసారి అడిగాడు .
నాదే గురువు గారూ అన్నాడు ఆనందుడు.
బుద్ధుడు చిరునవ్వు నవ్వి 'చూశావా? ఇదే ప్రశ్న మొదటి సారి అడిగినప్పుడు నాదన్నావు.
రెండోసారి అడిగితే నీదన్నావు.ఏదైనా సరే ఇది నాది అని ఆమోదించాకే నీదవుతుంది.
ఆ ఇల్లాలి తిట్టు కూడా అంతే!మనం వాటిని స్వీకరించకపోతే బాధ పడాల్సిన అవసరమే వుండదు'
అని వివరంగా చెప్పాడు బుద్ధుడు.
నిత్య జీవితంలో మనకు ఎదురయ్యే సంఘటనల్లో మనం దేనికి స్పందించాలి,దేనిని మనకు సంబంధం లేనిదిగా వదిలెయ్యాలి అన్న విషయాల్లో స్పష్టత వుంటే మన మానసిక ప్రశాంతతను మన నుండి ఎవరూ దూరం చేయలేరు..
ఎవరి మాటల, చేతల ప్రభావం మన జీవితాన్ని నిర్దేశించలేదు.

AP Police Academy Passing Out Parade

2011-12-23T10:47:00.009+05:30

మా మరిదిగారు భద్ర S.I Of Police గా APPA లో ట్రైనింగ్ పూర్తి చేసుకుని
Passing Out Parade జరిగి నిన్నటికి 1 సంవత్సరం పూర్తి అయింది.
ఎంతో శ్రమించి తన కలలను నిజం చేసుకుని తనకు ఇష్టమైన Police Department లో
S.I Of Police గా విధులు నిర్వహిస్తున్నమా మరిది గారికి శుభాభినందనలతో ...
తన వృత్తిలో ఇంకా ఉన్నత శిఖరాలను అధిరోహించి,భవిష్యత్తులో ఎన్నో విజయాలను సాధించాలని కోరుకుంటూ..

All The Very Best "Bhadra"

నా చిన్నిప్రపంచం..

మిలే సుర్ మేరా తుమ్హారా....

2011-12-22T11:13:00.012+05:30

ఎన్నో భాషలు,ఎన్నో మతాలూ,మరెన్నో సంస్కృతులు.
వీటి సమ్మేళనం మన భారతీయం.ఆ భారతీయతను రెండు వాక్యాల్లో పాడుకోగలిగితే అది..
మిలే సుర్ మేరా తుమ్హారా..తో సుర్ బనే హమారా..

గతంలోకి వెళితే..లోక్ సేవ సంచార్ పరిషత్ వారు ఓ వీడియో రూపొందించమని "ఒగిల్వి మీడియాని" కోరారు.
ఆ వీడియో భారతీయత ఉట్టిపడేలా ఉండాలనేది అప్పటి ప్రభుత్వం ఆలోచన.
అంతే కాదు నిడివి 5 నిమిషాలే వుండాలి..14 భాషలు వినిపించాలి..
దేశంలోని భిన్నత్వమంతా ఏకత్వంగా కనిపించాలి -ఇదీ కాన్సెప్ట్.

అనుకున్నట్లే వీడియోను రూపొందించింది ఒగ్విలి మీడియా.ఆ పాటే మిలే సుర్ మేరా తుమ్హారా.
సురేష్ మాలిక్ ఈ పాట సృష్టికర్త .. ఈ పాటను "పీయూష్ పాండే" రాశారు.. దీనికి సంగీతం లూయిస్ బ్యాంక్స్ ..
1988,ఆగస్ట్ 15 న ప్రధానమంత్రి ప్రసంగం అనంతరం దూరదర్శన్ లో ఈ పాట తొలిసారి ప్రసారమైంది.

నేను భారతీయుడినని ప్రతి భారతీయుడు గర్వంగా చెప్పుకునేలా, జాతీయతా భావాన్ని కలిగించేలా
ఎన్నో అందమైన లోకేషన్స్ లో, ఎందరో ప్రముఖులతో పాటు, కోట్లమంది భారతీయులు సమసృతిలో
పాడిన ఈ పాట మరో జాతీయ గీతం అనదగ్గ స్థాయిలో మన గుండెల్లో నిలిచిపోయింది..

ఈ పాట వినగానే వెంటనే నా మనసు చిన్నప్పుడు DD రోజులకి వెళ్ళిపోతుంది.
ఎప్పటికీ మనసులో చెరగని ముద్ర వేసిన ఈ పాట నా చాలా ఇష్టమైన పాట.

मिले सुर मेरा तुम्हारा -1988

(Video On National Integration)

మ్యూజిక్:లూయిస్ బాంక్స్

లిరిక్స్:పీయూష్ పాండే
డైరెక్టర్:సురేష్ మాలిక్
సింగర్:భీంసేన్ జోషి
ప్రొడ్యూసర్ :లోక్ సేవా సంచార్ పరిషత్.

నా స్వరము నీ స్వరము సంగమమై
మన స్వరంగా అవతరించే..

శ్రీమతికి శ్రీవారి ప్రేమలేఖ....!

2011-12-21T12:54:00.008+05:30

చిత్రకారుల కుంచెకు చిక్కని అందమో..
కవుల ఊహకు అందని భావమో..
తేనే ఊటవో...మల్లెల తోటవో..
వెన్నెల వాగులో వొంటరి నక్షత్రానివో..

కొలంబస్ కళ్ళు చూడని సౌందర్య ద్వీపమా
ఖండాలు దాటిన కోహినూర్ వజ్రమా..
నీ నవ్వులో నైలునది వొంపులు తిరుగుతుంది
కళ్ళతీరాలు దాటి చూడలేని నన్ను
కలల సునామీలో ఉక్కిరిబిక్కిరి చేస్తున్నావు

కళ్ళు చేసుకున్న పుణ్యమో..
కలలు రాసుకున్న కావ్యమో..
అందం నీ దగ్గర పాఠాలు వల్లెవేస్తుంది
చూపు నీ దగ్గర కొత్త సోయగాల్ని అద్దుకుంటుంది

అందాల తాజ్ మహల్ ముందు మహరాణిలా కూర్చుని..
నువ్వు చిరునవ్వులు చిందిస్తున్నప్పుడు
ఎవరందంగా వున్నారంటే ఏమి చెప్పగలను..?
బహుశా షాజహాన్ కూడా కొంచెం సందేహిస్తాడేమో..

నాలో చెలరేగే భావాల్ని వ్యక్తీకరించడానికి నా భాష చాలటం లేదు..
నిన్ను వర్ణించడానికి శ్రీనాధుడు,కీట్స్ కలిసి రావాలేమో..
మళ్ళీ డావెన్సీ కుంచె పట్టాల్సిందే.. తప్పదు..
మైకెలేంజిలో మూడ్ తెచ్చుకోవాల్సిందే..

వేకువ వనాలలో వాసంత సమీరమా..
ప్రకృతిని చూసి నీ మనసు రాగమైనప్పుడు..
చినుకులతో కలిసి నీ పాదాలు తాళం వేసినప్పుడు..
అమాయకత్వంలో అతిశయం లో చిలిపితనపు అల్లరి వేళల్లో
నీ రూపాన్ని నా కళ్ళలో నిలిపిన క్షణాల్ని నేనెలా మరచిపోగలను?

నా హృదయపు మైదానాల్లో
నేను నిశ్శబ్ధంగా తోటమాలిలా పని చేసుకుంటున్నప్పుడు
దారిలో రోజూ పలకరించే ఎర్రగులాబీ నువ్వు..
నాలోని అలసిన బాటసారికి ఆఖరి మజిలీ నీ నవ్వు..

తలపుల తుఫాన్ లో తడిసిపోయి..
కాసింత వెచ్చదనం కోసం నీ ఊహల వాకిలిలో నిలుచున్నా..
నీ ఊహల వెచ్చటి దుప్పటి కప్పుకున్నా..

Your's sweetheart

ఎంకి - నాయుడుబావ By:Raaji

2011-12-20T12:42:00.006+05:30

నండూరి సుబ్బారావు గారు రాసిన ఎంకి పాటలు ప్రణయానికి సంబంధించిన పాటలు.
తొలి వలపులు, దాంపత్య జీవితానురాగాలు కలిసిన ఊసులు, బాసలు,
వేదనలు, విరహాలు ఈ పాటల్లో చక్కగా వర్ణించారు..
ఎంకి పల్లె పడుచు. కపటం ఎరుగనిది. జానపద సౌందర్యానికి ప్రతీక.
ఎంకి,నాయుడు బావలు జానపదజంట..
అందమైన అమ్మాయిని పోల్చటానికి నండూరి వారి ఎంకి అనటం అందరికీ తెలిసిందే..

బాపుబొమ్మల్లో ఎంకి నాయుడు బావ బొమ్మను చూసిన నాకు వీళ్ళిద్దరి గురించి
సుభాష్ చంద్రబోస్ సినిమాలో "జాజిరి జాజిరి మావా" అనే పాటను
రాజస్థానీ జానపద జంట చిత్రాలతో కలిపి పాట చేయాలనిపించింది..

నేను చేసిన ఎంకి నాయుడు బావ పాట...నా మరో వీడియో ప్రయోగం..

జాజిరి జాజిరి జాజిరి జాజిరి మావా

ఎన్ని జనమలకైనా నువ్వే నా నాజత మావా!
జాజిరి జాజిరి జాజిరి జాజిరి మావా
ఎనకటి జనమలో ఎంకిని నేనే నాయుడు మావా!

By:Raaji

ఖాళీగా వున్నారా?

2011-12-19T12:35:00.011+05:30

మనుషులు ఎప్పుడూ తమదే పైచేయి కావాలని కోరుకుంటారు.
భార్య మీద భర్త,భర్త మీద భార్య, పిల్లల మీద తండ్రి,విద్యార్ధుల మీద ఉపాధ్యాయుడు,
ఉద్యోగుల మీద ఆఫీసర్ ...ప్రతి ఒక్కరిలో ఈ స్వభావం వుంటుంది.
ఈ ఆధిపత్య ధోరణి అధికారానికి గుర్తు.
సాధారణంగా అణకువగా ఉండటాన్ని,ఎదుటివారికి లొంగి పోవడంగా,పిరికితనంగా జమకడతారు.

"అహింస బలవంతుడి ఆయుధం"అన్నారు గాంధీజీ.
ఎదుటివాడిని కొట్టగలిగీ కొట్టకుండా వదిలిపెట్టటం బలవంతుడికే సాధ్యం కదా!
కాశీకి వెళ్ళిన ఒకతను తనకు బాగా ఇష్టమైన స్వీట్ వదిలిపెట్టి వస్తాడు..
తిరుపతి వెళ్ళిన ఒక మహిళ తను ప్రాణంగా చూసుకునే తలనీలాలను అర్పించుకుని వస్తుంది.
కానీ నాకు అత్యంత ఇష్టం ఏమిటి? నేనే,ఆ నేనును ఆ గర్వాన్ని,ఆ అధికారాన్ని అర్పించుకోవాలి..

నీలోని నిన్నే నువ్వు అర్పించుకుంటే నువ్వు ఖాళీ అవుతావు.
మనం దేవుడి ముందు మోకరిల్లుతాం.మన అహాన్ని తీసి పక్కన పెట్టేస్తాం.
అప్పుడు మనలోకి మనకు తెలియకుండానే ఏదో శక్తి ప్రవహించినట్లు అనిపిస్తుంది.
ఎందుకని?? మనం ఖాళీగా వున్నాం కనుక,దాన్ని భగవంతుడు తన శక్తితో పూరించాడు కనుక..

శూన్యంలోకి గాలి త్వరగా ప్రవేశిస్తుంది.శూన్యం దేన్నయినా త్వరగా ఆకర్షిస్తుంది.
మనం కొత్తగా ఉండాలంటే,మనని కొత్తగా నింపుకోవాలంటే
మనలోని అహంకారాన్ని,అన్నీ మనకు తెలుసనే అజ్ఞానాన్ని వదులుకోవాలి.
మనలో శూన్యం ఏర్పరచుకోవాలి ,కాకపోతే ఆ శూన్యాన్ని ప్రేమతో నింపుకోవాలి.

ఎవరు చెప్పిందైనా వినగలగాలి అందులో నిజా నిజాలు గ్రహించగలగాలి.
ఒకరి అభిప్రాయాలను ఇంకొకరు గౌరవించగలగాలి.
నేను ఒక విషయం చెప్పాను కాబట్టి ఇదే నిజం,ఇదే జరిగి తీరాలి అనుకుంటే వాదనలు,
వివాదాలు తప్ప ఇంకేమీ ఫలితం వుండదు.

నిత్య జీవితంలో మనకు ఎందరో తారసపడుతుంటారు.ఎవరో ఏదో అన్నంత మాత్రాన బాధపడుతూ కూర్చోవాలా?
తలచుకుని తలచుకుని కుంగి పోవాలా?
అది నిజంగానే అర్ధంలేని వాగుడైతే పట్టించుకోవాల్సిన అవసరం లేదు..
సద్విమర్శ అయితే సవినయంగా స్వీకరించగలగాలి,మనలోని లోపాల్ని గుర్తించి సరిదిద్దుకోవాలి..

వేలెత్తి చూపే ప్రతి వ్యక్తీ గురువే అనుకుంటే,
వేధించిన ప్రతి అనుభవము పాఠమే అనుకుంటే...
కోపాల్లేవు, తాపాల్లేవు,కన్నీళ్లు లేవు,అసూయా ద్వేషాలు లేవు.
ఇంక నెగటివ్ భావాలకు చోటెక్కడిది?
అరుదుగా కొన్ని ఏర్పడినా క్షణాల్లో బుర్ర ఖాళీ చేసి వెళ్ళిపోతాయి..

“Our minds should not be empty

because if they are not preoccupied by good,

evil will break in upon them.”

కన్నెపిల్ల కోరుకునే తలంబ్రాలు..

2011-12-18T11:10:00.006+05:30

శ్రీరాముడిలా అగ్నిప్రవేశం చేయిస్తాడో?
హరిశ్చంద్రుడిలా అంగడిబొమ్మను చేస్తాడో?
ధర్మరాజులా జూదంలో పణంగా పెడతాడో?
నలుడిలా నట్టడవిలో వదిలిపెడతాడో?
తెలియకపోయినా భర్త అనే మగవాడిని నమ్మి అతనితో జీవితాన్ని పంచుకుంటుంది స్త్రీ ..

అరచేతిలో స్వర్గం చూపించే మోసగాళ్ళు ఎప్పుడూ వుంటారు..
వాళ్ళ చేతిలో మరే యువతీ మరోమారు మోసపోకూడదని
ఓ సబల చేసిన ప్రయత్నమే ఈ తలంబ్రాలు

పల్లెటూరి నుంచి నగరం వచ్చి దిక్కు తోచని స్థితిలో వున్న రాధికను(జీవిత) మాయ మాటలతో
లొంగదీసుకుంటాడు మధు(రాజశేఖర్)..ఆమెను మోసం చేసి ,వారంరోజుల్లో మన పెళ్లి అని నమ్మబలికి,
పెళ్లి నాలుగు రోజులు ఉందనగా..ఆఫీస్ పని మీద క్యాంపుకు వెళ్ళాల్సి వచ్చిందని చెప్పి వెళ్ళిపోతాడు..

పెళ్లి తేదీ రానే వస్తుంది..ఏ క్షణాన అయినా మధు రావచ్చని,పెళ్లి కూతురుగా అలంకరించుకుని
సిద్ధంగా వుంటుంది రాధిక.ఇంతలో తలుపు చప్పుడు కాగానే ఆత్రంగా తలుపు తీసిన రాధికకు
ఇంటి యజమాని కనపడి ఇల్లు ఖాళీ చేయమంటాడు..
రాధిక ఏం చెప్పినా వినకుండా నిర్దాక్షిణ్యంగా ఇంటి నుంచి వెళ్ళగొడతాడు..

దిక్కుతోచక మధును వెతుక్కుంటూ చివరకు మధు వుండే చోటుకు చేరుకుంటుంది రాధిక.
మధు ఇంట్లో లేడని తెలుసుకుని..దాహంతో ఇంటి బయట వున్న పంపు దగ్గర నీళ్ళు తాగబోతుంది.
ఇంతలో ఓ చెయ్యి పంపును కట్టేస్తుంది.
తలెత్తి చూడగానే ఎదురుగా మధుని చూసిన రాధిక ప్రాణం లేచివస్తుంది..
"ఎందుకొచ్చావ్.." అంటాడు మధు ఊహించని ఆ మాట రాధికకు బాణంలా గుచ్చుకుంటుంది.
"మీ కోసమేనండీ..మీరు తప్ప నాకేవరున్నారు" అంటుంది ప్రాధేయపడుతూ ..
తప్పమ్మా... అలాంటి ఆశలేమైనా వుంటే ఒదిలేసుకో.జీవితమంతా నేను ప్రేమిస్తూనే వుంటాను కానీ ...
పెళ్లి మాత్రం చేసుకోను.ఐ హేట్ మారేజ్ అంటాడు స్టైల్ గా సిగరెట్ తాగుతూ..

అప్పటికి అర్ధం అవుతుంది రాధికకు తను మోసపోయానని..
రాధికకు తను నిలుచున్న భూమి కుంగిపోతున్న ఫీలింగ్..
"ఓ మాట చెప్పనా... నీ శరీరాన్ని కొట్టుగా మార్చుకో..ఏం పర్లేదు.అప్పుడే బాగా బతుకుతావ్..
అందం ఉన్నప్పుడే నాలుగు డబ్బులు వెనకేసుకోవాలమ్మా..దీన్నే దీపం ఉండగానే ఇల్లు చక్కబెట్టుకోవటం
అంటారు..అప్పుడప్పుడు వచ్చిపోతూ వుంటాను మనది తొలి పరిచయం కదా తొంభై ఏళ్ళు బతికుండాలి
అని నానా మాటలుఅంటాడు మధు..
ఏమీ చేయలేని నిస్సహాయతతో మధు వంక అసహ్యంగా చూస్తుంది రాధిక..

ఇంతలో ఆ ఇంటి మేడ పైనుండి ఏవండీ..అనే పిలుపు వినిపిస్తుంది పైన పాతికేళ్ళ యువతి
ఇంకా అక్కడే ఉన్నారెంటండీ..దాంతో మాటలేంటి..?మీరు రండి.." అంటుంది మధుని ఉద్దేశించి,
"ఎవరో పిచ్చిది పిచ్చాసుపత్రి ఎక్కడ అంటే...అడ్రెస్ చెబుతున్నా"అంటాడు మధు తడబడుతూ..
"వెళుతుంది లెండి మీరు రండి.క్యాంపు కెళ్లాలన్నారు కదా... పెళ్లి సరిగా నాలుగు రోజులుందనగా
మీ బాస్ క్యాంపుకు పంపిస్తున్నారు..ఏమన్నా అంటే వుద్యోగం మానేస్తానంటున్నారు..
మీరెళ్ళి రండి మీరొచ్చేసరికి పట్టుచీర కట్టుకుని రెడీగా వుంటాను"అంటుందా అమ్మాయి అమాయకంగా..

ఆ అమ్మాయి పరిస్థితి చూడగానే అయ్యో అంటూ విరగబడి నవ్వుతుంది రాధిక..
ఆవేదన,ఆక్రోశం,అసహాయత కలగలిసిన ఆ నవ్వును ఎప్పటికీ మరిచిపోలేము..
పిచ్చిదని రాధికను పోలీసులకు పట్టిస్తాడు మధు..
అసహాయస్థితిలో వున్న రాధికను ఒకప్పుడు మధు పక్క ఇంట్లో వుండే ప్రసాద్ (కళ్యాణ్ చక్రవర్తి)
కాపాడి సింగర్ గా కొత్త జీవితాన్ని ప్రారంభించేలా సహాయపడతాడు ..

కొన్నాళ్ళ తర్వాత మళ్ళీ రాధిక జీవితంలోకి వస్తాడు మధు..తన మాయమాటలతో మళ్ళీ రాధిక జీవితాన్ని
నాశనం చేయాలన్న దురుద్దేశంతో వచ్చిన మధు మోసాన్ని తెలుసుకోలేని రాధిక
జరిగినవన్నీ మర్చిపోయి... మధుని పెళ్లి చేసుకోవాలనుకుంటుంది..
ఐతే పెళ్లి సమయంలో మధు నిజస్వరూపాన్ని తెలుసుకున్న రాధిక తనలాగా మరో ఆడపిల్ల జీవితం
నాశనం కాకూడదని మధుని తన చేతులతో తానే అంతం చేయడంతో కధ ముగుస్తుంది..

ఈ సినిమాలో ముక్కుమొహం తెలియని వ్యక్తిని నమ్మటం రాధిక తప్పు అలా నమ్మింది
కాబట్టే మోసపోయింది అనుకుంటే..
ఇప్పటికీ కూడా తల్లిదండ్రులు,పెద్దలు అందరు ఉండి చేసిన పెళ్ళిళ్ళలో ఎందరు మోసపోవటం లేదు?
కొన్ని సంవత్సరాలపాటు ప్రేమించి పెళ్లి చేసుకున్న వాళ్ళు ఎందరు మోసపోవటం లేదు?
సమస్య తెలిసిన వ్యక్తిని నమ్మటమా?తెలియని వ్యక్తిని నమ్మటమా అని కాదు
నమ్మకద్రోహానికి గురవటానికి తెలిసిన,తెలియని అన్న బేధం లేదు..
జీవితంలో మోసపోయినా,నమ్మకద్రోహానికి గురి అయినా ఆత్మవిశ్వాసంతో జీవించిన రాధిక కధ ఎప్పటికీ ఆదర్శం..

అలాగే మధు లాంటి మగవాళ్ళు వున్న ఈ సమాజంలోనే ప్రసాద్ లాంటి మానవత్వం వున్న
మనుషులు కూడా వుంటారు.యాంటీ హీరోగా రాజశేఖర్,తన నటనతో రాధిక పాత్రలో జీవించిన జీవిత
హీరోయిన్లుగా "కోడిరామకృష్ణ" గారు తీసిన తలంబ్రాలు సినిమా అన్ని తరాలు చూడదగిన చిత్రం..

ఈ సినిమాలో పాటలు బాగుంటాయి మల్లెమాల గారు రాసిన "నిన్న నువ్వు నాకెంతో దూరం"
పాట నాకు చాలా నచ్చే పాట..

నిన్న నువ్వు నాకెంతో దూరం
నీవే నాకు ఈనాడు ప్రాణం

ఇదిపాట కానే కాదూ...
ఏరాగం నాకు రాదు

ఓ దానవుడైన మానవుడా
హృదయంలేని కిరాతకుడా

ధనుర్మాసం మొదలయ్యింది...!

2011-12-16T14:25:00.004+05:30

ధనుర్మాసం వచ్చేసింది..

కొత్త సంవత్సరం ఆగమనాన్ని గుర్తు చేస్తూ.. ఇప్పటి నుండి మొదలు పెట్టి సంక్రాంతి పండుగ వరకు
ఇంటి వాకిళ్ళను కళ కళ లాడేలా తీర్చిదిద్దే రంగవల్లులతో
హరిలోరంగా హరి అంటూ భగవన్నామస్మరణ చేస్తూ వచ్చిన హరిదాసుతో ,
ధనుర్మాసం లో విష్ణు మూర్తికి పూజ చేసే "తిరుప్పావై పాశురాలతో" మన ఇళ్ళల్లోనే కాదు ..
మన బ్లాగ్ లలో కూడా ఆధ్యాత్మిక వాతావరణం నెలకొంది..

నేను కూడా ఈ సంవత్సరం నా "భక్తిప్రపంచం" బ్లాగ్ లో "తిరుప్పావై పాశురాలు" పోస్ట్ చేస్తున్నాను..

ఈ ధనుర్మాసం అంతా మీరు కూడా మంచి మంచి ముగ్గులు వేయాలని,
చక్కగా ధనుర్మాసం పూజలు చేసుకోవాలని కోరుకుంటూ..

బాపూగారికి.. బాపూబొమ్మలు చెప్పే పుట్టినరోజు శుభాకాంక్షలు..

2011-12-15T22:56:00.013+05:30

కొంటె బొమ్మల బాపు

కొన్ని తరముల సేపు
గుండె ఊయలలూపు

ఓ కూనలమ్మా..

అనిపించేలా ,సొగసు చూడతరమా... అనేలా బాపూగారు సృష్టించిన
కొందరు ముద్దులొలికే బాపు బొమ్మలు బాపుగారికి
పుట్టినరోజు శుభాకాంక్షలు తెలియచేస్తున్నారు..

బాపూగారికి పుట్టిన రోజు శుభాకాంక్షలతో ...

లైఫ్ థ్రిల్ డోంట్ మిస్ మారియా ....!

2011-12-15T11:10:00.000+05:30

ఏమో ఏమవునో ఎవరికి తెలుసంట

సినిమా:ఇట్లు శ్రావణి సుబ్రహ్మణ్యం
మ్యూజిక్:చక్రి
సింగర్:చక్రి

రవి వర్మకే అందనీ ఒకే ఒక అందానివో...

2011-12-12T11:15:00.006+05:30

రాజా రవివర్మ ఈనాటి భారతదేశములోని కేరళలో తిరువనంతపురానికి 25 మైళ్ళ దూరంలోని
కిలమానూరు రాజప్రాసాదములో ఉమాంబ తాంబురాట్టి, నీలకంఠన్ భట్టాద్రిపాద్ దంపతులకు
ఏప్రిల్ 29, 1848న జన్మించారు.
రాజా రవివర్మ భారతీయ చిత్రకారుడు. అతను రామాయణ, మహాభారతములలోని ఘట్టాలను
చిత్రాలుగా మలచి మంచి గుర్తింపు పొందాడు.
భారతీయ సాంప్రదాయిక, పాశ్చాత్య చిత్రకళా మెళకువల సంగమానికి
అతని చిత్రాలు చక్కని మచ్చుతునకలు.
చీరకట్టుకున్న స్త్రీలను అందంగా, చక్కని వంపు సొంపులతో
చిత్రించడంలో అతనికి అతనే సాటి.
1873 లో జరిగిన వియన్నా కళా ప్రదర్శనలో మొదటి బహుమతిని గెలుచుకున్నప్పుడు
ఆయన గురించి ప్రపంచానికి తెలిసింది.
భారతీయ చిత్రకళా చరిత్రలో గొప్ప చిత్రకారునిగా గుర్తింపు పొందిన రాజా రవి వర్మ,
1906లో, 58 సంవత్సరాల వయసులో మధుమేహంతో మరణించాడు.
ఈయన మరణించేనాటికి కిలామానూరు ప్యాలెస్‌లో 160 దాకా రవివర్మ చిత్రాలు ఉండేవని ప్రతీతి.
ఆ తరువాత వాటిని అధికారికముగా తిరువనంతపురములోని చిత్రా ఆర్ట్ గ్యాలరీకి అందజేశారు.(Wikipedia)

ఎంతో అందంగా వుండి,హుందాగా వుండే రాజా రవివర్మ చిత్రాలు నాకు చాలా నచ్చుతాయి..
వీటిలో శకుంతల అందమైన,అమాయకమైన మొహాన్ని రవివర్మ జీవం ఉట్టిపడేలా చిత్రీకరించారు..
ఇంకా పళ్ళు చేతిలో పట్టుకున్న మహిళ,దమయంతీ హంస సంవాదము,యశోదకృష్ణ చిత్రాలు
చాలా బాగుంటాయి.
రవివర్మ చిత్రాలతో చేసిన "రవి వర్మకే అందనీ" పాటని యూ ట్యూబ్ లో ఇంతకుముందు చూశాను
కానీ 2 రోజుల క్రితం "ఎందుకో? ఏమో !" గారి బ్లాగ్ లో ఈ పాట చూసినప్పుడు నాకు కూడా
ఈ పాటని రవివర్మ చిత్రాలతో చేయాలనిపించింది.

నాకు నచ్చిన రవివర్మ చిత్రాలతో వీడియో మిక్సింగ్ చేసిన పాట:

రవి వర్మకే అందనీ ఒకే ఒక అందానివో

By:Raaji..

రవి వర్మకే అందనీ ఒకే ఒక అందానివో
రవి వర్మకే అందనీ ఒకే ఒక అందానివో
రవి చూడని పాడనీ నవ్య రాగానివో
రవి వర్మకే అందనీ ఒకే ఒక అందానివో

ఏ రాగమో తీగదాటి ఒంటిగా నిలిచే
ఏ యోగమో నన్ను దాటి జంటగా పిలిచే
ఏ మూగ భావాలో అనురాగ యోగాలై
ఆ ఆ ఆ ఆ ఆ ఆ ఆ ఆ....
నీ పాటనే ... పాడనీ
రవివర్మకే అందనీ ఒకే ఒక అందానివో

ఏ గగనమో కురుల జారి నీలిమై పోయే
ఏ ఉదయమో నుదుట చేరి కుంకుమై పోయే
ఆ కావ్య కల్పనలే నీ దివ్య శిల్పాలై
ఆ ఆ ఆ ఆ ఆ ఆ...
కదలాడనీ ...పాడనీ

రవి వర్మకే అందని ఒకే ఒక అందానివో ఆ ఆ ఆ
రవి చూడని పాడని నవ్య రాగానివో
రవి వర్మకే అందని ఒకే ఒక అందానివో

****************
సినిమా:రావణుడే రాముడైతే
మ్యూజిక్:G.K.వెంకటేష్
లిరిక్స్:వేటూరి సుందరరామ్మూర్తి
సింగర్స్:S.P.బాలు,S.జానకి
****************

చలికాలం .......!!!!

2011-12-10T11:40:00.001+05:30

రాత్రి ఎంత త్వరగా పడుకున్నా పొద్దున్నే లేవాలనిపించటం లేదు
దుప్పటి గట్టిగా బిగించి కళ్ళు తెరవాలనిపించటం లేదు..
పొద్దున్నే స్నానం చేయాలంటే భయంగా వుంటుంది...
చక్కగా జుట్టుకి నూనె పెట్టి జడ వేసుకుందామని చూస్తే కొబ్బరి నూనె డబ్బాలో
నూనె బదులు గడ్డ కట్టిన నెయ్యి కనిపిస్తుంది ..
సాయంత్రం బయటకి ఎక్కడికన్నా వెళ్ళాలంటే 6 గంటలకే చీకట్లు ..
తెల్లవారుఝామున మొక్కలపై అందంగా కనపడుతున్న మంచు బిందువులు..
మరి చలికాలం వస్తే ఇలాగే వుంటుంది కదా..

డిసెంబర్ ,జనవరి నాకు ఇష్టమైన నెలలు
డిసెంబర్ లో నేను పుట్టాను.. నేను చదువుకుంది సిస్టర్స్ స్కూల్ లో కావటంతో
డిసెంబర్ లో మాకు ఎక్కువ క్రిస్మస్ సెలవులు ఉండేవి..
అలాగే డిసెంబర్ వెళ్తూ జనవరి వస్తూ తీసుకువచ్చే కొత్త సంవత్సరం అంటేనే
అందరికీ ఉత్సాహమే కదా అలాగే నాకు కూడా..
ఇంకా ఈ చలికాలానికి మాత్రమే ప్రత్యేకమైన నాకు ఇష్టమైన కొన్ని విశేషాలు..

ఉదయాన్నే చలికి వేడి వేడి కాఫీ

అమ్మ చేసే సున్నిపిండితో పాటు వాడే వింటర్ కేర్ ప్రొడక్ట్స్

స్వెటర్స్,షాల్స్ వేసుకుని విచిత్ర వేషధారణలు

చలికి వణుకుతూనే చేసే ధనుర్మాసం పూజలు

ఎదుటివాళ్ళ మీద పోటీపడుతూ చలిని కూడా లెక్కచేయకుండా
ఇంటి ముందు వేసే ముగ్గులు

ఇంకా ఈ సీజన్ కి మాత్రమే ప్రత్యేకమైన,

షాపింగ్,పార్టీల సందడిని తెచ్చే క్రిస్మస్..

కొత్త సంవత్సరానికి కోటి కలలతో,
తీర్మానాలతో ఆనందకరమైన ఆహ్వానం..

ఇన్ని ప్రత్యేకతలున్న ఈ చలికాలం అందాలను ఆస్వాదిస్తూ,చలికి తగిన జాగ్రత్తలు తీసుకుంటూ
హాయిగా ఎంజాయ్ చేద్దాం..

జీవితం ఓ ప్రయాణం తోడుగా సాగనీ... By :రాజి

2011-12-09T12:09:00.011+05:30

కృష్ణంరాజు,జయప్రద జంటగా నటించిన "సుమంగళి" సినిమాలో "జీవితం ఓ ప్రయాణం తోడుగా సాగనీ"
పాట చాలా బాగుంటుంది.నాకు ఇష్టమైన పాట..
ప్రతి మనిషి జీవితంలో ఎన్నెన్నో బంధాలు,అనుబంధాలు కానీ అన్నిటికంటే పవిత్రమైనది ,
ప్రాముఖ్యత కలిగింది వివాహబంధం..
ఐతే ఈ పెళ్లి కొందరికి ఒక మంచి అర్ధవంతమైన జీవితాన్ని అందిస్తే కొందరికి
ఒక చేదు జ్ఞాపకంగా మాత్రమే మిగిలిపోతుంది..

ఈ సినిమాలో కృష్ణంరాజు,జయప్రద ఇద్దరు మంచి జంట
ఇద్దరు ఒకరంటే ఒకరికి ఎంతో ప్రేమ,అనురాగం వున్నా విధి వాళ్ళు విడిపోక
తప్పని పరిస్థితుల్ని కల్పిస్తుంది..
అలా వాళ్ళు విడిపోక ముందు జీవితమనే ఈ ప్రయాణంలో ఒకికొకరు తోడుగా సాగిపోవాలని
కోరుకుంటూ సంతోషంగా పాడుకునే ఈ పాట ఇప్పటికీ ఎప్పటికీ ఒక మధురగీతం..

"ఈ పాటని నాకు నచ్చిన పిక్చర్స్ తో వీడియోమిక్సింగ్ చేశాను .."

జీవితం ఓ ప్రయాణం తోడుగా సాగనీ
By:Raaji

జీవితం ఓ ప్రయాణం తోడుగా సాగనీ

గుండెలో ప్రేమగీతం నిండుగా మ్రోగనీ
దారిలో మమతలే పూవులై కురియనీ
ఇలానే...ఇలానే...
జీవితం ఓ ప్రయాణం తోడుగా సాగనీ
గుండెలో ప్రేమగీతం నిండుగా మ్రోగనీ

జలతారు మేఘం పరదాలు దాటి
నీలాల నింగీ నే చేరుకోనా
ఆ తారలన్నీ తళుకాడు వేళ
ఎన్నెన్నో కళలు కదలాడవా
ఆ కాంతినై ఇలా... ఇలా నేనుండిపోనా

జీవితం ఓ ప్రయాణం తోడుగా సాగనీ
గుండెలో ప్రేమగీతం నిండుగా మ్రోగనీ

దరిచేరు వేళ చిరు సిగ్గులో
మనసైనవాని కనుచూపులో
సరికొత్త అందం చిగురించితే
ఓ గర్వరేఖ కనుగీటితే
ఆ రేఖనై ఇలా... ఇలా నేనోదిగిపోనా

జీవితం ఓ ప్రయాణం తోడుగా సాగనీ
గుండెలో ప్రేమగీతం నిండుగా మ్రోగనీ

Thankyou ఫ్రెండ్స్ & ఫ్యామిలీ ...

2011-12-04T10:24:00.018+05:30

ఈ రోజు... మంచిరోజు మరపురానిది ...మధురమైనది
అన్నట్లుగా జరిగింది నా పుట్టినరోజు..
ఉదయాన్నే కుటుంబ సభ్యులందరి శుభాభినందనలతో మొదలైన నా పుట్టినరోజు
రోజంతా బంధువులు,స్నేహితుల శుభాకాంక్షలతో, నా ప్రియమైన వాళ్ళందరి మధ్య
BirthDay సెలెబ్రేట్ చేసుకోవటం చాలా సంతోషాన్ని కలిగించింది.
ముఖ్యంగా నా పుట్టినరోజుకి ప్రత్యేక అతిధులు మా చెల్లి,మరిది గారు లీవ్ లేకపోయినా
వీలు కల్పించుకుని వచ్చి నా పుట్టినరోజుని ఒక మరిచిపోలేని రోజుగా గుర్తుండిపోయేలా చేశారు..

జీవితంలో ఏమి సాధించినా, సాధించకపోయినా,సంపాదించినా,సంపాదించకపోయినా
"నిన్ను నిన్నుగా ప్రేమించుటకు,నీ కోసమే కన్నీరు నింపుటకు... నేనున్నానని నిండుగా పలికే
తోడొకరుండిన అదే భాగ్యము అదే స్వర్గము" అన్న మాట ఎంతో నిజం కదా..
అలా నా జీవితంలో ప్రతి సుఖంలో,కష్టంలో,గెలుపు, ఓటముల్లో తోడుండే
నా చిన్నిప్రపంచం లో అతి ముఖ్య భాగమైన నా కుటుంబ సభ్యులందరికీ నా హృదయపూర్వక కృతఙ్ఞతలు..

With Love : Sister & Brother In Law

ఇంక ఈ సంవత్సరం నా పుట్టినరోజుని మరింత అద్భుతమైనదిగా మార్చింది
నా చిన్నిప్రపంచం,నా చిన్ని ప్రపంచంలో నా "బ్లాగ్ స్నేహితులు"...

నాకు సంబంధించిన,నాకు సంతోషాన్ని కలిగించే విషయాలన్నిటినీ గత కొంతకాలంగా

నా చిన్నిప్రపంచం బ్లాగ్ లో ,నాకిష్టమైన పాటలు సరిగమలు...గలగలలు బ్లాగ్ లో పోస్ట్ చేస్తూ వున్నాను..
అప్పుడప్పుడు కొంతమంది బాగుందని కామెంట్స్ ఇచ్చేవారు.

నా బ్లాగ్ మొదలు పెట్టినప్పటి నుండి నాకు ఎక్కువ కామెంట్ ఇచ్చి,నన్ను ప్రోత్సహించే వాళ్ళు
''మనస్వి- జయ'' గారు, ''సాహితి - మాలా కుమార్'' గారు ... ఇద్దరు దాదాపు నేను పెట్టే ప్రతి టపాలో
వాళ్ళ అభిప్రాయాన్ని తెలియచేసే వారు..
తర్వాత ''వనజ వనమాలి'' గారు ఎక్కువగా నా చిన్నిప్రపంచానికి వచ్చేవారు,
నాభావాలను మెచ్చుకునే వారు..
ఇప్పుడు ''కడలి - సుభా గారు'' , ''నవరసజ్ఞ భరితం - రసజ్ఞ'' గారు,
"శర్కరి - జ్యోతిర్మయి"గారు, ''ఎందుకో?ఏమో!'' గారు నాచిన్ని ప్రపంచంలో కొత్త అతిధులు..
నా ప్రతి టపాలో వాళ్ళ అభిప్రాయాలను నాతో పంచుకునే స్నేహితులు..

నా పుట్టిన రోజుకి కూడా నేను బ్లాగ్ లో పోస్ట్ పెట్టాను..కానీ నేను ఊహించనంత అభిమానం
నా బ్లాగ్ మిత్రుల నుండి లభించింది. నాకు ఇంతకుముందు ఎప్పుడూ కామెంట్ ఇవ్వని వాళ్ళు కూడా
నాకు BirthDay శుభాకాంక్షలు చెప్పి నాకు ఎంతో సంతోషాన్ని కలిగించారు..
పుట్టినరోజు శుభాకాంక్షలు చెప్పటమే కాదు నాబ్లాగ్ గురించి వాళ్ళ అభిప్రాయాలను కూడా తెలియచేశారు..
నా ఈ బ్లాగ్ మిత్రుల అభిమానం,శుభాభినందనలు
నా పుట్టిన రోజుని మరువలేని రోజుగా గుర్తుండిపోయేలా చేశాయి..

నా బ్లాగ్ ఫ్రెండ్స్ లో పెద్దల దీవెనలతో,స్నేహితుల శుభాకాంక్షలతో,అభినందనలతో...
నా ఫ్రెండ్ 'సుభా' గారి 'సుభా'కాంక్షలతో పాటు అందించిన దీవెనల చిరుకానుక తో నా పుట్టినరోజు మరపురానిది..మధురమైనది గా నిలిచిపోయింది..

నా పుట్టినరోజుకి మీ దీవెనలు,శుభాభినందనలతో నన్ను దీవించి,Wishes చెప్పిన
నా బ్లాగ్ మిత్రులందరికీ నా హృదయపూర్వక కృతజ్ఞతాభివందనములు

నా పుట్టినరోజు ...

2011-12-02T11:33:00.014+05:30

ఈ రోజు నా పుట్టిన రోజు..
నా చిన్నిప్రపంచంలో అందరు ఇష్టపడి, ప్రేమించే రాజి పుట్టినరోజు..
మనం ప్రేమించే వాళ్ళకంటే మనల్ని ప్రేమించే వాళ్ళు వున్న వాళ్ళు అదృష్టవంతులట
ఆ విషయంలో నేను చాలా అదృష్టవంతురాలిననే చెప్పొచ్చు..
అందరి దీవెనలు,అభినందనలతో ఈ రోజు మొదలయ్యింది..

Happy BirthDay ... Raaji.

Many Many Happy Returns Of The Day

"I thank God for allowing me to
experience the many joys of life,
by giving me the opportunity to
love and be loved by other people."

నాకు నా బ్లాగ్ ఫ్రెండ్ 'సుభా' గారు ఇచ్చిన పుట్టినరోజు కానుక
Thankyou My Dear Friend

నాకు నచ్చిన సినిమా - ఆనందం

2011-12-01T10:23:00.015+05:30

మనసుతోటి మనసునే ముడేసే మంత్రమే ప్రేమ
కళ్ళలోన కాంతులేవో నింపే క్షేత్రమా
కొత్త కొత్త ఊసులేవో నేర్పే భాష ఈ ప్రేమ
తియ్యనైన పాటలేవో పాడే రాగమీ ప్రేమ...
కరిగిపోని కలలతోటి గుండెను నింపెనీ ప్రేమ
లేనిపోని ఆశలేవో రేపే మైకమా
ప్రేమే కదా శాశ్వతం ప్రేమించటమే జీవితం
ప్రేమకే మనసు అంకితం అంకితం

ఆనందం నాకు చాలా నచ్చే సినిమా..
ఆకాష్,రేఖ,వెంకట్,తనూరాయ్ నటించిన, శ్రీను వైట్ల దర్శకత్వం వహించిన
ఈ సినిమా 28th September 2001 లో రిలీజ్ అయ్యింది.

ఈ సినిమా కధ విషయానికి వస్తే ఆకాష్ (హీరో) రేఖ ( హీరోయిన్) పక్క పక్క ఇళ్ళల్లో వుంటూ,
ఒకే కాలేజ్ లో చదువుతుంటారు.కానీ ఇద్దరికీ ఒకరంటే ఒకరికి ద్వేషం ,కోపంతో
ఎప్పుడు గొడవలు పడుతూ వుంటారు..
కొన్నాళ్ళకి రేఖ తండ్రికి ట్రాన్స్ ఫర్ అవటంతో వేరే వూరికి వెళ్ళిపోతారు.

అక్కడ వాళ్ళు వెళ్ళిన ఇంట్లో అంతకు ముందు తనురాయ్ ( సెకండ్ హీరోయిన్) కుటుంబం వుండేది.
సవతి తల్లి పెట్టే బాధలు భరించలేక,తను ప్రేమించిన అబ్బాయి(వెంకట్) ఉత్తరం సరైన సమయలో అందక
ఆత్మహత్య చేసుకుంటుంది.తనురాయ్ చనిపోయిన తర్వాత వచ్చిన ఉత్తరం చూసిన రేఖ
తనూరాయ్ చనిపోయిన విషయం ఆ ప్రేమికుడికి (వెంకట్) తెలిస్తే ఏమవుతాడో అన్న బాధతో
తనే తనూరాయ్ లాగా ఉత్తరాలు రాస్తుంటుంది రేఖ.

కానీ ఆ ఉత్తరాలు ఆకాష్ కి చేరుతుంటాయి.కారణం వెంకట్ ఆకాష్ కి క్లోజ్ ఫ్రెండ్
తనూరాయ్ తో పెళ్లి ఏర్పాట్లు చేసుకుని,తన దగ్గరికి వెళ్ళబోతున్న సమయంలో
యాక్సిడెంట్ లో చనిపోతాడు.ఈ విషయం తెలిస్తే తనూరాయ్ బ్రతకదని
వెంకట్ పేరుతో ఆకాష్ ఉత్తరాలు రాస్తుంటాడు..

అలా ఉత్తరాలు రాసుకున్న ఆకాష్,రేఖ ఒకరి కొకరు ఎదురుపడి అసలు విషయాన్ని తెలుసుకుంటారు.
తర్వాత ఇద్దరు ఎదుటి వాళ్ళ బాధను అర్ధం చేసుకునే మంచి మనసును,మానవత్వాన్ని
ఒకరిలో ఒకరు గుర్తించి,అభిమానం పెంచుకుని దెబ్బలాటలు,గొడవలు
మర్చిపోయి ఒకటవుతారు. ఇదీ కధ..
సినిమాలో హీరోలు, హీరోయిన్స్ ఇద్దరు బాగుంటారు,బాగా నటించారు.
ఇంక ఈ సినిమాలో నాకు నచ్చింది దేవిశ్రీ ప్రసాద్ సంగీతం.
పాటలు ఎన్నిసార్లు విన్నా ఇప్పటికి కూడా బోర్ అనిపించదు.

నాకు ఎక్కువగా నచ్చే పాటలు ఎవరైనా ఎపుడైనా బిట్ సాంగ్స్.

ఎవరైనా ఎపుడైనా సరిగా గమనించారా - 1

ఫాల్గుణ మాసం తర్వాత చైత్రం వచ్చేసరికి మారిన ఋతువుకి
చలి మెల్లగా తొలగి పోయి ,కొత్త చిగుళ్ళు తొడగటం,ఉగాదికి ప్రకృతి కొత్త అందాలు సంతరించుకోవటం
అనే భావాన్ని ప్రస్తుత పరిస్థితిలో
సవతి తల్లి పెట్టే బాధలు భరించలేక బాధపడుతున్న తనూరాయ్ జీవితంలోకి వెంకట్ ఆగమనంతో
కలిగిన మనోధైర్యం, కొత్త జీవితం గురించి చిగురించిన ఆశలకు అన్వయిస్తూ ..
సిరివెన్నెల సీతారామశాస్త్రి గారు రాసిన ఈ సాహిత్యం అద్భుతంగా వుంటుంది.

ఎవరైనా ఎపుడైనా సరిగా గమనించారా - 1

ఎవరైనా ఎపుడైనా సరిగా గమనించారా

చలిచెర అసలెప్పుడు వదిలిందో
ఆణువణువూ మురిసేలా
చిగురాశలు మెరిసేలా తొలి శకునం ఎప్పుడు ఎదురైందో
చూస్తూనే ఎక్కడినుంచో చైత్రం కదిలొస్తుంది
పొగమంచును పో పొమ్మంటూ తరిమేస్తుంది.
నేలంతా రంగులు తొడిగి సరికొత్తగా తోస్తుంది
తన రూపం తనే చూస్తూ పులకిస్తుంది..

ఋతువెప్పుడు మారిందో బ్రతుకెప్పుడు విరిసిందో
మనసెప్పుడు తలపుల వనమైందో!
ఎవరైనా ఎపుడైనా సరిగా గమనించారా
చలిచెర అసలెప్పుడు వదిలిందో
ఆణువణువూ మురిసేలా
చిగురాశలు మెరిసేలా తొలి శకునం ఎప్పుడు ఎదురైందో

ఎవరైనా ఎపుడైనా ఈ చిత్రం చూసారా - 2

చనిపోయిన ఇద్దరు వ్యక్తుల కోసం మంచి మనస్సుతో
రాసిన లేఖలను "ఒక చల్లని మది పంపిన లేఖ" అంటూ...
వ్యక్తిగతంగా ఎప్పుడూ ద్వేషించుకునే ఇద్దరు ఇలా ఉత్తరాల ద్వారా ఒక్కటి కావటం
"గగనాన్ని నేలను కలిపే వింతల వంతెనగా" వర్ణిస్తూ..
విధి ఎప్పుడు ఎలాజీవితాన్ని మలుపు తిప్పుతుందో తెలియదు
అందుకే చూసేందుకు అచ్చంగా మన భాషే అనిపించినా విధిరాత అక్షరము కూడా అర్ధమవదని
సిరివెన్నెల గారు రచించిన ఈ బిట్ సాంగ్స్ రెండు చాలా బాగుంటాయి..

ఎవరైనా ఎపుడైనా ఈ చిత్రం చూసారా - 2

ఎవరైనా ఎపుడైనా ఈ చిత్రం చూసారా

నడిరాతిరి తొలి వేకువ రేఖ
నిదురించే రెప్పలపై ఉదయాలను చిత్రించే
ఒక చల్లని మది పంపిన లేఖ
గగనాన్ని నేలను కలిపే వీలుందని చూపేలా
ఈ వింతల వంతెన ఇంకా ఎక్కడిదాకా
చూసేందుకు అచ్చంగా మన భాషే అనిపిస్తున్నా
అక్షరము అర్ధం కానీ ఈ విధిరాత

కన్నులకే కనపడని ఈ మమతల మధురిమతో
హృదయాలను కలిపే శుభలేఖ
ఎవరైనా ఎపుడైనా ఈ చిత్రం చూసారా
నడిరాతిరి తొలి వేకువ రేఖ
నిదురించే రెప్పలపై ఉదయాలను చిత్రించే
ఒక చల్లని మది పంపిన లేఖ

ఇవీ నాకు చాలా నచ్చిన ఇప్పటికీ టీవీ లో వస్తే వదలకుండా నేను చూసే ఆనందం సినిమా విశేషాలు.

ఆనందం

నా సంగీత ప్రపంచంలో ఇళయరాజా..

2011-11-29T15:38:00.004+05:30

మా ఇంట్లో నాకు , మా తమ్ముడికి ఇళయరాజా పాటలంటే చాలా ఇష్టం.
ఎక్కడికైనా వెళ్ళేటప్పుడు కార్ లో,మా ఇద్దరి మొబైల్ లో ఇళయరాజా
పాటలు తప్పకుండా ఉండాల్సిందే..
అలా మాకు ఇష్టమైన,నేను కలెక్ట్ చేసిన ఇళయరాజా గారి పాటలు
ఇళయరాజా సంగీతాన్ని ఇష్టపడే అభిమానుల కోసం
నా సంగీత ప్రపంచం సరిగమలు...గలగలలు లో ...

http://raaji-telugusongslyrics.blogspot.com/

"1.ఇళయరాజా టాప్ 25 ఆడియో సాంగ్స్"
"2.ఇళయరాజా - All Time Hits -1"
"3.ఇళయరాజా - All Time Hits -2"

Art By : రమ్యాభద్ర...

2011-11-28T09:53:00.014+05:30

మా చెల్లి రమ్య చిన్నప్పటి నుండి చాలా టాలెంటెడ్ .
మంచి బొమ్మలు గీస్తుంది,పైటింగ్స్ వేస్తుంది..స్కూల్ డేస్ లో కూడా
ఎక్కడ పైంటింగ్,డ్రాయింగ్ పోటీలు జరిగినా తనే విన్ అయ్యేది.
ఇంట్లో వాళ్ళందరం తన టాలెంట్స్ ని ఎంకరేజ్ చేసే వాళ్లము..
నేను,తమ్ముడు ఎక్కడికి వెళ్ళినా తన పైటింగ్స్ కి కావలసినవన్నీ తెచ్చివ్వాల్సిందే..
పెళ్ళైన తర్వాత కూడా తన హాబీస్ ని ఎంకరేజ్ చేసే భర్త రావాలని మేమందరం అనుకునే వాళ్లము.
దానికి తగినట్లే తన హజ్బండ్ మా చెల్లి ఆర్ట్ ని ,టాలెంట్స్ ని మాకంటే ఎక్కువగా ఇష్టపడతారు..
మేము ఎలాగైతే తనకి అవసరమైనవన్నీ తెచ్చి ప్రోత్సహిస్తామో మా మరిదిగారు భద్ర కూడా అలాగే చేస్తారు..
తన అభిరుచుల్ని గుర్తించి,గౌరవించి,ప్రోత్సహించే భర్త దొరకటాన్ని
మించిన అదృష్టం ఏ అమ్మాయికైనా ఏముంటుంది..

మా చెల్లికి బాపు బొమ్మలు ఇష్టమని "బాపు బొమ్మల హరివిల్లు" బుక్ గిఫ్ట్ గా ఇచ్చారు ..
అందులో ఈ వినాయకుడి బొమ్మ మా చెల్లి ఆయిల్ పైంట్స్ తో వేసింది..

మా రమ్య చార్ట్ మీద వేసిన బొమ్మను ఎంతో అపురూపంగా ఫ్రేం చేయించారు తన హజ్బండ్
ఫ్రేం చేయించటమే కాదు ఇంటికి ఎవరు వచ్చినా ఇది మా రమ్య చేసింది అని ఎంతో గొప్పగా చెప్తారు..
వూల్ తో చార్ట్ మీద చేసే మాటీ వర్క్.మా అమ్మ మా చిన్నప్పుడు మాటీ వర్క్ చాలా బాగా చేసేది.
అమ్మ దగ్గర నేను నేర్చుకున్నాను.ఇప్పుడు చెల్లి సొంతగా బుక్ చూసి నేర్చుకుని తయారు చేసింది.

దాన్ని కూడా ఫ్రేం చేయించి హాల్ లో డెకరేట్ చేశారు

తనని ఇంతగా ఎంకరేజ్ చేస్తున్న తన బెటర్ హాఫ్ కి మా చెల్లి ఇచ్చిన గిఫ్ట్ ఈ టీషర్ట్.
వైట్ టీ షర్ట్ మీద ఈ బాపు బొమ్మలు వేసి ఎంతో అందంగా తీర్చిదిద్దింది.
ఈ షర్ట్ చూసి అందరు మెచ్చుకుంటే తననే మెచ్చుకున్నంత ఆనంద పడతారు మా మరిదిగారు.

కిషోర్ కుమార్ - Melodies Of The King..

2011-11-27T14:40:00.003+05:30

హిందీ పాటల్లో నాకు ఇష్టమైన , ఎప్పటికీ ఎవర్ గ్రీన్ హిట్స్ గా
నిలిచిపోయిన కొన్ని కిషోర్ కుమార్ పాటలు..

'న్యాయ దినోత్సవం'

2011-11-26T10:44:00.012+05:30

భారతదేశానికి స్వాతంత్ర్యం వచ్చిన తర్వాత రాజ్యాంగ రచనకు ఒక పూర్తి స్థాయి కమిటీ ఏర్పడింది.
ఆ కమిటీ రూపొందించిన రాజ్యాంగ ముసాయిదా తొలి ప్రతి మీద 1949 నవంబర్ 26 న
రాజ్యాంగకమిటీ సభ్యులు సంతకాలు చేశారు. 'భారత రాజ్యాంగం'
1950 జనవరి 26 నుండి అమలులోకి వచ్చింది.
నవంబర్ 26 ను 'జాతీయ న్యాయ దినోత్సవం' గా జరుపుకోవాలని
భారత అత్యున్నత న్యాయస్థానం రెండు దశాబ్ధాల క్రితం నిర్ణయించింది.

రాజ్యాంగానికి అనుగుణంగా పనిచేయటమే కాక,రాజ్యాంగానికి రక్షణగా
న్యాయవ్యవస్థ పని చేస్తుంది కనుక,రాజ్యాంగ తొలి ప్రతులపై రాజ్యాంగ కమిటీ సభ్యులు
సంతకం చేసి, రాజ్యాంగ ముసాయిదాను అధికారకంగా ఆమోదించిన నవంబర్ 26 ని
న్యాయదినోత్సవంగా జరుపుకోవటం ఆనవాయితీగా మారింది.
చట్టం ముందు అందరు సమానమని ,
ప్రజలందరికి సత్వర న్యాయం అందచేయటమే న్యాయదినోత్సవ ధ్యేయం..

నిజమైన న్యాయాన్ని గెలిపించడానికి కృషి చేసే ప్రతి ఒక్కరికీ న్యాయదినోత్సవ శుభాకాంక్షలు