పరుగాపక పయనించవె తలపుల నావా.. కెరటాలకు తలవంచితె తరగదు త్రోవా.. ఎదిరించిన సుడిగాలిని జయించినావా.. మది కోరిన మధు సీమలు వరించిరావా..

8, మార్చి 2013, శుక్రవారం

Happy Women's Day...



మంచితనం మమకారం  మానవత్వంతో పరిమళించే సౌగంధి 
ప్రేమ ఆప్యాయతలను పంచటంలో ఎవరూ సాటిరాని మాతృమూర్తి 
నింగీ నేలా నాదే  అంటూ చైతన్యంతో, సంకల్పబలంతో 
అంతులేని ఆత్మవిశ్వాసంతో సాగుతున్న మహిళలందరికీ 
మహిళా దినోత్సవ శుభాకాంక్షలు 


 ♥ Every Home, Every Heart, Every Feeling, 
Every Moment Of happiness is incomplete without you, 
Only you can complete this world
Happy Women’s Day!

6, మార్చి 2013, బుధవారం

ఆడించి అష్టా చెమ్మా ఓడిద్దామా...



అష్టా చెమ్మా వెనకటి రోజుల నుంచీ చాలా ఫేమస్  ఆట.  అప్పట్లో ఇళ్ళల్లో ఆడవాళ్ళు, అరుగుల  మీద చేరిన జనాలు  ఇలా ప్రతి ఒక్కళ్ళు ఈ అష్టా చెమ్మా కి అభిమానులే. నా చిన్నప్పుడు పిన్ని వాళ్ళు , అమ్మ వాళ్ళు అష్టా చెమ్మాఆడుతుంటే చూడటం సరదాగా ఉండేది. అమ్మమ్మ వాళ్ళింట్లో ప్రత్యేకంగా ఈ ఆట కోసం ఒక బండని కేటాయించి దాని మీద అష్టా చెమ్మా గడులు చెక్కించారట మా తాతయ్య..  

ఈ ఆట ఆడుతున్నప్పుడు పోటీ చూడాలి...  అవసరమైన పందాలు వేసుకుని, గడులు దాటి పంట అవుతున్న వాళ్ళు సంతోషిస్తుంటే ఓడిపోయిన వాళ్లకి ఉక్రోషం తన్నుకుని వస్తుంది . ఒకళ్ళ మీద ఒకళ్ళకి పంతాలుకోపాలు పెరిగి పోతుంటాయి.  కొట్టుకునేదాకా వచ్చేది వ్యవహారం. కొంత మంది ఎప్పుడు ఎంత పందెం కావాలో అంత  అవసరమైన పందాలు వేసేస్తూ ఉంటారు. అలాంటి వాళ్ళతో మాత్రం గెలవటం కష్టం.  వీళ్ళని తొండి  చేస్తున్నారు అని కూడా అనే వాళ్ళు .. ఇలా అన్ని పనులు, నిద్రాహారాలు మానుకుని మరీ ఈ ఆటలు ఆడేవాళ్ళు.  

వెనకటి కాలమే కాదు మా రోజుల్లో కూడా చాక్ పీస్ తో అష్టా చెమ్మా గడులు గీసుకుని గవ్వలు, చింత పిక్కలతో అష్టా చెమ్మా ఆడుకునే వాళ్లము. సమ్మర్ హాలిడేస్ లో వూరి నుండి వచ్చే పెద్దమ్మ కూతురు,మా పెద్దక్క సంధ్య ఈ ఆటలని ఆడించేది. తనకేమో పల్లెటూర్లో ఈ ఆటలు ఆడటం,గవ్వల్ని,చింత పిక్కల్ని ఎలా పట్టుకుంటే ఎంత పందాలు పడతాయి అన్న విషయాల్లో బాగా అనుభవం ఉంది.. మాకు కొత్తగా నేర్చుకున్న సరదానే కానీ టాలెంట్ లేదు ... ఇంకేముంది అది వరసగా అన్ని ఆటలు గెలిచేది .. మమ్మల్ని ఓడించిందన్న ఉక్రోషం తో ఒక్కోసారి మా చేతిలో దెబ్బలు కూడా తినేది పాపం .. 


ఐతే ఈ అష్టా చమ్మా, పాము పటం (   Snakes and Ladders ), పచ్చీస్   ఇలాంటి ఆటలు ఇంట్లో ఆడకూడదు మంచిది కాదు అని ఆడనిచ్చే వాళ్ళు కాదు పెద్దవాళ్ళు.. రాను రాను ఈ ఆటలన్నీ మూలన పడ్డాయి దాదాపు మర్చిపొయ్యాము కూడా. మా ఇంట్లో ఇప్పటికీ  గవ్వలు,ఆటలో పెట్టే పిన్స్ అన్నీ కలెక్షన్ లలో మిగిలి ఉన్నాయి.. ఇప్పుడు వాటితో ఆడాలన్న తీరికా లేదు, కోరికా లేదు.. 

ఆటలు,పాటలు, చదువులు  అన్నీ నెట్ ప్రపంచంలోనే  అయిపోయిన ఈ రోజుల్లో నలుగురితో కలిసి కూర్చుని చేసే పనులు చేయటం కుదరదు కదా అందుకే మన పక్కన ఉన్న మన మనుషుల్ని వదిలేసి  ఎక్కడో పక్క దేశం లో ఉన్నవాళ్ళని  ఆడించి వాళ్ళని ఓడించాలని నిర్ణయించుకున్నాను. 

"king.com" ఈ సైట్ లో అకౌంట్ క్రియేట్ చేసుకుంటే మనతో పాటు మెంబర్స్ అయిన  అన్ని దేశాల వాళ్ళతో ఆడి వాళ్ళని ఓడించవచ్చు.. కంప్యూటర్ గేమ్స్ ఆడటం నాకు చాలా ఇష్టమైన హాబీ  ఈ సైట్ లో  " Ludo "  లేదా " పచ్చిస్ "   నాకు నచ్చిన ఆట .. ఈ ఆట నలుగురితో కలిసి  ఆడాలి.. ఇక్కడ కూడా మన వాళ్ళ లాగానే ఓడిపోయిన వాళ్ళు వాళ్ళ భాషల్లో తిడుతూనో , పొగుడుతూనో కామెంట్స్ ఇస్తుంటారు .. అలాగే నేను కూడా :-).. ఈ ఆట ఆడుతుంటే నాకు చిన్నప్పటి మా అష్టా చెమ్మా పోటీలు గుర్తుకొస్తాయి... కలర్ ఫుల్ గా,సరదాగా ఉండే ఈ Ludo చాలా బాగుంటుంది.
ఒక్క Ludo మాత్రమె కాదు చాలా రకాల స్ట్రాటజీ, పజిల్ ,అన్ని రకాల గేమ్స్ 
చాలా బాగుంటాయి...   
 





4, మార్చి 2013, సోమవారం

హద్దులేవి లేనిది అందమైన ప్రేమ..


 
ఆద్యంతమూ లేని అమరానందమే ప్రేమ 
ఏ బంధమూ లేని తొలి సంబంధమే ప్రేమ 
ప్రేమ దివ్యభావము  ప్రేమ దైవరూపము 
ప్రేమ జీవరాగము  ప్రేమ జ్ఞానయోగము 
మనసున పారే సెలయేరు ప్రేమ 
అలసట తీర్చే చిరుగాలి ప్రేమ 
హద్దులేవి లేనిది ... అందమైన ప్రేమ.. 

ఇది ప్రేమ గురించి ఒక సినీ కవి చెప్పిన అందమైన భావన..   

"ఎన్నో బంధాలకి పునాది  ప్రేమ"
"ఒకరి కోసం ఒకరుగా బ్రతకటమే ప్రేమ  "
"ఒకరి కోసం మరొకరు ఏదైనా చేయటమే ప్రేమ"
 ఇలా ప్రేమంటే చాలా మందికి చాలా అభిప్రాయాలు,ఆలోచనలు ఉంటాయి... 

కొందరికి ప్రేమంటే కవితలు,కబుర్లు రొమాంటిక్ సర్ ప్రైజెస్, కాస్ట్లీ గిఫ్ట్ లు.. 
ఇవి కూడా ఒక్కోసారి ఎదుటి మనిషిని మనం ఎంతగా ప్రేమిస్తున్నామో 
మన మనసును వ్యక్తం చేయటానికి అవసరమే.. ఇకపోతే ఈ రోజుల్లో ప్రేమికులే కాదు ప్రేమే పునాదిగా వివాహబంధం లోకి వచ్చిన జంటలు కూడా చాలా చిన్నచిన్న కారణాలకే విడిపోవటం, విడాకుల దాకా వెళ్ళటం సర్వసామాన్యంగా మారిపోయింది... 

ఈ మధ్య వచ్చిన "మిధునం" సినిమా చూసిన తర్వాత ఎన్నికష్టాలు సమస్యలు ఎదురైనా ఒకరికొకరం అన్నట్లుగా  కలిసి బ్రతికిన అప్పటివాళ్ళ లాగా ఇప్పటివాళ్ళం ఆలోచిస్తున్నామా?? నేను గొప్పంటే నేను గొప్ప అనుకునే అహంభావాలు, ఆవేశాలు వదిలేసుకుంటే సమస్యలు తగ్గుతాయి కదా అని.  గొప్ప ఆలోచనలు చేయగలము కానీ ఆచరించాలంటే కాస్త కష్టమేనేమో అనిపిస్తుంది :).. 

నిన్న ఫేస్ బుక్ లో ఒక వీడియో చూశాను " MEALS  READY " అనే టైటిల్ తో చేసిన ఈ వీడియో చూశాక అనిపించింది నిజమైన ప్రేమ అంటే ఇలాగే ఉంటుందేమో ...  పిల్లలు పెరిగి పెద్దయ్యి ఎవరి జీవితాల్లో వాళ్ళు స్థిరపడినా భార్యా, భర్తా ఒకరికరుగా బ్రతుకుతూ తనని నమ్ముకుని వచ్చిన భార్య కోసం,అవసరమైతే తన పిల్లల కోసం ముసలితనంలో కూడా కష్టపడే ఇలాంటి తండ్రులు కూడా ఉంటారు  అని...

మంచి మెసేజ్ తో, చూస్తున్నప్పుడు మనసుకు కొంచెం బాధగా అనిపించిన ఈ వీడియో నాకు చాలా నచ్చింది... 

If You Are A Human....
It Will Make Your Eyes Wet.....





20, ఫిబ్రవరి 2013, బుధవారం

మీరైతే ఏం చేస్తారు???




నిన్న "వనజవనమాలి" గారు "మాంగల్యం తంతునానేనా" మంత్రం ఒక అలకారప్రాయంగా మారిపోయిందని, చిన్న విషయాలకే విడాకుల దాకా పోతున్న మన వివాహ వ్యవస్థను గురించి  చక్కని పోస్ట్  రాశారు.. అది చదివిన తర్వాత  నాకు కూడా ఈ మధ్యే ఎదురయిన ఒక సమస్యను
ఇక్కడ చెప్పాలనిపించింది

వివాహ బంధం పవిత్రమైన ఒక ప్రమాణం .. " నిన్ను నేను ఎప్పటికీ నీడలా కాపాడతానని భర్త,నీ వెంట నడిచి నీ అడుగులో అడుగవుతాను " అని 
భార్య ఒకరికొకరు చేసుకునే బాసలే పెళ్ళికి ఆరంభం.. 
కానీ ఆ పెళ్ళే ఒక అబద్ధం తో మొదలైతే అప్పుడు పరిస్థితి ఏమిటి??


ఇది ఈ మధ్యే జరుగుతున్న ఓక కేస్ కి సంబంధించిన వివరాలు :

ఈ కేస్ లో జంటకి  2008 లో ఎంగేజ్ మెంట్ అయ్యింది.ఎంగేజ్ మెంట్ రోజు అతని తల్లిదండ్రులు, బంధువులు అందరూ వచ్చి దగ్గరుండి జరిపించారు.. తర్వాత లగ్న పత్రిక రోజున ఒప్పుకున్న కట్నం లో కొంత ఇచ్చి లగ్నపత్రిక రాసుకున్నారు.ఆ లగ్నపత్రిక రాసుకునే రోజు పెళ్ళికొడుకు తండ్రి మీరిచ్చిన కట్నం మాకు సరిపోదు పెళ్లి ఖర్చుల కోసం మరో లక్ష రూపాయలు ఇవ్వమని అడిగారు.దానికి అమ్మాయి తరపు వాళ్ళు మేము ఇవ్వలేము ఇప్పటికి ఒప్పుకున్న వరకు మాత్రమే ఇస్తామని అన్నారు.అప్పుడు పెళ్ళికొడుకు తండ్రి అంత గతిలేని వాళ్ళు ఎందుకు మీకు ఈ సంబంధం అంటూ తిట్టి అవమానకరంగా మాట్లాడారు... పెద్దలు సర్దిచెప్పి లగ్నపత్రిక రాయించుకున్నారు.

పెళ్లిరోజు నాటికి అమ్మాయి వాళ్ళు ఎంత ఎదురుచూసినా,ఫోన్ లు చేసినా ఇదిగో వస్తున్నాము అదిగో వస్తున్నాము అంటూ మాట్లాడుతూనే తీరా పెళ్ళి సమయం మించి పోయిన తర్వాత పెళ్ళికొడుకు ఒక్కడే వచ్చి,మీరు మా నాన అడిగిన డబ్బులు ఇస్తామని ఒప్పుకోకుండా గొడవపడ్డారు అందుకనే మా వాళ్లకి ఈ పెళ్లి ఇష్టం లేక రాలేదు. మీకు అభ్యంతరం లేకపోతె నేను మీ అమ్మాయిని పెళ్లి చేసుకుంటాను. నా జాబ్ నాకుంది మీ అమ్మాయిని నేను జాగ్రత్తగా చూసుకుంటాను అని పెద్దమనుషులను అడిగాడు. బంధువులందరూ వచ్చి ఉన్నారు.  ఎలాగూ పెళ్ళికొడుకు మంచి వ్యక్తిలాగానే ఉన్నాడు.. మంచి ఉద్యోగం చేస్తున్నాడు. సమస్య ఏముందిలే అని పెద్దమనుషులు నచ్చచెప్పటం తో గత్యంతరం లేని పరిస్థితుల్లో ఆ పెళ్లి జరిగిపోయింది.

ఎన్నిసార్లు వీళ్ళిద్దరూ అబ్బాయి తల్లిదండ్రులతో మాట్లాడాలని ప్రయత్నించినా వాళ్ళు మాట్లాడలేదు... రెండు నెలలు భార్యా,భర్త ఇద్దరూ అబ్బాయి పని చేస్తున్న దగ్గర కలిసి ఉన్నారు.రెండు నెలల తర్వాత అబ్బాయి వాళ్ళ అన్నయ్య వీళ్ళ ఇంటికి వచ్చాడు. పెళ్లి జరిగిన కొన్నాళ్ళ వరకు తన తల్లిదండ్రులు మాట్లాడటం లేదు, తన దగ్గరికి రావటం లేదు అన్న బాధలో వున్న భర్త తన అన్నయ్య రాకతో సంతోషించాడు అలాగే ఈ అమ్మాయి కూడా.. ఇక అప్పటి నుండి ఆ అబ్బాయి తల్లిదండ్రులు, అక్కలు,అమ్మమ్మతాతయ్య,పిన్ని ఇలా అందరూ ఆ అబ్బాయికి ఫోన్ లు చేసి మాట్లాడటం మొదలు పెట్టారు. కానీ ఈ అమ్మాయికి మాత్రం అత్తింటి వారు ఎవరూ ఫోన్ చేయరు,మాట్లాడరు.. కోడలిగా వాళ్ళు అంగీకరించలేదు. దీనికి తోడూ భర్త లో కూడా ఈ అమ్మాయి వలన నావాళ్ళు నాకు దూరమయ్యారు  అన్న ఆలోచన మొదలయ్యింది. 

అతని బంధువులు ఎవరు ఫోన్ చేసినా,ముఖ్యంగా వాళ్ళ అన్నయ్య ఫోన్ చేసి చెప్పే మాట "నువ్వు జాగ్రత్త ఆ అమ్మాయి నీ డబ్బు కోసం ఆస్తి కోసం మేము రాకపోయినా నిన్ను పెళ్లి చేసుకుంది. వాళ్ళు గతిలేని వాళ్ళు " ఆ అమ్మాయి, తన తరపు వాళ్ళు నిన్ను ఏమైనా చేస్తారు వాళ్ళ దగ్గరికి నువ్వు వెళ్ళకు, వాళ్ళను నీ ఇంటికి రానివ్వకు అని చెప్పేవాళ్ళు. ఇవే ,మాటలను అతను భార్యను అంటూ నీ వాళ్ళు రావద్దు అంటూ,నువ్వు నా డబ్బు కోసమే మా వాళ్ళు రాకపోయినా నన్ను పెళ్లి చేసుకున్నావు అనటం, మా వాళ్ళు నీ వల్లనే నాకు దూరమయ్యారు లేకపోతె వాళ్లకి నేనంటే చాలా ప్రేమ అంటూ ఈ అమ్మాయిని,తన తరపు వాళ్ళని అనుక్షణం మాటలతో హింసించేవాడు. కొన్నాళ్ళకి నేను మా అన్నయ్య దగ్గర ఉండి జాబ్ చేస్తాను అక్కడే ఉందాము అనటం మొదలు పెట్టాడు. ఇలా గొడవలు పడుతూ ఈ అమ్మాయిని వదిలేసి వెళ్ళిపోయి వాళ్ళ అమ్మ నాన్న ల దగ్గర కూర్చుని ఈ అమ్మాయిని అక్కడికి రమ్మన్నాడు సరేనని ఆ అమ్మాయి అత్తగారింటికి  వెళ్ళింది. 

అక్కడికి వెళ్ళిన అమ్మాయిని తన వాళ్ళ ముందే ఇష్టమొచ్చినట్లు తిట్టి,కొట్టి నాకు మరో 10 లక్షలు కట్నం తీసుకుని వస్తేనే రా అంటూ అందరూ కలిసి బయటికి గెంటేసారు.. ఇదేమని వాళ్ళ పెద్దల్ని అమ్మాయి పెద్దలు అడిగితె "మీతో మాకు సంబందం లేదు మేము పెళ్ళికి రాలేదు" ఇదే వాళ్ళ సమాధానం.ఇలా రెండు సంవత్సరాల పాటూ ఈ అమ్మాయిని పుట్టింట్లోనే వదిలేసి అతను ఎక్కడ ఉన్నాడో చెప్పకుండా అతను, అతని తరపు బంధువులు ఆ అమ్మాయిని పట్టించుకోకుండా వదిలేసారు. పోలీస్ కేస్ పెట్టినా ప్రయోజనం లేదు, పెళ్ళికి వాళ్ళు ఎవరూ రాలేదు కాబట్టి వాళ్ళను మేము అరెస్ట్ చేయము అతనెక్కడో వాళ్లకి తెలియదట అని పోలీసుల సమాధానం. 

అప్పుడు ఆ అమ్మాయి తన భర్త ఆచూకీ కోసం హ్యూమన్ రైట్స్ కమిషన్ ను  ఆశ్రయించింది. అప్పుడు 498 కేస్ నమోదు చేసారు పోలీసులు. తమ్ముడ్ని ప్రోత్సహించి గొడవలు పెట్టి ,అతన్ని దాచిపెట్టిన అభియోగం కింద ఎంక్వైరీ కి వచ్చిన అతని అన్న చెప్పిన సమాధానం మా తమ్ముడు గత పది సంవత్సరాలుగా మానసిక వ్యాధితో బాధపడుతున్నాడు. ఆ ట్రీట్మెంట్ కోసం నేనే నా తమ్ముడిని హాస్పిటల్ లో ఉంచాను ఆ అమ్మాయి కి మేము కావాలనే చెప్పలేదు  అని చెప్పాడు.

ఇప్పటికి అతని అన్నని, నాన్నని అరెస్ట్ చేసిన పోలీసులు అసలు నిందితుడు భర్తని మాత్రం మొన్నటిదాకా మానసిక వ్యాధి కోసం ట్రీట్ మెంట్ తీసుకున్నాడు. ప్రస్తుతం ఎక్కడ ఉన్నాడో తెలియదు అని కేస్ పెండింగ్ లో పెట్టారు... 

 చట్టం ,న్యాయం ఆ అమ్మాయికి పరిష్కారం కల్పించే సంగతి ఎలా ఉన్నా నైతికంగా ఆలోచిస్తే ఈ విషయంలో తప్పు ఎవరిది ??

కొడుకు గత పది సంవత్సరాలుగా పిచ్చివాడు అని తెలిసి కూడా ఎంగేజ్ మెంట్ చేసి, కట్నం తీసుకుని, పెళ్ళికి రాకుండా తప్పుకోవటం మోసం కాదా ??
 
 పెళ్లి జరిగిన క్షణం నుండీ అతనికి నెగటివ్ ఫెలింగ్స్ కలుగచేసి భార్యా,భర్త విడిపోవటానికి కారణమైన అతని కుటుంబ సభ్యులు పెళ్ళికి రాలేదు కాబట్టి వాళ్ళు ఈ నేరంలో భాగస్వాములు కారా ???

పిచ్చివాడైన కొడుక్కి ఎంగేజ్ మెంట్ ఎందుకు చేసారంటే అతని తండ్రి సమాధానం "ఎంగేజ్ మెంట్ కి రాకపోతే నా కొడుకు మమ్మల్ని చంపుతాను అన్నాడు అందుకే వచ్చాము" అని.. పిచ్చి కొడుకు చంపుతాను అంటే తీసుకెళ్ళి పిచ్చి హాస్పిటల్ లో ట్రీట్ మెంట్ ఇప్పించాలి కానీ ఒక అమ్మాయి జీవితాన్ని నాశనం చేస్తారా??
 

 మేము పెళ్ళికి రాలేదు కదా అప్పుడైనా మానుకోకుండా  మీరు పెళ్లికి  ఎందుకు ఒప్పుకున్నారు అని అబ్బాయి తల్లిదండ్రుల వాదన.. పెళ్లిరోజు దాక వస్తామని మోసం చేసి,చివరి క్షణం లో రాకుండా మానేస్తే ఆ పెళ్లి ఆగిపోతే 
ఆ అమ్మాయి పరిస్థితి ఏమిటి ?? 

కొడుకును దగ్గర పెట్టుకుని అతని అవసరాలను అన్నిటినీ చూసుకునే తండ్రి కోడలిని మాత్రం నీతో మాకు సంబంధం లేదు, మా ఇంటికి రావద్దు అనటం న్యాయమేనా??

పెళ్లి సమయంలో మా వాళ్ళు రాకపోయినా పర్వాలేదు మీ అమ్మాయిని జాగ్రత్తగా చూసుకుంటానని మాటిచ్చి, తర్వాత నీ వల్ల  నా కుటుంబం నాకు దూరమయ్యింది వాళ్ళే నాకు ముఖ్యం అంటూ వాళ్ళతో కలిసి పిచ్చి నాటకం ఆడుతున్న ఆ భర్త నుండి, ఈ సమస్య నుండి అమ్మాయికి దొరికే పరిష్కారం ఏమిటి??

అసలు ఈ విషయంలో ఎవరు బాధితులు ?? ఎవరు నిందితులు ??

బ్లాగర్లు ఈ విషయం లో మీ అభిప్రాయాలను తెలియచేస్తారని ఆశిస్తాను..



11, ఫిబ్రవరి 2013, సోమవారం

Happy BirthDay To " నా చిన్నిప్రపంచం "



  
నా చిన్నిప్రపంచానికి పుట్టినరోజు శుభాకాంక్షలు

నా హృదయంలో నిలిచిపోయే భావాలు  ..
నన్ను నేను తెలుసుకునే అనుభవాలు..
సంతోషంలో నా పెదవులపై నిలిచే  చిరునవ్వులు..
బాధలో నా కంటి నుండి జారే చిన్ని చినుకులు..
నా చుట్టూ ఉన్న మనుషుల  ప్రేమ,అభిమానం అసూయ,ద్వేషాలు..
జయాపజయాలు , పొగడ్తలు, అభినందనలు, అవమానాలు 

అన్నిటిని తనలో ఇముడ్చుకుని  ప్రతి రోజూ ఒక  కొత్త పాఠాన్ని నేర్పుతూ, 

ఎప్పుడూ నన్ను వదలకుండా నాతో ఉండే "నా చిన్నిప్రపంచం" నాకు చాలా ఇష్టం.

" నా చిన్నిప్రపంచం " నాకు కేవలం బ్లాగ్ మాత్రమే  కాదు .. 
నా ప్రియనేస్తం.. నా అంతరంగానికి అక్షర రూపం.
" నా చిన్నిప్రపంచం " పేరుకే చిన్నది కానీ ఎల్లలు లేనిది ... మంచి స్నేహితులను, వ్యక్తులను , కొత్త ప్రపంచాన్ని పరిచయం చేసింది. 
లోకాన్ని , మనుషుల ప్రవర్తనలను బ్లాగ్ ల ద్వారా కూడా చూసే అవకాశం  కల్పించింది.ఈ నెట్ ప్రపంచంలో నా పేరుకు  ఒక గుర్తింపును తెచ్చింది.

ఇన్నేళ్ళ నా బ్లాగ్ ప్రయాణంలో నేను ఏదో సాధించానని చెప్పను, కానీ నేను నేర్చుకున్నవి చాలా ఉన్నాయి..నెట్ ప్రపంచం అయినా బయటి ప్రపంచం అయినా ఎదుటి వాళ్ళ  మనోభావాలు, ఆలోచనలు మనకి నచ్చినా  నచ్చక పోయినా వారి అభిప్రాయాలను గౌరవిస్తే చాలు, ఇతరులను జడ్జ్ చేసే ముందు మన అర్హత ఏమిటో కూడా తెలుసుకుంటే మంచిది అన్న విషయాన్నీ ఎప్పుడూ గుర్తుంచుకుంటాను...

" నా  చిన్నిప్రపంచాన్ని"  ఈ  ప్రపంచానికి పరిచయం చేసి  ఈ రోజుకి 3 సంవత్సరాలు పూర్తయ్యింది.నాకు చాలా ఇష్టమైన "నా చిన్నిప్రపంచం"  పుట్టినరోజు ఈ రోజు...


 నా చిన్నిప్రపంచానికి ఎప్పుడూ వస్తూ నా ఆలోచనలను, భావాలను మెచ్చుకుని అభినందించే మిత్రులకు,అప్పుడప్పుడు వచ్చి, నా చిన్నిప్రపంచంలో కనిపించే బ్లాగర్లకు అందరికీ "నా చిన్నిప్రపంచం" పుట్టినరోజు సందర్భంగా కృతఙ్ఞతలు ...

  

5, ఫిబ్రవరి 2013, మంగళవారం

ఎక్కడికి " e " పరుగు ఎందుకని " e " ఉరుకు...





ఒకప్పుడు కేవలం ఉత్తరాల ద్వారా,ఫోన్ ల ద్వారా అందుబాటులో ఉండే మానవ సంబందాలు ఇప్పుడు నెట్ ప్రపంచం పరిధిలోకి వచ్చేశాయి .. ఎప్పుడూ టీవీయేనా కాస్త అలా నెట్ ప్రపంచం లో కూడా విహరిద్దాం అని గృహిణులు కూడా అనుకునే రోజులు ప్రస్తుతం..మెయిల్స్,మెసెంజర్స్,చాటింగ్ లు అయిపోయి ఇప్పుడు బ్లాగ్స్, ఫేస్ బుక్ ,ట్వీటర్స్, ఆర్కుట్‌, గూగుల్‌ ప్లస్‌ ఇప్పుడు ఇవే సామాజిక సంబంధాలు (సోషల్‌ నెట్‌వర్క్‌)..   

సోషల్‌ నెట్‌వర్క్‌ అంటే కేవలం ఇవే కాదు మన ఆసక్తులను బట్టి వంటలు,క్రాఫ్టు,పెయింటింగ్స్,ఇంటీరియర్ డెకరేషన్,మన ఆసక్తులను షేర్ చేసుకోవటం, కుటుంబ,ఆరోగ్య  సమస్యలను చర్చించటం ఇలా ఏ  విషయాలను నేర్చుకోవాలంటే వాటి గురించి నిపుణులు, మామూలు గృహిణులు కూడా నిర్వహించే సైట్ లు ఎన్నో ప్రస్తుతం అందుబాటులో ఉన్నాయి..ఇలా మనకిష్టమైన వారితో పరిచయం చేసుకుని,అభిప్రాయాలను పంచుకునే  వీలుంటుంది... ఆధునిక పరిజ్ఞానాన్ని, "e " పరిచయాలను ఉపయోగించుకుని కెరీర్ లో కూడా మంచి అవకాశాలను యువత అందుకుంటున్నారు .ఇంకా దేశ  విదేశాల్లో ఉండేవారు కూడా ఎక్కడో దూరాన ఉన్నామన్న ఫీలింగ్ లేకుండా "ఈ"సంబంధాలతో ఎప్పుడూ కనెక్ట్ అయి ఉండటం,కొత్త కొత్త పరిచయాలను ఏర్పరచుకోవటం  కూడా సంతోషించదగిన విషయమే..

బ్లాగ్స్ మన అభిప్రాయాలు,ఆలోచనలు పంచుకోవటానికి చక్కని వేదిక అని నాలాగా చాలా మంది బ్లాగ్స్ రాయటం మొదలుపెట్టారు.కానీ ఈ బ్లాగ్స్  కొందరు చేయి తిరిగిన రచయిత్రులు,రచయితలకే తగినదిగా ఈ మధ్య కాలం లో అనుకుంటున్న తర్వాత బ్లాగ్స్ రాయాలి అంటే ఇతర బ్లాగర్ లాగా మనం రాయగలుగుతున్నామా లేదా ?? 
జనాలకి నచ్చుతుందా  లేదా??   అని ఆలోచించాల్సిన పరిస్థితి వస్తుంది.

ఈ మధ్య కాలం లో సోషల్‌ నెట్‌వర్క్‌ లలో ఎక్కువ ప్రజాభిమానం పొందింది మాత్రం ఫేస్ బుక్ అని చెప్పొచ్చు. తమ ఇష్టా ఇష్టాలు,మూడ్స్, అభిప్రాయాలు,ఆలోచనలు ఇలా భావవ్యక్తీకరణకు అనువైన వేదికగా  ఫేస్‌బుక్ మారింది. ఫేస్ బుక్ మొదలై నిన్నటికి 9 సంవత్సరాలు పూర్తయిందట. ఇన్నాళ్ళకి నాకు ఫేస్ బుక్ ఉపయోగించాలన్న ఆలోచన వచ్చింది. నాకు ఫేస్ బుక్ అకౌంట్ మా తమ్ముడు 2009 లోనే తీసినా దాన్ని నేను ఎప్పుడూ ఓపెన్ చేయలేదు. కానీ ఈ  మధ్య  కొత్త సంవత్సరం నేను చేసిన కొత్త పనుల్లో ఫేస్ బుక్ ఉపయోగించటం మొదలు పెట్టటం కూడా ఒకటి.. 

ఫేస్ బుక్ ఓపెన్ ఐతే చేసాను కానీ ఇందులో ఫ్రెండ్స్ గా ఎవరిని యాడ్ చేసుకోవాలి,ఏమి పోస్ట్ చేయాలి ఇవన్నీ ఎప్పుడూ సమస్యే.. పైగా నా క్లోజ్ ఫ్రెండ్స్  లో కానీ తెలిసిన వాళ్ళలో కానీ ఫేస్ బుక్ గురించి ఉన్న ఫీలింగ్ ఏంటంటే "ఫేస్ బుక్ లో ఫ్రెండ్స్ అంటే తప్పకుండా తెలిసిన వాళ్ళే అయి ఉంటారు.. ఆ పరిచయం ఎంత వరకైనా ఉండొచ్చు"  అనే మాటలు విని ఉన్నాను. దాంతో నాకు ఎవరిని ఫ్రెండ్స్ గా యాడ్ చేసుకోవాలన్నా ఆలోచించాల్సిన పరిస్థితి. ఫ్రెండ్ రిక్వెస్ట్ లు చాలానే వస్తుంటాయి.వాటిలో కొన్ని ఫేక్ అకౌంట్స్ కూడా ఉంటాయి.అలాగే  మనకెవరో తెలియని వాళ్ళని వాళ్ళు ఎంత గొప్ప వాళ్లైనా ఫ్రెండ్స్ గా యాడ్ చేసుకోలేము .. అలాగని అందరూ మనకు తెలిసిన వాళ్ళే ఉండరు కాబట్టి నా ఫేస్ బుక్ లో ఫ్రెండ్స్ చాలా వరకు తెలిసిన వాళ్ళు, నా బ్లాగ్ ఫ్రెండ్స్, నాకు ఇష్టమైన రచయితలూ, సింగర్స్ ను ఫ్రెండ్స్ గా యాడ్ చేసుకున్నాను...ఇలా రచయితలు,సింగర్స్ లో కూడా ఫేక్ ప్రోఫైల్స్ ఉంటున్నాయన్నది కూడా తెలిసిందే.. అలాగే మన ఇష్టాలకి, అభిరుచులకి దగ్గరగా ఉండే గ్రూప్స్ లో కూడా మంచి ఫ్రెండ్స్ మనకి దొరకవచ్చు... 

ఇదిలా ఉండగా ఈ మధ్య ఫేస్ బుక్ లో కొందరు వ్యక్తులు మహిళల గురించి చేసిన వ్యాఖ్యలు పెద్ద దుమారాన్నే రేపాయి. వాళ్ళని తీవ్రంగా వ్యతిరేకించి వాళ్ళతో క్షమాపణలు చెప్పించి,సైబర్ చట్టాల కింద అరెస్ట్ చేయించి,వాళ్లకి తగిన బుద్ధి చెప్పటం లో సఫలీకృతులయ్యారు మహిళలు... కానీ నాకనిపించింది. "ఈ ప్రపంచంలో చాలామంది మనస్సులో వుండే మాటలే ఆ నలుగురి నోటి ద్వారా బయటికి వచ్చాయి" అని..సమాజంలో గౌరవప్రదమైన స్థానం లో ఉన్నవాళ్ళే చాలామంది బయట ఉద్యోగాల కోసం,ఇంకా ఇతరత్రా వ్యాపకాల కోసం తిరిగే మహిళలు, లేదా ఇలా సామాజిక సంబంధాలు కలిగిన మహిళలు అంటే ఏదో తప్పు చేసే వాళ్ళే అన్నట్లుగా చెప్పుకోవటం ఈ రోజుల్లో సర్వ సామాన్యంగా మారిపోయింది..దీనికి కారణం కొంతమంది  ఆడవాళ్ళ  ప్రవర్తన  కావచ్చు,కొందరు ఆడవాళ్ళ ప్రవర్తన వలన కొందరికి కొన్ని నష్టాలు కూడా కలిగి ఉండొచ్చు. కానీ అందరూ అలాంటి వాళ్ళే అని,అందరూ తప్పు చేసే వాళ్ళే అన్నట్లుగా మాట్లాడటం మాత్రం తప్పు.. వాక్ స్వాతంత్ర్యం ఉంది కదా అని మాట్లాడితే ఏదో సినిమాలో చిరంజీవి  "నోరా వీపుకి చేటు తేకే" అని అన్నట్లుగా ఉంటుందనేది ఇప్పటికి చాలా విషయాల్లో అర్దమవుతుంది ..

ఏది ఏమైనా చిన్నప్పుడు వక్తృత్వ పోటీల్లో టీవీ,దాని పుట్టు పూర్వోత్తరాలు, దాని వలన కలిగే లాభాలు అలాగే నష్టాలను కంఠతా పట్టి చెప్పినట్లు మన చుట్టూ ఉన్న ప్రపంచంతో ఉన్న " e  " సంబంధాల విషయం లో అయినా ఏ   సంబంధాల విషయంలో అయినా కూడా వాటి   పరిమితులు, లాభ,నష్టాలను ఎప్పుడూ మనసులో ఉంచుకుని, "అతి సర్వత్ర వర్జయేత్"  అన్న విషయం గుర్తుంచుకుని, మన వల్ల  ఇతరుల జీవితాలకు నష్టం కలగకుండా "నొప్పించక తానొవ్వక" అన్నట్లు  మసలుకుంటే  అందరికీ  మంచిదేమో.. మన పరిధులలో మనం ఉంటున్నాం, మన మనసుకు తెలుసు మనం చేసేది మంచా చెడా అనేది అని ఎంత  అనుకున్నా నైతిక విలువలను, ప్రపంచాన్నిదృష్టి లో పెట్టుకుని ప్రవర్తించాల్సిన అవసరం ఆడవాళ్ళైనా, మగవాళ్లైనా అందరికీ  ఉంటుంది...

మాటలకైనా
చేతలకైనా " హద్దులున్నాయి జాగ్రత్త "అన్నది ప్రతి మనిషీ గుర్తుంచుకోవాల్సిన విషయం 




23, జనవరి 2013, బుధవారం

కొత్త సంవత్సరం లో కొత్త కొత్తగా ...



కొత్త సంవత్సరం కొత్త కొత్తగా ...వచ్చేసింది  చిన్న చిన్నగా  పాతపడిపోతుంది కూడా.. కొత్త సంవత్సరం ప్రతి సంవత్సరం వచ్చేదే అయినా ఎప్పుడూ ప్రత్యేకమే, ప్రతిసారీ పండగే. పాత సంవత్సరం వెళ్ళిపోతూ, కొత్త సంవత్సరం వస్తుంది అనగానే ఎంతో ఉత్సాహం, ఎన్నో వేడుకలు ... కొత్త సంవత్సర సంబరాల్లో నాకు బాగా నచ్చేవిషయం రాబోయే సంవత్సరం మంచి చేయాలని  ఒకరికొకరు శుభాకాంక్షలు తెలుపుకోవటం, మనకు,మన వాళ్లకు  ఈ సంవత్సరం ఆనందంగా,శుభంగా ఉండాలని ప్రతి ఒక్కరు కోరుకోవడం చాలా బావుంటుంది. ఒక గతం గడిచిపోయింది, అది కలిగించిన బాధలను, ధుఃఖాలను ఇక్కడే మర్చిపోయి, కొత్త తలపులతో, సరికొత్త ఆశలతో అందమైన భవిష్యత్తు కోసం నూతన సంవత్సరాన్ని ఆనందంగా ఆహ్వానించాం ... 

కొత్తసంవత్సరం లో నాకు ఎక్కువగా నచ్చేది కొత్త డైరీలు,గ్రీటింగులు మనం మన  వాళ్లకి ఇచ్చినా,మనవాళ్ళ నుండి మనం అందుకున్నా చాలా సంతోషంగా అనిపించే వాటిలో ఈ డైరీలు,గ్రీటింగులు ఫస్ట్ ప్లేస్ లో వుంటాయి.న్యూ ఇయర్ వస్తుందనగానే షాపింగ్ లిస్టులోకి ఈ డైరీలు కూడా చేరిపోతాయి. నాకు మాత్రం ప్రతి సంవత్సరం మా తమ్ముడు ఇచ్చే డైరీ,కొత్త పెన్ తోనే  సంవత్సరం మొదలవుతుంది.. ఆస్వాదించిన అనుభూతులను, బాధపెట్టిన చేదు జ్ఞాపకాలను, గడిచిపోయిన కాలాన్ని పదిలంగా దాస్తూ ,రాబోయే కాలానికి ఆహ్వానంగా మంచి డైరీని అందుకోవటం సంతోషంగా అనిపిస్తుంది.కొత్త డైరీ చూడగానే చిన్నప్పుడు స్కూల్ రీఓపెన్ కాగానే కొత్తపుస్తకాలు  కొనుక్కుని,జాగ్రత్తగా అట్టలు వేసుకుని, కొన్నాళ్ళ పాటు భద్రంగా దాచుకునే రోజులు గుర్తొస్తాయి. 

ఇంకా కొత్త సంవత్సరంలో కొత్తగా ఇంట్లో చేరేవాటిలో కేలండర్లు కూడా ముఖ్యమైనవే..ఏ షాప్ కి వెళ్ళినా వాళ్ళ షాప్ పేరుతో  ప్రింట్ చేయించి ఇచ్చే కాలెండర్లు,అలాగే ఈనాడు,సాక్షి,స్వాతి వాళ్ళు ఇచ్చే కాలెండర్లు ఇంట్లో ఎక్కడ చూసినా దర్శనమిస్తుంటాయి.ఒకప్పుడైతే కేలండర్లను గోడలకు తగిలించే వాళ్ళు  కానీ  ఇప్పుడలా కాదు..అవసరమైనప్పుడు తిథిలు, ముహూర్తాలు, పంచాంగం చూడటం కోసం బుక్ రాక్ లో నుండి  వెతికి తెచ్చుకోవటమే..

ఇలా కొత్త సంవత్సరంతో పాటూ చాలా కొత్త కొత్త వస్తువులు,విషయాలు జీవితంలోకి చేరుతుంటాయి.. కాలంతో పాటూ పాతపడుతుంటాయి..ఎప్పటిలాగానే ఈ సంవత్సరం కూడా కొన్ని కొత్త వస్తువులు,కొత్త పనులు,కొత్త బంధాలు,బాధ్యతలు కొత్త సంతోషాలు,కొత్త సమస్యలు,సవాళ్లు ఇలా జీవితం కొత్త కొత్తగా సాగిపోతుంది... 

ఈ సంవత్సరం నా చిన్నిప్రపంచంలో నాకు నచ్చిన కొన్ని కొత్త విశేషాలు...


ఈ కొత్త సంవత్సరం లో సంక్రాంతి అయిపోగానే శ్రీశైలం వెళ్ళటం చాలా సంతోషంగా అనిపించింది. శ్రీశైలం వెళ్ళగానే సాయంత్రం దర్శనం, ఉదయం పూజలు అన్నీ బాగా జరిగాయి.

 శ్రీశైలం లో స్వామివారికి,అమ్మవారికి చేయించిన 
అభిషేకం,కుంకుమ పూజ ప్రసాదాలు..


అక్షరాలై నిలవబోయే అనుభవాలు 
 కొత్త డైరీలు


కాలప్రవాహంలో రోజుల్ని దాటుకుంటూ 
ముందుకు సాగిపోయే కాలెండర్లు 


శ్రీశైలం శిఖరం దగ్గర ఉండే "రాజా షాపింగ్ సెంటర్" మాకు చాలా నచ్చే షాప్.ఇక్కడ అన్ని రకాల హెర్బల్ ప్రొడక్ట్స్ దొరుకుతాయి. పెర్ఫ్యూమ్స్,సోప్స్ ,బ్యూటీ ప్రొడక్ట్స్,మంచి మ్యూజిక్ కలెక్షన్ సి డి లు,పిల్లల ఇంపోర్టెడ్ ఆట వస్తువులు ఇలా ఇక్కడ షాపింగ్ మాకు చాలా ఇష్టం, ఈసారి తీసుకున్న వాటిలో 
వెరైటీ సోప్ బాక్స్ ల్లో ఉన్న బాత్ సోప్స్, 
చామ్ రాజ్ టీ బాక్స్ కొత్తగా అనిపించాయి..


మా బృందావనం లో ఈ కొత్త సంవత్సరం కొత్తగా 
పూచిన పువ్వులు,కాయలు..





14, జనవరి 2013, సోమవారం

సంక్రాంతి శుభాకాంక్షలు..



భోగి భోగ భాగ్యాలతో
సంక్రాంతి సిరి సంపదలతో
కనుము కలసిమెలసి కనువిందుగా
సంక్రాంతి  పండుగ  సంబరాన్ని
జరుపుకోవాలని కోరుకుంటూ
అందరికీ సంక్రాంతి శుభాకాంక్షలు ...


ముద్దబంతులు, మువ్వమోతలు, నట్టింట కాలు పెట్టు పాడిపంటలు
వెండి ముగ్గులు, పైడి కాంతులు,పుట్టింట దీపమెట్టు ఆడపడుచులు
కలబోసి విరబూసే మహదండిగా మది నిండగా తొలి పండగే సంక్రాంతి.

అందరికీ సంక్రాంతి శుభాకాంక్షలు



13, జనవరి 2013, ఆదివారం

భోగి పండుగ శుభాకాంక్షలు...





ఆకాశంలోని చుక్కల్ని నేలకి దించి దిద్దే అందమైన రంగవల్లికలు
హరినామ సంకీర్తన చేస్తూ అలరించే హరిదాసులు 
ఇంటిల్లపాదికీ దీవెనలందిస్తూ విన్యాసాలు చేసే గంగిరెద్దులు 
ఇష్టమైన పిండివంటల  ఘుమఘుమలతో 

సంక్రాంతి లక్ష్మికి ఆహ్వానం  పలుకుతూ.. 
ప్రతి ఇంటా సిరులు పండాలని,
భోగభాగ్యాలతో అందరూ సంతోషంగా ఉండాలని కోరుకుంటూ..

అందరికీ భోగిపండుగ శుభాకాంక్షలు..






11, జనవరి 2013, శుక్రవారం

సంక్రాంతి సంబరాలు -- మా ఊరి ముగ్గుల పోటీలు





సంక్రాంతి రాకముందే మొదలైన సంక్రాంతి సంబరాలు అందరినీ బిజీ బిజీ చేసేసాయి.సంక్రాతి పండగ అంటేనే ముగ్గుల పండగ కదా అందుకే అందరూ ఆడవాళ్ళకి ముగ్గుల పోటీలు పెట్టటంలో పోటీ పడుతున్నారు. ఆడవాళ్ళు కొంతమంది నిజంగానే పోటీపడుతూ వాళ్ళ ముగ్గుకే మొదటి బహుమతి రావాలంటూ ముగ్గులు వేస్తే  మరికొందరు మాత్రం కనీసం పార్టిసిపేట్ చేసినందుకైనా ఇచ్చే   గిఫ్ట్ కోసం ముగ్గులు వేశారు.

అలాగే ఈ సంవత్సరం ముగ్గుల పోటీల్లో మహిళలు నిర్భయకు నివాళిగా, ఆమెకు న్యాయం జరగాలని, కరెంట్ సమస్యలు,తెలుగు భాషాభిమానం వంటి సంగతులను ముగ్గులో ప్రస్తావించారు...ఇవీ నిన్న జరిగిన ముగ్గుల పోటీలో కొన్ని విశేషాలు.. నాకు నచ్చిన కొన్ని ముగ్గులు..















Related Posts Plugin for WordPress, Blogger...