వినాయకా నీకే మా మొదటి ప్రణామం ..!

వక్రతుండ మహాకాయ కోటిసూర్య సమప్రభా
నిర్విఘ్నం కురుమేదేవ సర్వకార్యేషు సర్వదా...

గజాననం భూత గణాధిసేవితం
కపిత్థ జంబు ఫలసార భక్షితం
ఉమాసుతం శోక వినాశ కారణం
నమామి విఘ్నేశ్వర పాద పంకజం!


మూషిక వాహన మోదక హస్తా
చామర కర్ణ విలంబిత సూత్రా
వామనరూప మహేశ్వరపుత్రా
విఘ్నవినాయక పాద నమస్తే !

తొలి పూజలందుకుని,విఘ్నాలను తొలగించే గణపతి
అందరినీ తన కరుణాకటాక్ష వీక్షణములతో కాపాడి,
ఆయురారోగ్య అష్టైశ్వర్యములతో దీవించాలని ప్రార్ధిస్తూ...

అందరికీ వినాయక చవితి శుభాకాంక్షలు

మన జీవితం...!

రోజులు,గంటలు,నిమిషాలు,క్షణాలంటూ

కాలం కొలతల్లో బంధించిన మన జీవితం
ఆగకుండా కదిలే కాలచక్రంతో పోటీ పెట్టుకున్న
ఉరుకులు పరుగుల పరుగుపందెం...

పరుగుపందెంలో అలసి,ఆగిపోతున్న
అనుభూతులు, అనుబంధాలు,ఆప్యాయతలు
ఎంతగా అలసిపోయినా సేదతీరేందుకు సమయం లేదు!

ప్రతి మనిషికి ముందు చూపే
తన చుట్టుపక్కల ప్రపంచం ఏమైపోతుందో
తెలుసుకోవాల్సిన అవసరం, అవకాశం లేదు!

జీవిత ప్రయాణంలో ఎదురయ్యే పరీక్షలకు
సమాధానాలు వెతకటమే తప్ప
ఈ ప్రయాణం సరైనదేనా అని సమీక్షంచుకునే
సందర్భం కూడా రాదు!

జీవితపు బరిలో బంధువులు,స్నేహితులే మన ప్రత్యర్ధులు
అందరూ అయినవారే ... అయినా ఎవరికి వారే పోటీ
ఒకరికంటే నేను బాగుండాలనే ఈ తాపత్రయంలో
గెలుపు,ఓటములు ... లాభ నష్టాల కూడికలు తీసివేతలే ఈ జీవితం!

ఉన్నది లేదనుకుని ... లేనిది కావాలనుకుని
ఏదో సాధించాలనుకుని ... ఎక్కడికో చేరాలనుకునే
ఈ ఆశలు,ఆశయాల పరుగు
ఎక్కడికో ?? ఎందాకనో ???