Digital India - అందరికీ సోషల్ మీడియా ( * ఫేస్ బుక్ )

సోషల్ మీడియా.. ఓ సంచలనం.ప్రపంచాన్ని అత్యంత ప్రభావితం చేసి,సమాచార మార్పిడిలో విప్లవాత్మక మార్పులకు దారి తీసిన మాధ్యమం.ప్రస్తుత డిజిటల్ యుగంలో సోషల్ మీడియా రోజువారి జీవితంలో కీలక సాధనం.సమాచార మార్పిడితో  మొదలై భావ ప్రకటన స్వేచ్ఛకు ఆయుధంగా మారుతోంది.ఒకప్పుడు ఇంటర్నెట్ అంటే చాలా ఖర్చుతో, జ్ఞానంతో కూడిన పని. జి మెయిల్ కానీ, అప్పట్లో కొత్తగా వచ్చిన ఆర్కుట్ లో అకౌంట్ కానీ ఉండాలంటే ఇంట్లో సొంత కంప్యూటర్, నెట్ కనెక్షన్ ఉండాలి లేకపోతే ఇంటర్నెట్ సెంటర్ కి వెళ్ళాల్సి వచ్చేది.. కానీ ఇప్పుడు.. చేతిలో వెయ్యిరూపాయల చైనా ఫోన్,పది రూపాయల నెట్ కార్డ్ ఉంటే చాలు ఎవరైనా నెట్ వినియోగదారుడు కావచ్చు.అమెరికాలో కన్నా భారతదేశంలోనే ఇంటర్నెట్ ఉపయోగించే వారు ఎక్కువగా వుంటున్నారట..

అందరికీ అనుకూలంగా, సులభంగా అందుబాటులో ఉండే సోషల్ మీడియాల్లో  ముఖ్యంగా ఫేస్ బుక్ ఒకటని చెప్పొచ్చు.ఈ ఫేస్ బుక్ వాడటానికి పెద్దగా సొంత తెలివి తేటలు కూడా అవసరం లేదు.ఎవరో ఒక మహానుభావుడో, మహానుభావురాలో చెప్పిన  సూక్తులు,నీతులు కాపీ కొట్టి కొటేషన్స్ తయారుచేస్తారు.వాటిని తెచ్చి మన ఫేస్ బుక్ గోడమీద పిడకల్లా అతికిస్తే చాలు.ఆ సూక్తులు,నీతులు మనం పాటిస్తామా లేదా అని ఎవరు చూడొచ్చారు?మనకెలాగూ మన  అభిప్రాయాలను స్వేఛ్చగా ప్రకటించే హక్కు ఉంది కాబట్టి ఎవరి గురించైనా ఏమైనా మాట్లాడొచ్చు,మన ఇష్టమొచ్చినట్లుగా వాక్ స్వాతంత్య్రాన్ని నిలబెట్టుకోవచ్చు.

ఫేస్ బుక్ పరిచయాలు,ఫ్రెండ్ షిప్పుల కోసమేమో కానీ మనుషుల మధ్య సంబంధ బాంధవ్యాలని దెబ్బతీయటానికి కూడా కారణమవుతుంది.ఈ మధ్య సంసారంలో గొడవలతో కౌన్సిలింగ్ కి వస్తున్న జంటల్లో  గొడవలకి ఒక కారణం ఫేస్ బుక్ కూడానట.నా భర్తకి ఫేస్ బుక్ లో ఆడఫ్రెండ్స్ ఉన్నారు. వాళ్ళు ఈయన గారిని మెచ్చుకుంటూ కామెంట్లు ,లైకులు అవి చూస్తే నాకు ఒళ్ళు మండుతుంది అని భార్య అంటే, నన్నంటున్నావు,నీ ఫేస్ బుక్ లో మాత్రం మగ ఫ్రెండ్స్ లేరా? వాళ్ళు నిన్ను మెచ్చుకుంటూ కామెంట్స్ ఇవ్వట్లేదా.. నీ మగ ఫ్రెండ్స్ ఎవరెవరు ఉన్నారో నాకు కనపడకుండా హైడ్ కూడా చేశావు కదా .. ఏ తప్పు చేయకపోతే అంత  రహస్యం ఎందుకు? అని భర్త వాదన.లైకులు ,కామెంట్లు చేసిన భర్త ఆడఫ్రెండ్స్,భార్య మగ ఫ్రెండ్స్ తో అక్రమసంబంధాలు కూడా ఉన్నాయంటూ వీధులకి, కోర్టులకి ఎక్కుతున్న జంటలు కూడా ప్రస్తుతం కనపడుతున్నారు.ఇది కూడా సోషల్ మీడియా ప్రభావమేననీ,ఇలాంటి పరిస్థితుల్లో చక్కగా సంసారం చేసుకుంటున్న జంటలు ఈ ఫేస్ బుక్,వాట్స్ యాప్ లాంటి వాటికి కొంచెం దూరంగా ఉంటే మంచిదని,ఫేస్ బుక్ అకౌంట్ ఏమీ ఆధార కార్డు కాదు కదా అది లేకపోతె రోజెలా గడుస్తుంది అని భయపడటానికి అని మానసిక విశ్లేషకులు,ఫ్యామిలీ కౌన్సెలర్ల అభిప్రాయం.

ఫేస్ బుక్ మరొక ఉపయోగం శత్రువులని ఫాలో అవ్వటం.. ఇంతకుముందు రోజుల్లో మన శత్రువులు ఏమి చేస్తున్నారో ఎక్కడెక్కడికి వెళ్తున్నారో తెలుసుకోవాలంటే చాలా కష్టంగా ఉండేది.వాళ్ళ ఇంటిదగ్గరలోనే వాళ్ళంటే పడని వాళ్ళని  గూఢచారులుగా పెట్టుకుని రహస్యాలు తెలుసుకోవాల్సి వచ్చేది.కానీ ఇప్పుడు ఒక్క ఫేస్ బుక్ అకౌంట్ ఉంటే చాలు ఈ మధ్య ఎలాగూ ప్రతి ఒక్కళ్ళు నిద్రలేచిన దగ్గరి నుండి పడుకునేదాకా ఎక్కడికి వెళ్తున్నారు,ఏమి తింటున్నారు లాంటి విషయాలు చెప్పకపోతే పాపం అన్నట్లు పోస్ట్ చేస్తారు కాబట్టి అన్ని విషయాలు తెలుసుకోవచ్చు...విడిపోయిన భార్యాభర్తలు,స్నేహితులు ఒకరినొకరు సాధించుకోవటానికి కూడా ఫేస్ బుక్ ఉపయోగిస్తున్నారని కొన్ని సర్వేలు చెప్తున్నాయట.నీ నుండి విడిపోయాక నేను ఏడుస్తున్నానుకున్నావా?? అప్పటికన్నా ఇప్పుడు చూడు ఎంత సంతోషంగా ఉన్నానో..!  ఎంత ఉల్లాసంగా ఉన్నానో.. ! అంటూ లేనిపోని సెల్ఫ్ డబ్బాలు కొట్టుకుంటూ ఎదుటివాళ్ళని టీజ్ చేస్తున్నారట.అలాంటి మాజీలని బ్లాక్  చేసేస్తే ప్రశాంతంగా ఉండొచ్చని మానసిక వైద్యుల సలహా.. 

చిన్నప్పుడు వక్తృత్వ పోటీల్లో టీవీ వలన లాభాలు,నష్టాలు లాగా ఈ సోషల్ మీడియా ముఖ్యంగా ఫేస్ బుక్ వలన లాభాల కంటే నష్టాలే ఎక్కువగా ఉంటున్నాయన్నది ఈమధ్య జరుగుతున్న కొన్నివిషయాలు చూస్తే అర్ధమవుతుంది.మనకి తెలిసేవి కొన్నే తెలియకుండా ఇంకా ఏమేమి ఘోరాలు,నేరాలు జరుగున్నాయో ఏమో?? ముక్కు మొహం తెలియని అపరిచితులతో పరిచయాలు,సంబంధాలు పెట్టుకోవటం,వాళ్ళ వలన మోసపోవటం,నష్టపోవటం లాంటి సైబర్ క్రైమ్ శాతం పెరిగిందనేది కూడా కాదనలేని నిజం.ప్రపంచంలో దేన్నైనా మంచికి చెడుకి రెండిటికీ ఉపయోగించొచ్చు.ఎవరు ఏమి చేయాలి,ఎంతవరకు అవసరం  అనేది వారి వారి విజ్ఞతకే తెలుసు కాబట్టి.. అతిసర్వత్ర వర్జయేత్‌ అనే అక్షరసత్యమైన సూక్తిని పాటిస్తే అందరికీ మంచిది.ఈమధ్య కొందరి ఫేస్ బుక్ లు చూస్తుంటే ఫేస్ బుక్ లో ఏమి పోస్ట్ చేయలన్నా,మనల్ని కూడా ఇలాగే అనుకుంటారేమో కదా అని విరక్తి కలుగుతుంది.

 

 

అమరావతి నగర శంకుస్థాపన - వింతలూ .. విశేషాలు

మా నవ్యాంధ్ర రాజధాని అమరావతి నగర శంకుస్థాపన 22 - 10 - 2015 దసరా పండగ రోజున అంగరంగ వైభవంగా  అతిర‌థ మ‌హార‌థుల మ‌ద్య సందడిగా జ‌రిగింది.. శంకుస్థాపన విశేషాలు,విషయాలు అన్నిటి గురించి ఎప్పటికప్పుడు మీడియా అందరికీ తెలియచేస్తూనే ఉంది కాబట్టి నేను కొత్తగా చెప్పేది ఏమీలేదు.ఈ కార్యక్రమం గురించి ఎప్పటి లాగానే కొందరు వ్యతిరేకంగా మాట్లాడితే కొందరు సానుకూలంగా స్పందించటం,అందరికీ మంచి జరగాలని కోరుకోవటం జరిగింది. ముఖ్యమంత్రి చంద్రబాబునాయుడు గారు శంకుస్థాపన కార్యక్రమాన్ని సక్సెస్ చేసి ఈవెంట్ మేనేజర్ గా ok అనిపించుకున్నారు కానీ పాలకుడిగా ఇంత ఘనకార్యాన్ని (రాజధాని నిర్మాణం) ఎలా సాధిస్తారో చూద్దామని కొందరంటే .. తెలివి ఉండాలే కానీ ఇటుకలు అమ్మి కూడా (My Brick My Amaravati) కోట్లు సంపాదించగలం అని ముఖ్యమంత్రి నిరూపిస్తున్నారు అని కొందరు,మోడీగారు ఏదో ఉద్ధరిస్తారు అనుకుంటే మట్టి,యమునా నది నీళ్ళతో సరిపెట్టారని మరికొందరంటున్నారు.ఏదేమైనా మంచి పనికి భగవంతుడి సహకారం ఉంటుంది అంటారు కదా. ఆంధ్రప్రదేశ్ కి రాజధాని త్వరగా నిర్మాణం కావాలని,అంతా మంచి జరగాలని కోరుకుందాము.

 

 

ప్రముఖ శిల్పి రాజీవ్ సేథీ నేతృత్వంలో రాజధాని ప్రాంతంలో నిర్మించే చారిత్రక స్థూపం వద్ద నిక్షిప్తంచేసి ప్రజల ఆశలను,ఆకాంక్షలను,భావోద్వేగాలనుసజీవం చేయాలన్న ఆలోచనతో ప్రతిగ్రామంలోని పవిత్ర ప్రదేశాలనుండి సేకరించిన మట్టి,నీరుతో నిర్మించిన స్థూపం.

 

అమరావతి సంకల్పజ్యోతి 

 

శంకుస్థాపన సభలో ప్రధాన ఆకర్షణ తెలంగాణా ముఖ్యమంత్రి కేసీఆర్ గారు.స్వ‌యంగా అమరావ‌తికి ర‌మ్మంటూ ముఖ్య‌మంత్రి చంద్ర‌బాబు నాయుడు కేసీఆర్ ను ఆహ్వానించారు.ఎప్పుడూ ఒకరిపై ఒకరు విమర్శలతో ద్వేషాన్ని మాటల్లోనే  వెళ్ళగక్కే ఈ నాయకులు ఇలా కలిసిపోవటం ?? రాజకీయాల్లో మామూలే కానీ శంకుస్థాపన సభకు వచ్చిన సామాన్య ప్రజలు కూడా కేసీఆర్ మాట్లాడుతున్నప్పుడు సంతోషంగా చేతులు ఊపుతూ అభివాదం చేయటం మాత్రం అందరికీ కొంచెం ప్రత్యేకంగానే అనిపించింది.చిన్నప్పుడు మా స్కూల్ లో ఎవరైనా స్పెషల్ గెస్ట్ వచ్చినప్పుడు మా టీచర్స్  ముందుగానే "వచ్చిన అతిధి మాట్లాడటం అయిపోగానే వాళ్ళేమి మాట్లాడారో మీకు అర్ధం అయినా కాకపోయినా గట్టిగా చప్పట్లు కొట్టండి అప్పుడే వచ్చిన అతిధుల్ని మనం గౌరవించినట్లు అని " చెప్పేవాళ్ళు. ఇక్కడ కూడా అలాగే ఏమైనా జరిగిందా లేక ఆంధ్రాప్రజలే స్వచ్చందంగా, సంతోషిస్తూ కేసీఆర్ కోసం హర్షధ్వానాలు చేశారా?? అని ఒక చిన్న డౌటు కూడా వచ్చింది.

అమరావతి నిర్మాణానికి, అభివృద్ధికి కోసం అవసరమై అన్ని రకాల సహాయ సహకారాలను తెలంగాణ ప్రభుత్వం అందిస్తుందని కేసీఆర్ అనటం సంతోషించదగిన పరిణామం.కానీ తెలంగాణా ముఖ్యమంత్రి గారూ..  మీరు సహాయం చేసినా, చెయ్యకపోయినా పర్లేదు కానీ "బతుకమ్మ,, బోనాలు పండగలు ఘనంగా చేసుకుంటూ ఆ అమ్మవారి ముందు బాగా నిష్టగా పూజలు చేసి,మమ్మల్ని ఇప్పటిదాకా ఆంద్రోళ్ళు నీపూజల్ని చెయ్యనియ్యలేదమ్మా ,మమ్మల్ని మా భక్తిని ఎగతాళి చేశారమ్మా, ఇప్పుడు మేమొచ్చాకే నీ పూజలు జరిపిస్తున్నాం..వాళ్ళని నువ్వే చూసుకో తల్లీ అని ఆంధ్రా వాళ్ళమీద అమ్మవారికి కంప్లైంట్లు చేయొద్దని కొంచెం మీ రాష్ట్ర మహిళలకు చెప్పండి ప్లీజ్ ..తెలంగాణా మగవారి కంటే ఆడవారికే ఆంధ్రామీద,ఆంధ్ర రాష్ట్ర ప్రజలమీద ఆగ్రహావేశాలు,ఆంధ్రోళ్ళు  తెలంగాణా ప్రజల్ని దోచుకున్నారనే వేదన చాలా ఎక్కువని అనుభవంలో మేము తెలుసుకున్న సత్యం. అయినా లోకాలనేలే ఆ జగన్మాత మనం ఎవరి మీద ఏది చెప్తే అది నమ్మేసి,ఎవర్ని శిక్షించమంటే వాళ్ళని శిక్షిస్తుందా?? అలా చేయటానికి అమ్మవారేమన్నా రిటర్న్ గిఫ్ట్ కోసం మనింటికి పేరంటం వచ్చే పక్కింటావిడ కాదు కదా.. దుష్టశిక్షణ,శిష్ట రక్షణ కోసం అవతరించిన ఆ తల్లికి సర్వం తెలుసు. 

ఈ శంకుస్థాపన లో మాకు మరో విశేషం ,మా మరిదిగారు(మా చెల్లి వాళ్ళాయన) తెలంగాణ నుండి ఆంధ్రాకి రాజధాని డ్యూటీ ఆఫీసర్ గా  రావటం.తెలంగాణా పోలీస్ అంటే ఎప్పుడూ అటువైపే డ్యూటీలు ఉంటాయి,ఆంధ్రాకి రారు కదా అనుకునే వాళ్లము. కానీ ఈసారి తెలంగాణా పోలీస్ లు కూడా ఇక్కడికి  రావటం వలన మా సొంత జిల్లా గుంటూరులో డ్యూటీకి రావటం మాకు ఆశ్చర్యంగా,ఆనందంగా అనిపించింది.ఆవిధంగా మాకుటుంబసభ్యులు కూడా మా ఆంధ్రారాజధాని శంకుస్థాపనలో పాల్గొన్నట్లయింది.

శంకుస్థాపన కార్యక్రమంలో నటుడు సాయికుమార్,గాయని సునీత ఉపద్రష్ట వ్యాఖ్యాతలుగా వ్యవహరించారు.ఆంధ్రప్రదేశ్ రాష్ట్ర గీతమైన, శంకరంబాడి.సుందరాచారి గారి మా తెలుగు తల్లికి మల్లెపూదండ పాటతో కార్యక్రమం మొదలయ్యింది.సునీత పాడిన మా తెలుగు తల్లికి పాటని వింటుంటే ఈమధ్య టీవీల్లో చిన్నపిల్లలు కూడా ఇలా పాడట్లేదే..! కనీసం ఒకసారి ఆ పాట రిహార్సల్స్ అయినా చేసుకుందా అనిపించింది.సునీత పాట పాడేటప్పుడు ఊపిరితీస్తూ,ఆయాస పడుతున్నట్లు పాడుతుందని నా అభిప్రాయం.నేనేదో సునీతని తప్పు పట్టటం లేదు.ఎవర్నైనా వంక పెట్టటం చాలా సులభం,అది తప్పు కూడా.. కానీ ఆంధ్రరాష్ట్ర గీతమైన మా తెలుగు తల్లికి మల్లెపూదండ పాటని రాజధాని ఆరంభ శుభసమయంలో పాడమని బాధ్యత అప్పగిస్తే గాయని సునీత ఆయాసపడుతూ,దాదాపు ఏడుస్తున్నట్లు,నీరసంగా ఆ పాట పాడటం చాలా ఘోరంగా అనిపించింది.పాపం గుంటూరు ఎండ ప్రభావం కూడా కావచ్చేమో .. 

ఈ పాట మిగతా వాళ్ళు ఎలా పాడారా అని యూట్యూబ్ లో వెతికితే  టంగుటూరి సూర్యకుమారి గంభీరమైన గానం ,చక్కని సంగీతంతో దేశభక్తి పాటంటే ఇలాగే ఉండాలి అనిపించేలా ఉంది.ఇక బుల్లెట్ సినిమాలో బాలసుబ్రహ్మణ్యం గారి పాట కూడా ఆయన అన్ని పాటల్లాగే చాలా బాగుంది.బాలు గారి పాట విన్నాక అందుకే అప్పట్లో పాడుతాతీయగాలో పాడటానికి వచ్చిన వాళ్ళని చిన్నతప్పు పాడినా మందలిస్తూ సరిగా పాడమని,వాళ్ళు బాధపడినా సరే తప్పులు,లోపాల్ని ఎత్తిచూపేవారు .కానీ ఇప్పుడు రకరకాల ఛానళ్ళల్లో వస్తున్న సింగింగ్ కాంపిటీషన్స్ లో జడ్జ్ లు పాడేవాళ్ళు ఎలా పాడినా పట్టించుకోకుండా వాళ్ళని మెచ్చుకోవటం,ఆహా వోహో అనటం చూస్తుంటే కింగ్ సినిమాలో బ్రహ్మానందం సీన్స్ గుర్తొస్తున్నాయి.అలాగే కొంతమంది చిన్నపిల్లలు కూడా గొప్ప సింగర్స్ అనిపించుకునే వాళ్ళకంటే కూడా బాగా పాడుతున్నారు.

ముగ్గురు గాయకులు పాడిన ఈ మాతెలుగుతల్లి  పాటలు వింటే  ఎవరెలా పాడారో తెలుస్తుంది.

మా తెలుగు తల్లికి మల్లెపూదండ - టంగుటూరి సూర్యకుమారి 

మా తెలుగుతల్లికి మల్లెపూదండ - S.P. బాలసుబ్రహ్మణ్యం 

మా తెలుగుతల్లికి మల్లెపూదండ - సునీత 
 

అమరావతి శంకుస్థాపన చిత్రాలు

ఏదేమైనా అన్ని ప్రతికూల ఆలోచనలను ప్రస్తుతానికి వదిలేసి,సానుకూల ధోరణితో కొనసాగుతూ
ఆంధ్రప్రదేశ్ రాజధాని అమరావతిని,అందమైన భవిష్యత్తును వేగంగా నిర్మించుకోవాలని కోరుకుంటూ


All The Best - "Amaravati, 

The dream capital of  Andhra Pradesh"

మనుషులు .. మనస్తత్వాలు

 "అత్తా మామలతో మూత్రం తాగిస్తున్న కోడలు"

ఇంతకీ విషయం ఏమిటి అంటే ఇండోర్ కు చెందిన రేఖ నాగవంశి అనే మహిళ 8 ఏళ్ళ క్రితం దీపక్ అనే యువకుడిని పెళ్ళాడి, ఇంట్లో అత్తా మామలతో గొడవల కారణంగా అలిగి భర్తను వదిలేసి వెళ్ళిపోయింది. దీపక్ బతిమాలడంతో కొన్ని షరతుల మీద భర్త లో కలిసి ఉంటుంది. అయినా వారానికి ఒక్కసారి వచ్చి పోయే అత్తమామలను చూసి విసుగు చెందిన రేఖ వారిపై కక్షగట్టి, వారు ఉన్నన్ని రోజులు టీలో మూత్రం కలిపి ఇవ్వడం మొదలెట్టింది.

ఇది ఏడాదిగా జరుగుతూనే ఉంది.ఈ విషయం తెలియని అత్తమామలు నవ్వుతూ టీ ఇస్తున్న కోడల్ని చూసి,ఆహా మా కోడలు మారిపోయిన మనిషి...మాకు ఎంత మర్యాద ఇస్తుంది అని మురిసిపోయారట.ఒకరోజు కోడలు టీపాట్ లో మూత్రం పోస్తూ ఉండటం గమనించిన అత్త, ఇన్ని రోజులు తాము తాగింది కోడలు మూత్రం కలిపిన టీ అని గ్రహించి పోలీసులకు పిర్యాదు చేయడానికి వెళ్ళగా సాక్ష్యాలు లేవని పోలీసులు పిర్యాదును స్వీకరించబోమని చెప్పడంతో కోర్టును ఆశ్రయించే పనిలో పడ్డారు.

దేవుడా ఇలాంటి మనుషులు కూడా ఉంటారా?? నచ్చకపోతే ఎదురెదురుగా తేల్చుకోవాలి లేదా వదిలేసిపోవాలి అంతే కానీ ఇలాంటి నీఛానికి పాల్పడే వాళ్ళు మనుషులేనా అనిపించే  జుగుప్సాకరమైన సంఘటనలు తెలిసినప్పుడు అమ్మో ఇంకెప్పుడైనా ఒకప్పుడు శత్రువులైనా మళ్ళీ ఇప్పుడు బాగా మాట్లాడుతున్నారులే అని ఎవరినీ నమ్మకూడదు బాబోయ్ అనిపిస్తుంది.చెప్పుకోవటానికే ఇంత  అసహ్యకరంగా అనిపిస్తున్న ఈ విషయం అనుభవించిన వాళ్ళ పరిస్థితి ఏమిటో పాపం.

పెద్దలు చెప్పినట్లు ఇంటిదొంగని ఈశ్వరుడైనా పట్టలేడు, బయటి శత్రువులు ఎదురుగా కనపడతారు కానీ మనతో పాటూ ఉంటూ మనకి కీడు చేసే అంతర్గత శత్రువుల్ని ఎవరు మాత్రం ఏమి చేయగలరు వాళ్ళ పాపం పండటానికి ఎదురుచూడటం తప్ప..

మంచి - చెడు - ఆదర్శం - అవార్డులు

 

మంచివాడికి మరొక మంచివాడు ఆదర్శం
దేశానికి మంచి చేయాలనుకునే రాజకీయ నాయకుడికి ఒకప్పటి గొప్ప నాయకుడు ఆదర్శం
మంచిమనసుతో  పేదవాళ్ళకి సేవ చేయాలనుకునే ప్రజాసేవకులకు నిస్వార్ధ సేవకులు ఆదర్శం

 అలాగే ... 

దొంగలకి గజదొంగ ఆదర్శం
చెడ్డవాడికి మహా  చెడ్డవాడు ఆదర్శం
మోసగాడికి మరొక మోసగాడు ఆదర్శం
నీచుడికి అంతకంటే పెద్ద నీచుడు ఆదర్శం
స్వార్ధపరుడికి తనకంటే గొప్ప స్వార్ధపరుడు ఆదర్శం

మనుషులందరికీ  చాలా ఆదర్శాలు ,ఆశయాలు ఉంటాయి. కానీ కొందరికి మాత్రం డబ్బు కోసం, సమాజంలో పేరు ప్రతిష్టలకోసం, తాము చేస్తున్న తప్పులను కప్పిపుచ్చుకోవటం కోసం రాజకీయాలు, ప్రజాసేవలు చేయటం (చేస్తున్నట్లు నటించటం ) మహా ఇష్టం..

రాజకీయాల్లో అవినీతి అందరికీ తెలిసిందే దాని గురించి కొత్తగా మాట్లాడేదేమీ లేదు కానీ ఈ రాజకీయాన్ని మించిన రాజకీయం ఇప్పుడు స్వచ్చంద సంస్థల్లో జరుగుతుంది. ఒకప్పుడు చారిటీస్ అంటే నిస్వార్ధంగా తమకున్నదాన్లోనే పేదలకు సేవ చేస్తూ ఎవరైనా దాతలు ఇచ్చిన వాటిని పేదవారి  బాగోగులకే వినియోగిస్తూ బతికిన ఎందరో సమాజసేవకులని మనం చూశాము..కానీ ఇప్పుడు కొందరు నిరుద్యోగులకి పునరావాస కేంద్రాలుగా,ఈజీ మనీ కోసం, గొప్ప సేవకుడనే పేరు కోసం ఆరాటపడే కొందరు మోసగాళ్ళకి నిలయాలుగా  స్వచ్చంద సంస్థలు తయారయ్యాయి అన్నది వాస్తవం.

అనాధాశ్రమాలు, వృద్ధాశ్రమాలు , మహిళా సమాజాలు ఇలా ఇంకా ఎన్నో లెక్కలేనన్ని సేవాసంస్థలు ప్రస్తుతం ఉన్నాయి. కానీ వీటిలో ఎంతవరకు నిజమైన సేవజరుగుతుంది అన్నది ప్రశ్నార్ధకం. పసిపిల్లల్ని, ముసలివాళ్ళని అడ్డుపెట్టుకుని సొసైటీలో బాగా డబ్బున వాళ్ళ దగ్గరికి వెళ్లి మేము అంతమందిని పోషిస్తున్నాము, ఇంతమందిని ఉద్ధరిస్తున్నాము  అని లెక్కలు  చెప్పి, డొనేషన్స్  తెచ్చుకోవటం, ఆ చందా డబ్బులతో ఆ ఆశ్రమ నిర్వాహకులు పండగ చేసుకోవటం ఇలాంటివన్నీ ఇప్పుడు సర్వ సామన్యమయ్యాయి. ఇలాంటి మోసపూరితమైన సంస్థలని నియంత్రించాల్సిన ప్రభుత్వం, అధికారులు చూసీ చూడనట్లుగా ఉండటం, అవసరమైతే ఈ సేవకులకి వారి అండదండలు అందించటం కూడా పరిపాటే ..

నిన్న మా వూళ్ళో  ఉత్తమసేవా  అవార్డు అనాధ పిల్లలకు "సేవ" చేసిన నిజమైన సేవకులకి కాకుండా ఆశ్రమంలోని అనాధపిల్లలతో ఆయనకీ "సేవ"  చేయించుకోవటం (తలకి హెన్నాలు పెట్టించుకోవటం, వంట చేయించుకుని తినటం, వగైరాలు ) మాత్రమే  కాకుండా, ఆ  పిల్లలతో వేరే వూర్లో ఉన్న అతని కుటుంబ సభ్యులందరికీ ఊడిగం చేయించిన ఒక అనాధ ప్రజా సేవకుడికి రావటం, ఇలాంటి గొప్ప సేవకులు,నాయకులు అందరూ ఒక చోటికి చేరి,  ఉత్తమ సేవా అవార్డులు ఇచ్చి పుచ్చుకోవటం చూస్తే

"నాకు నువ్వు ... నీకు నేను ఒకరికొకరం నువ్వు , నేను" అంటూ
"ఒకే జాతి పక్షులన్నీ ఒకే గూటికి చేరినట్లు"
"దొంగలు దొంగలు ఊళ్లు పంచుకున్నట్లు " 
"సినిమా వాళ్ళు ఉత్తమ నటన అవార్డుల్ని వాళ్ళలో వాళ్ళు పంచున్నట్లు" అనిపించింది.
అయినా ఇలాంటి నిజజీవిత నటుల ముందు పాపం ఆ సినిమా నటులు ఎంతమాత్రం పోటీపడగలరు !!!

కాబట్టి ప్రజాసేవకులూ ఇప్పటి నుండి మీకు మంచి ప్రజాసేవకులు ఆదర్శం కాకూడదు..ఇలాంటి దొంగ సేవకులే ఆదర్శంగా తీసుకుంటే మీకు కూడా వచ్చే సంవత్సరం అయినా ఆ గొప్ప అవకాశం వస్తుందేమో ప్రయత్నించండి.

భగీరధ ప్రయత్నం

 

భగీరధుడి కధ ఏమిటంటే కపిల మహాముని శాపానికి గురైన తాతలకు శాప విమోచనం చేయటానికి  తపస్సుతో గంగమ్మను మెప్పించి,శివుని సహాయం తో గంగను భూమి మీదకి రప్పించి ,పూర్వీకులకు  సద్గతులు ప్రసాదించిన మహా ముని ..

ఏదైనా అసాధ్యమైన పనిని చేయాల్సి వచ్చినప్పుడు , కష్టపడి ఆ పనిని సాధించినప్పుడు అబ్బ భగీరధ ప్రయత్నం చేయాల్సి వచ్చింది  అంటుంటాము..ఇంతకీ ఈ భగీరధుడి సంగతి అప్పుడప్పుడూ విన్నా పదవ తరగతి దాకా అర్ధం కాలేదు ఈయన సంగతి ..  పదవ తరగతి తెలుగు బుక్ లో ఈ కధ గురించి మా అన్నమ్మ టీచర్ వర్ణించి,వర్ణించి చెప్తుంటే పాఠం అలా మనసులో గుర్తుండిపోయింది .. ఈ పాఠం చెప్తూ మా టీచర్ విద్యార్ధి జీవితం లో ఈ పదవ తరగతి ఎంతో ప్రాముఖ్యం కలిగి ఉన్నదనీ, అందుకే ఈ సంవత్సరం ఈ పాఠం మొదటి పాఠంగా ఉందనీ మీరు కూడా ఆయన లాగనే ప్రయత్నించి గట్టెక్కాలనీ చెప్పేవాళ్ళు.. ఇప్పట్లో ఇన్స్పిరేషన్ పాటలు,పుస్తకాలు చదివితే ఎంత ఉత్తేజం, ఉత్సాహం కలిగి ,వెంటనే ఫేస్ బుక్ లోనూ,బ్లాగుల్లోనూ మనం కూడా అందరినీ  మన శాయశక్తులా ఎలాగ  ప్రోత్సహిస్తామో  అప్పట్లో మా  టీచర్ మాటలు మాకలా అనిపించేవి .. మొత్తానికి ఎక్కువ భగీరధ ప్రయత్నం చేయకుండానే చదువు గట్టెక్కామనుకోండి...


ఇప్పుడింతకీ భగీరధుడు ఎందుకు గుర్తొచ్చాడంటే జూన్ నెలలోనే వస్తాయనుకున్న వర్షాలు ఇంతవరకు కనపడలేదు.  అప్పుడప్పుడు చిన్న జల్లులు పడినా అది వర్షం కింద లెక్క కాదు . ఇప్పటికే రైతులు వర్షం పడుతుందా లేదా అని ఎదురు చూస్తున్నారు . రైతుల సాగు నీరేమో కానీ మన కి తాగు నీరైనా దొరుకుతుందా లేదా అని భయం పట్టుకుంది..   ఒకప్పుడు మా వూర్లో నీళ్ళు ఎప్పుడన్నా ఇబ్బంది ఐతే ఛీ ఛీ ఈ వూర్లో నీళ్ళే రావు అదే సిటీ లో నీళ్ళకి ఇబ్బందే వుండదట  అనుకునే వాళ్లము .. కానీ ఇప్పుడు సిటీల్లో పరిస్థితి చూస్తుంటే మా ఊరిని మేము ఎంతగా అవమానించామో గుర్తొచ్చింది నాకు,మా చెల్లికి ...

మా వూర్లో  నయం నీళ్ళు రాకపోతే పనమ్మాయి పక్కన వుండే బోరింగ్ దగ్గరికి వెళ్లి నీళ్ళు  మోసుకొచ్చి మరీ ఇంట్లో పని చేసి వెళ్ళేది .. కానీ ఇప్పుడు నీళ్ళు  లేకపోతే నేనేమి చెయ్యనమ్మా అంటూ "అహా ఇవాళ పని తప్పింది" అనుకుంటూ హాపీగా వెళ్ళిపోతుంది పనమ్మాయి.. నాకు చూస్తే నీళ్ళు రాకూదదు దేవుడా నాకు హాయిగా వుందని అనుకుంటుందో ఏమో మనసులో అనిపిస్తుంది.. ఛా .. ఐనా అలా మాట్లాడకూడదులె పని వాళ్ళు కూడా మన లాంటి మనుషులే కదా పాపం  ..

వర్షాలు లేక బోర్ లో నీళ్ళు రావట్లేదమ్మా నేనేమి చేయను వచ్చినప్పుడే డబ్బాల్లో పట్టుకోండి అని ఒక వాచ్ మెన్ అంటే .. నీళ్ళు టాంక్ లతో తెప్పించి పోస్తున్నాం సార్ .. అందుకే మైంటెనెన్స్ ఎక్కువ ఇవ్వండి ఈ నెలలో అంటూ మరొక వాచ్ మెన్ ... ఇంక కరెంట్ సంగతి చెప్పాల్సిన అవసరం లేదు .. ఇన్ని సమస్యలు ఎలా తీరాలిరా దేవుడా అనుకుంటుంటే ఇవాళ ఈనాడు పేపర్ లో అనుకుంటాను ఒక స్వామీజీ చంద్రబాబు నాయుడు గారి ప్రభుత్వం లో వర్షాలు పడవు అని మరొక బాంబు పేల్చారు ..

అప్పుడు ఎందుకో నాకు భగీరధుడు గుర్తొచ్చాడు..  ఏమిటో అప్పుడు ఆయన తన పూర్వీకుల కోసం పట్టుదల, కఠోర శ్రమలతో తపస్సు చేసి గంగను భూమి మీదకి తెచ్చాడు.. ఇప్పుడు మనకోసం ఎవరు అలా చేస్తారబ్బా అనిపించింది.. ఐతే ఆశ్చర్యం అనిపించేలా సాయంత్రం కల్లా  గుంటూరు ,హైదరాబాద్ రెండు చోట్లా సుమారు రెండు గంటలు పెద్ద వర్షమే పడింది .. మొత్తానికి ఎండలకి  మండిపోతున్న వాతావరణం కొంచెం చల్లబడింది.  
 
ఇవాళ నాకనిపించింది వర్షాల కోసం ఘటాభిషేకాలు ఇంకా ఏవో పూజలతో పాటూ అందరం ఆ భగీరధుడిని కూడా తలచుకుంటే బాగుంటుంది కదా అని 

కనపడని ఆ నాలుగో సింహం??

"కనిపించే మూడు సింహాలు ధర్మం, చట్టం, న్యాయానికి ప్రతిరూపాలయితే కనపడని నాలుగో సింహమేరా ఈ పోలీస్" 

ఇదేదో  సినిమాలో డైలాగ్ ... చాలా సినిమాల్లో రాజశేఖర్, సాయికుమార్ లు నిజమైన పోలీస్ అంటే ఇలాగ వుండాలి అనే ఒక భావాన్ని కలిగించే వాళ్ళు. కానీ చెడు పట్ల అంత  ఆవేశంగా, నిజాయితీగా వుండే అధికారి నిజజీవితంలో వున్నారా,ఒక వేళ  వున్నా వాళ్ళు చేయాలనుకునే సేవ చేయగలరా అనేది  ఈ సమాజంలో అందరికీ బాగానే  తెలిసి ఉంటుంది.  ... 

పోలీస్ డిపార్ట్ మెంట్ లో ఏ  స్థాయి అయినా సరే నేను పోలీసుని అని సగర్వగా చెప్పుకునేది  పోలీస్ సర్వీస్ ... కఠిన శ్రమతో,శిక్షణతో  ఉద్యోగం సాధించి ,ఎల్లప్పుడూ ప్రజా శ్రేయస్సు కోసం,శాంతి భద్రతల పరిరక్షణ కోసం పాటు పడతానని ప్రమాణం చేసి వృత్తిలోకి ప్రవేశించే  పోలీసుల్లో కొందరు ఉద్యోగంలో చేరి,అధికారం,డబ్బు చేతికి రాగానే చేసిన ప్రమాణాలను మర్చి పోయి అవినీతిపరులతో చేతులు కలుపుతున్నారు .. 

అధికారం,సంపాదనే ప్రధాన లక్ష్యంగా పోలీస్ సర్వీస్ ప్రతిష్టకే మాయని మచ్చగా మిగులుతున్నారు.. కొంతమంది ఇలాంటి వాళ్ళ కారణంగా మొత్తం పోలీసులంతా ఇంతే అనే అభిప్రాయానికి ప్రజలు వచ్చేలా చేస్తున్నారు .. 'కానిస్టేబుల్' నుండి  'ఐ.పి.ఎస్' వరకు ప్రతి ఒక్కళ్ళు అవినీతి, లంచాలు, నేరస్తులను ప్రోత్సహించటం,బినామీ ఆస్తులను పెంచుకోవటం ఇలాగ ఏదో ఒక వివాదంలో వున్నారంటే వ్యవస్థ పరిస్థితి అర్ధం అవుతుంది .. 

మొత్తం అందరు పోలీసులు  ఇలాగే వున్నారన్నది నా అభిప్రాయం కాదు .. 

అధికారాన్ని అడ్డం పెట్టుకుని ఆడపిల్లని మోసం చేసి,ఉద్యోగం పోగొట్టుకున్న  ఒక S .I , కష్టం తీర్చమని  స్టేషన్ కి వెళ్ళిన ఆడవాళ్ళతో తప్పుగా ప్రవర్తించి టీవీలలో  దర్శనమిచ్చే కొందరు రక్షకభటులు, అలాంటి వారి గురించి మాత్రమే నా ఈ అభిప్రాయాలు ... 

మేము ఈ సమాజానికి సేవ చేయటానికే ఈ సర్వీస్ లోకి వచ్చాము కానీ మేము అనుకున్నట్లు చేయలేకపోవటానికి  మా కారణాలు మాకు ఉన్నాయి అని బాధపడే కొంతమంది నిజాయితీ కలిగిన పోలీసులు కూడా డిపార్ట్ మెంట్ లో లేకపోలేదు. 

ఈ మధ్య వచ్చిన రేసుగుర్రం సినిమాలో అవినీతిని ఎదుర్కున్న పోలీస్ పాత్రను చూస్తె నిజమైన పోలీస్ అంటే ఇలా వుండాలి అనిపించింది .. 

పోలీసులు,రాజకీయ నాయకుల అవినీతి నేపధ్యం లో అల్లు అర్జున్ కథానాయకుడిగా లక్కీ ది రేసర్   కధ  విషయాని వస్తే .. 

రాము(శ్యామ్ ),లక్కీ( అల్లు అర్జున్) అన్నదమ్ములు..  రాము బుద్ధిమంతుడు,మంచివాడు, లక్కీ ఆకతాయి, అల్లరి పిడుగు .. రాము పద్ధతులు,విలువలు పాటిస్తే లక్కీ నా మనసు చెప్పిందే చేస్తా అంటాడు .. పెద్దయ్యాక రాము పోలీస్ శాఖలో అసిస్టంట్ కమిషనర్ అయితే లక్కీ అమెరికాకి వెళ్ళాలని ప్రయత్నిస్తూ ఉంటాడు .. ఒకప్పుడు తన ప్రేమను చెడగొట్టాడని లక్కీ ప్రేమించిన స్పందన నాన్నకి లక్కీ గురించి తప్పుగా చెప్తాడు రాము . 

అన్న మీద కోపంతో  శివారెడ్డి అనే రాజకీయ నాయకుడి అవినీతిని బయట పెట్టాలన్న అన్న ప్రయత్నాన్ని చెడగొట్టి జరిగిన తప్పు తెలుసుకుని తన తప్పుని తనే సరి చేసి, ఒక అవినీతి పరుడైన రాజకీయ నాయకుడి రహస్యాలను బయటపెట్టి,  తెలివిగా మోసగాళ్ళ ఆట కట్టించిన లక్కీ కధే 
ఈ రేసుగుర్రం ... 

సినిమాలో ఎప్పటిలాగే అల్లు అర్జున్ అల్లరి బాగుంది ... నిజాయితీగా ఉండే   పోలీస్ ఆఫీసర్ గా శ్యామ్  నటన బాగుంది ,రాము,లక్కీ అన్నదమ్ములుగా చక్కగా సరిపోయారు .. 

ఉత్తమ అధికారి కిల్ బిల్ పాండే గా  బ్రహ్మానందం నటన బాగుంది :)


కధలో కొత్తదనం,  ట్విస్ట్ లు లేకపోయినా రెండుగంటల పాటు సరదాగా చూడదగిన  సినిమాగా  బాగానే ఉంది .. వాస్తవానికి  దూరంగా వుంది అనుకున్నా సినిమా అంటేనే ఊహా ప్రపంచం కదా... ఇలాంటి సాహసాలు మనం చేయలేకపోయినా హీరో చేస్తే చూసి సంతోషించటం, సినిమాలోనైనా  చివరకు మంచే గెలవాలని కోరుకోవటం సగటు ప్రేక్షకుడికి  అదో సంతోషం ... 

మొత్తానికి   రేసుగుర్రం సినిమా నిజాయితీ కలిగిన పోలీస్ అధికారులు, ప్రజా క్షేమం కోరుకునే ప్రభుత్వం ఈ సమాజానికి  ఎంత అవసరమో గుర్తుచేస్తుంది.    
మనసుంటే మార్గముంటుంది ... మంచి చేయటానికైనా చెడు చేయటానికైనా 

మీరైతే ఏం చేస్తారు???

నిన్న "వనజవనమాలి" గారు "మాంగల్యం తంతునానేనా" మంత్రం ఒక అలకారప్రాయంగా మారిపోయిందని, చిన్న విషయాలకే విడాకుల దాకా పోతున్న మన వివాహ వ్యవస్థను గురించి  చక్కని పోస్ట్  రాశారు.. అది చదివిన తర్వాత  నాకు కూడా ఈ మధ్యే ఎదురయిన ఒక సమస్యను
ఇక్కడ చెప్పాలనిపించింది

వివాహ బంధం పవిత్రమైన ఒక ప్రమాణం .. " నిన్ను నేను ఎప్పటికీ నీడలా కాపాడతానని భర్త,నీ వెంట నడిచి నీ అడుగులో అడుగవుతాను " అని 
భార్య ఒకరికొకరు చేసుకునే బాసలే పెళ్ళికి ఆరంభం.. 
కానీ ఆ పెళ్ళే ఒక అబద్ధం తో మొదలైతే అప్పుడు పరిస్థితి ఏమిటి??


ఇది ఈ మధ్యే జరుగుతున్న ఓక కేస్ కి సంబంధించిన వివరాలు :

ఈ కేస్ లో జంటకి  2008 లో ఎంగేజ్ మెంట్ అయ్యింది.ఎంగేజ్ మెంట్ రోజు అతని తల్లిదండ్రులు, బంధువులు అందరూ వచ్చి దగ్గరుండి జరిపించారు.. తర్వాత లగ్న పత్రిక రోజున ఒప్పుకున్న కట్నం లో కొంత ఇచ్చి లగ్నపత్రిక రాసుకున్నారు.ఆ లగ్నపత్రిక రాసుకునే రోజు పెళ్ళికొడుకు తండ్రి మీరిచ్చిన కట్నం మాకు సరిపోదు పెళ్లి ఖర్చుల కోసం మరో లక్ష రూపాయలు ఇవ్వమని అడిగారు.దానికి అమ్మాయి తరపు వాళ్ళు మేము ఇవ్వలేము ఇప్పటికి ఒప్పుకున్న వరకు మాత్రమే ఇస్తామని అన్నారు.అప్పుడు పెళ్ళికొడుకు తండ్రి అంత గతిలేని వాళ్ళు ఎందుకు మీకు ఈ సంబంధం అంటూ తిట్టి అవమానకరంగా మాట్లాడారు... పెద్దలు సర్దిచెప్పి లగ్నపత్రిక రాయించుకున్నారు.

పెళ్లిరోజు నాటికి అమ్మాయి వాళ్ళు ఎంత ఎదురుచూసినా,ఫోన్ లు చేసినా ఇదిగో వస్తున్నాము అదిగో వస్తున్నాము అంటూ మాట్లాడుతూనే తీరా పెళ్ళి సమయం మించి పోయిన తర్వాత పెళ్ళికొడుకు ఒక్కడే వచ్చి,మీరు మా నాన అడిగిన డబ్బులు ఇస్తామని ఒప్పుకోకుండా గొడవపడ్డారు అందుకనే మా వాళ్లకి ఈ పెళ్లి ఇష్టం లేక రాలేదు. మీకు అభ్యంతరం లేకపోతె నేను మీ అమ్మాయిని పెళ్లి చేసుకుంటాను. నా జాబ్ నాకుంది మీ అమ్మాయిని నేను జాగ్రత్తగా చూసుకుంటాను అని పెద్దమనుషులను అడిగాడు. బంధువులందరూ వచ్చి ఉన్నారు.  ఎలాగూ పెళ్ళికొడుకు మంచి వ్యక్తిలాగానే ఉన్నాడు.. మంచి ఉద్యోగం చేస్తున్నాడు. సమస్య ఏముందిలే అని పెద్దమనుషులు నచ్చచెప్పటం తో గత్యంతరం లేని పరిస్థితుల్లో ఆ పెళ్లి జరిగిపోయింది.

ఎన్నిసార్లు వీళ్ళిద్దరూ అబ్బాయి తల్లిదండ్రులతో మాట్లాడాలని ప్రయత్నించినా వాళ్ళు మాట్లాడలేదు... రెండు నెలలు భార్యా,భర్త ఇద్దరూ అబ్బాయి పని చేస్తున్న దగ్గర కలిసి ఉన్నారు.రెండు నెలల తర్వాత అబ్బాయి వాళ్ళ అన్నయ్య వీళ్ళ ఇంటికి వచ్చాడు. పెళ్లి జరిగిన కొన్నాళ్ళ వరకు తన తల్లిదండ్రులు మాట్లాడటం లేదు, తన దగ్గరికి రావటం లేదు అన్న బాధలో వున్న భర్త తన అన్నయ్య రాకతో సంతోషించాడు అలాగే ఈ అమ్మాయి కూడా.. ఇక అప్పటి నుండి ఆ అబ్బాయి తల్లిదండ్రులు, అక్కలు,అమ్మమ్మతాతయ్య,పిన్ని ఇలా అందరూ ఆ అబ్బాయికి ఫోన్ లు చేసి మాట్లాడటం మొదలు పెట్టారు. కానీ ఈ అమ్మాయికి మాత్రం అత్తింటి వారు ఎవరూ ఫోన్ చేయరు,మాట్లాడరు.. కోడలిగా వాళ్ళు అంగీకరించలేదు. దీనికి తోడూ భర్త లో కూడా ఈ అమ్మాయి వలన నావాళ్ళు నాకు దూరమయ్యారు  అన్న ఆలోచన మొదలయ్యింది. 

అతని బంధువులు ఎవరు ఫోన్ చేసినా,ముఖ్యంగా వాళ్ళ అన్నయ్య ఫోన్ చేసి చెప్పే మాట "నువ్వు జాగ్రత్త ఆ అమ్మాయి నీ డబ్బు కోసం ఆస్తి కోసం మేము రాకపోయినా నిన్ను పెళ్లి చేసుకుంది. వాళ్ళు గతిలేని వాళ్ళు " ఆ అమ్మాయి, తన తరపు వాళ్ళు నిన్ను ఏమైనా చేస్తారు వాళ్ళ దగ్గరికి నువ్వు వెళ్ళకు, వాళ్ళను నీ ఇంటికి రానివ్వకు అని చెప్పేవాళ్ళు. ఇవే ,మాటలను అతను భార్యను అంటూ నీ వాళ్ళు రావద్దు అంటూ,నువ్వు నా డబ్బు కోసమే మా వాళ్ళు రాకపోయినా నన్ను పెళ్లి చేసుకున్నావు అనటం, మా వాళ్ళు నీ వల్లనే నాకు దూరమయ్యారు లేకపోతె వాళ్లకి నేనంటే చాలా ప్రేమ అంటూ ఈ అమ్మాయిని,తన తరపు వాళ్ళని అనుక్షణం మాటలతో హింసించేవాడు. కొన్నాళ్ళకి నేను మా అన్నయ్య దగ్గర ఉండి జాబ్ చేస్తాను అక్కడే ఉందాము అనటం మొదలు పెట్టాడు. ఇలా గొడవలు పడుతూ ఈ అమ్మాయిని వదిలేసి వెళ్ళిపోయి వాళ్ళ అమ్మ నాన్న ల దగ్గర కూర్చుని ఈ అమ్మాయిని అక్కడికి రమ్మన్నాడు సరేనని ఆ అమ్మాయి అత్తగారింటికి  వెళ్ళింది. 

అక్కడికి వెళ్ళిన అమ్మాయిని తన వాళ్ళ ముందే ఇష్టమొచ్చినట్లు తిట్టి,కొట్టి నాకు మరో 10 లక్షలు కట్నం తీసుకుని వస్తేనే రా అంటూ అందరూ కలిసి బయటికి గెంటేసారు.. ఇదేమని వాళ్ళ పెద్దల్ని అమ్మాయి పెద్దలు అడిగితె "మీతో మాకు సంబందం లేదు మేము పెళ్ళికి రాలేదు" ఇదే వాళ్ళ సమాధానం.ఇలా రెండు సంవత్సరాల పాటూ ఈ అమ్మాయిని పుట్టింట్లోనే వదిలేసి అతను ఎక్కడ ఉన్నాడో చెప్పకుండా అతను, అతని తరపు బంధువులు ఆ అమ్మాయిని పట్టించుకోకుండా వదిలేసారు. పోలీస్ కేస్ పెట్టినా ప్రయోజనం లేదు, పెళ్ళికి వాళ్ళు ఎవరూ రాలేదు కాబట్టి వాళ్ళను మేము అరెస్ట్ చేయము అతనెక్కడో వాళ్లకి తెలియదట అని పోలీసుల సమాధానం. 

అప్పుడు ఆ అమ్మాయి తన భర్త ఆచూకీ కోసం హ్యూమన్ రైట్స్ కమిషన్ ను  ఆశ్రయించింది. అప్పుడు 498 కేస్ నమోదు చేసారు పోలీసులు. తమ్ముడ్ని ప్రోత్సహించి గొడవలు పెట్టి ,అతన్ని దాచిపెట్టిన అభియోగం కింద ఎంక్వైరీ కి వచ్చిన అతని అన్న చెప్పిన సమాధానం మా తమ్ముడు గత పది సంవత్సరాలుగా మానసిక వ్యాధితో బాధపడుతున్నాడు. ఆ ట్రీట్మెంట్ కోసం నేనే నా తమ్ముడిని హాస్పిటల్ లో ఉంచాను ఆ అమ్మాయి కి మేము కావాలనే చెప్పలేదు  అని చెప్పాడు.

ఇప్పటికి అతని అన్నని, నాన్నని అరెస్ట్ చేసిన పోలీసులు అసలు నిందితుడు భర్తని మాత్రం మొన్నటిదాకా మానసిక వ్యాధి కోసం ట్రీట్ మెంట్ తీసుకున్నాడు. ప్రస్తుతం ఎక్కడ ఉన్నాడో తెలియదు అని కేస్ పెండింగ్ లో పెట్టారు... 

 చట్టం ,న్యాయం ఆ అమ్మాయికి పరిష్కారం కల్పించే సంగతి ఎలా ఉన్నా నైతికంగా ఆలోచిస్తే ఈ విషయంలో తప్పు ఎవరిది ??

కొడుకు గత పది సంవత్సరాలుగా పిచ్చివాడు అని తెలిసి కూడా ఎంగేజ్ మెంట్ చేసి, కట్నం తీసుకుని, పెళ్ళికి రాకుండా తప్పుకోవటం మోసం కాదా ??
 
 పెళ్లి జరిగిన క్షణం నుండీ అతనికి నెగటివ్ ఫెలింగ్స్ కలుగచేసి భార్యా,భర్త విడిపోవటానికి కారణమైన అతని కుటుంబ సభ్యులు పెళ్ళికి రాలేదు కాబట్టి వాళ్ళు ఈ నేరంలో భాగస్వాములు కారా ???

పిచ్చివాడైన కొడుక్కి ఎంగేజ్ మెంట్ ఎందుకు చేసారంటే అతని తండ్రి సమాధానం "ఎంగేజ్ మెంట్ కి రాకపోతే నా కొడుకు మమ్మల్ని చంపుతాను అన్నాడు అందుకే వచ్చాము" అని.. పిచ్చి కొడుకు చంపుతాను అంటే తీసుకెళ్ళి పిచ్చి హాస్పిటల్ లో ట్రీట్ మెంట్ ఇప్పించాలి కానీ ఒక అమ్మాయి జీవితాన్ని నాశనం చేస్తారా??
 
 మేము పెళ్ళికి రాలేదు కదా అప్పుడైనా మానుకోకుండా  మీరు పెళ్లికి  ఎందుకు ఒప్పుకున్నారు అని అబ్బాయి తల్లిదండ్రుల వాదన.. పెళ్లిరోజు దాక వస్తామని మోసం చేసి,చివరి క్షణం లో రాకుండా మానేస్తే ఆ పెళ్లి ఆగిపోతే 
ఆ అమ్మాయి పరిస్థితి ఏమిటి ?? 

కొడుకును దగ్గర పెట్టుకుని అతని అవసరాలను అన్నిటినీ చూసుకునే తండ్రి కోడలిని మాత్రం నీతో మాకు సంబంధం లేదు, మా ఇంటికి రావద్దు అనటం న్యాయమేనా??

పెళ్లి సమయంలో మా వాళ్ళు రాకపోయినా పర్వాలేదు మీ అమ్మాయిని జాగ్రత్తగా చూసుకుంటానని మాటిచ్చి, తర్వాత నీ వల్ల  నా కుటుంబం నాకు దూరమయ్యింది వాళ్ళే నాకు ముఖ్యం అంటూ వాళ్ళతో కలిసి పిచ్చి నాటకం ఆడుతున్న ఆ భర్త నుండి, ఈ సమస్య నుండి అమ్మాయికి దొరికే పరిష్కారం ఏమిటి??

అసలు ఈ విషయంలో ఎవరు బాధితులు ?? ఎవరు నిందితులు ??

బ్లాగర్లు ఈ విషయం లో మీ అభిప్రాయాలను తెలియచేస్తారని ఆశిస్తాను... 

ఎక్కడికి " e " పరుగు ఎందుకని " e " ఉరుకు...

ఒకప్పుడు కేవలం ఉత్తరాల ద్వారా,ఫోన్ ల ద్వారా అందుబాటులో ఉండే మానవ సంబందాలు ఇప్పుడు నెట్ ప్రపంచం పరిధిలోకి వచ్చేశాయి .. ఎప్పుడూ టీవీయేనా కాస్త అలా నెట్ ప్రపంచం లో కూడా విహరిద్దాం అని గృహిణులు కూడా అనుకునే రోజులు ప్రస్తుతం..మెయిల్స్,మెసెంజర్స్,చాటింగ్ లు అయిపోయి ఇప్పుడు బ్లాగ్స్, ఫేస్ బుక్ ,ట్వీటర్స్, ఆర్కుట్‌, గూగుల్‌ ప్లస్‌ ఇప్పుడు ఇవే సామాజిక సంబంధాలు (సోషల్‌ నెట్‌వర్క్‌)..   

సోషల్‌ నెట్‌వర్క్‌ అంటే కేవలం ఇవే కాదు మన ఆసక్తులను బట్టి వంటలు,క్రాఫ్టు,పెయింటింగ్స్,ఇంటీరియర్ డెకరేషన్,మన ఆసక్తులను షేర్ చేసుకోవటం, కుటుంబ,ఆరోగ్య  సమస్యలను చర్చించటం ఇలా ఏ  విషయాలను నేర్చుకోవాలంటే వాటి గురించి నిపుణులు, మామూలు గృహిణులు కూడా నిర్వహించే సైట్ లు ఎన్నో ప్రస్తుతం అందుబాటులో ఉన్నాయి..ఇలా మనకిష్టమైన వారితో పరిచయం చేసుకుని,అభిప్రాయాలను పంచుకునే  వీలుంటుంది... ఆధునిక పరిజ్ఞానాన్ని, "e " పరిచయాలను ఉపయోగించుకుని కెరీర్ లో కూడా మంచి అవకాశాలను యువత అందుకుంటున్నారు .ఇంకా దేశ  విదేశాల్లో ఉండేవారు కూడా ఎక్కడో దూరాన ఉన్నామన్న ఫీలింగ్ లేకుండా "ఈ"సంబంధాలతో ఎప్పుడూ కనెక్ట్ అయి ఉండటం,కొత్త కొత్త పరిచయాలను ఏర్పరచుకోవటం  కూడా సంతోషించదగిన విషయమే..

బ్లాగ్స్ మన అభిప్రాయాలు,ఆలోచనలు పంచుకోవటానికి చక్కని వేదిక అని నాలాగా చాలా మంది బ్లాగ్స్ రాయటం మొదలుపెట్టారు.కానీ ఈ బ్లాగ్స్  కొందరు చేయి తిరిగిన రచయిత్రులు,రచయితలకే తగినదిగా ఈ మధ్య కాలం లో అనుకుంటున్న తర్వాత బ్లాగ్స్ రాయాలి అంటే ఇతర బ్లాగర్ లాగా మనం రాయగలుగుతున్నామా లేదా ?? 
జనాలకి నచ్చుతుందా  లేదా??   అని ఆలోచించాల్సిన పరిస్థితి వస్తుంది.

ఈ మధ్య కాలం లో సోషల్‌ నెట్‌వర్క్‌ లలో ఎక్కువ ప్రజాభిమానం పొందింది మాత్రం ఫేస్ బుక్ అని చెప్పొచ్చు. తమ ఇష్టా ఇష్టాలు,మూడ్స్, అభిప్రాయాలు,ఆలోచనలు ఇలా భావవ్యక్తీకరణకు అనువైన వేదికగా  ఫేస్‌బుక్ మారింది. ఫేస్ బుక్ మొదలై నిన్నటికి 9 సంవత్సరాలు పూర్తయిందట. ఇన్నాళ్ళకి నాకు ఫేస్ బుక్ ఉపయోగించాలన్న ఆలోచన వచ్చింది. నాకు ఫేస్ బుక్ అకౌంట్ మా తమ్ముడు 2009 లోనే తీసినా దాన్ని నేను ఎప్పుడూ ఓపెన్ చేయలేదు. కానీ ఈ  మధ్య  కొత్త సంవత్సరం నేను చేసిన కొత్త పనుల్లో ఫేస్ బుక్ ఉపయోగించటం మొదలు పెట్టటం కూడా ఒకటి.. 

ఫేస్ బుక్ ఓపెన్ ఐతే చేసాను కానీ ఇందులో ఫ్రెండ్స్ గా ఎవరిని యాడ్ చేసుకోవాలి,ఏమి పోస్ట్ చేయాలి ఇవన్నీ ఎప్పుడూ సమస్యే.. పైగా నా క్లోజ్ ఫ్రెండ్స్  లో కానీ తెలిసిన వాళ్ళలో కానీ ఫేస్ బుక్ గురించి ఉన్న ఫీలింగ్ ఏంటంటే "ఫేస్ బుక్ లో ఫ్రెండ్స్ అంటే తప్పకుండా తెలిసిన వాళ్ళే అయి ఉంటారు.. ఆ పరిచయం ఎంత వరకైనా ఉండొచ్చు"  అనే మాటలు విని ఉన్నాను. దాంతో నాకు ఎవరిని ఫ్రెండ్స్ గా యాడ్ చేసుకోవాలన్నా ఆలోచించాల్సిన పరిస్థితి. ఫ్రెండ్ రిక్వెస్ట్ లు చాలానే వస్తుంటాయి.వాటిలో కొన్ని ఫేక్ అకౌంట్స్ కూడా ఉంటాయి.అలాగే  మనకెవరో తెలియని వాళ్ళని వాళ్ళు ఎంత గొప్ప వాళ్లైనా ఫ్రెండ్స్ గా యాడ్ చేసుకోలేము .. అలాగని అందరూ మనకు తెలిసిన వాళ్ళే ఉండరు కాబట్టి నా ఫేస్ బుక్ లో ఫ్రెండ్స్ చాలా వరకు తెలిసిన వాళ్ళు, నా బ్లాగ్ ఫ్రెండ్స్, నాకు ఇష్టమైన రచయితలూ, సింగర్స్ ను ఫ్రెండ్స్ గా యాడ్ చేసుకున్నాను...ఇలా రచయితలు,సింగర్స్ లో కూడా ఫేక్ ప్రోఫైల్స్ ఉంటున్నాయన్నది కూడా తెలిసిందే.. అలాగే మన ఇష్టాలకి, అభిరుచులకి దగ్గరగా ఉండే గ్రూప్స్ లో కూడా మంచి ఫ్రెండ్స్ మనకి దొరకవచ్చు... 

ఇదిలా ఉండగా ఈ మధ్య ఫేస్ బుక్ లో కొందరు వ్యక్తులు మహిళల గురించి చేసిన వ్యాఖ్యలు పెద్ద దుమారాన్నే రేపాయి. వాళ్ళని తీవ్రంగా వ్యతిరేకించి వాళ్ళతో క్షమాపణలు చెప్పించి,సైబర్ చట్టాల కింద అరెస్ట్ చేయించి,వాళ్లకి తగిన బుద్ధి చెప్పటం లో సఫలీకృతులయ్యారు మహిళలు... కానీ నాకనిపించింది. "ఈ ప్రపంచంలో చాలామంది మనస్సులో వుండే మాటలే ఆ నలుగురి నోటి ద్వారా బయటికి వచ్చాయి" అని..సమాజంలో గౌరవప్రదమైన స్థానం లో ఉన్నవాళ్ళే చాలామంది బయట ఉద్యోగాల కోసం,ఇంకా ఇతరత్రా వ్యాపకాల కోసం తిరిగే మహిళలు, లేదా ఇలా సామాజిక సంబంధాలు కలిగిన మహిళలు అంటే ఏదో తప్పు చేసే వాళ్ళే అన్నట్లుగా చెప్పుకోవటం ఈ రోజుల్లో సర్వ సామాన్యంగా మారిపోయింది..దీనికి కారణం కొంతమంది  ఆడవాళ్ళ  ప్రవర్తన  కావచ్చు,కొందరు ఆడవాళ్ళ ప్రవర్తన వలన కొందరికి కొన్ని నష్టాలు కూడా కలిగి ఉండొచ్చు. కానీ అందరూ అలాంటి వాళ్ళే అని,అందరూ తప్పు చేసే వాళ్ళే అన్నట్లుగా మాట్లాడటం మాత్రం తప్పు.. వాక్ స్వాతంత్ర్యం ఉంది కదా అని మాట్లాడితే ఏదో సినిమాలో చిరంజీవి  "నోరా వీపుకి చేటు తేకే" అని అన్నట్లుగా ఉంటుందనేది ఇప్పటికి చాలా విషయాల్లో అర్దమవుతుంది ..

ఏది ఏమైనా చిన్నప్పుడు వక్తృత్వ పోటీల్లో టీవీ,దాని పుట్టు పూర్వోత్తరాలు, దాని వలన కలిగే లాభాలు అలాగే నష్టాలను కంఠతా పట్టి చెప్పినట్లు మన చుట్టూ ఉన్న ప్రపంచంతో ఉన్న " e  " సంబంధాల విషయం లో అయినా ఏ   సంబంధాల విషయంలో అయినా కూడా వాటి   పరిమితులు, లాభ,నష్టాలను ఎప్పుడూ మనసులో ఉంచుకుని, "అతి సర్వత్ర వర్జయేత్"  అన్న విషయం గుర్తుంచుకుని, మన వల్ల  ఇతరుల జీవితాలకు నష్టం కలగకుండా "నొప్పించక తానొవ్వక" అన్నట్లు  మసలుకుంటే  అందరికీ  మంచిదేమో.. మన పరిధులలో మనం ఉంటున్నాం, మన మనసుకు తెలుసు మనం చేసేది మంచా చెడా అనేది అని ఎంత  అనుకున్నా నైతిక విలువలను, ప్రపంచాన్నిదృష్టి లో పెట్టుకుని ప్రవర్తించాల్సిన అవసరం ఆడవాళ్ళైనా, మగవాళ్లైనా అందరికీ  ఉంటుంది...

మాటలకైనా,  చేతలకైనా " హద్దులున్నాయి జాగ్రత్త "అన్నది ప్రతి మనిషీ గుర్తుంచుకోవాల్సిన విషయం 

ఏమైపోతుంది సభ్యసమాజం ... ఏమైపోతుంది మానవ హృదయం

2012 యుగాంతం ప్రపంచం అంతా అంతమైపోతుంది.. ఇంక ఈ  భూమి మీద మనుగడ లేదు అని అందరూ భయపడ్డారు.కొందరు బాధ పడ్డారు.కొంతమంది చూద్దాంలే అంత  తేలికగా యుగాంతం అవుతుందా అనుకున్నారు.కొందరు ఉంటే  ఎంత పొతే ఎంతలే అని వేదాంతం చెప్పారు.కానీ ప్రస్తుత సమాజాన్ని,పరిస్థితులను చూస్తుంటే నాకనిపిస్తుంది 2012 యుగాంతం మనుషులకా? మనుషుల్లోని మానవత్వానికా ??  అని..

ఆడవాళ్ళ మీద అత్యాచారాలు,హత్యలు,ప్రేమోన్మాదుల దాడులు
భార్యను బయటికి గెంటేస్తున్న భర్తలు, భర్త ఇంటిముందు  భార్యల మౌన దీక్షలు.

భార్య మీద అనుమానంతో పిల్లలకు DNA టెస్టులు చేయించమనే తండ్రులు
భర్త మీద కోపంతో క్షణికావేశంలో కడుపున పెట్టుకుని కాపాడాల్సిన పిల్లలను  కడతేర్చే మాతృమూర్తులు

కీచకావతారం ఎత్తుతున్న గురుదేవులు
బడిలో బాలికకూ,విశ్వవిద్యాలయంలో మహిళలకు తప్పని లైంగిక వేధింపులు

బతికుండగానే కన్నతల్లిదండ్రులను స్మశానానికి చేరుస్తున్న సుపుత్రులు,పుత్రికలు
తమ కడుపున పుట్టిన పిల్లలే తమని వేధిస్తున్నారంటూ కాపాడమని HRC ని ఆశ్రయిస్తున్న పండుటాకులు.

ప్రజారక్షణే మీ కర్తవ్యం  కదా మమ్మల్నిరక్షించమని  వచ్చిన మహిళను కోరిక తీర్చమనే రక్షక భటులు
తన కింద పనిచేసే మహిళా ఉద్యోగితో అక్రమసంబంధం పెట్టుకుని ఆమెను వంచించే న్యాయమూర్తులు.

ఇలాంటివన్నీ గత కొన్ని సంవత్సరాలుగా " FIR " " CRIME REPORT " అంటూ టీవీల్లో యాంకర్లు
మహా సీరియస్ గా వీటి గురించి చెప్తూ ఉంటారు...వాటిని చూస్తూ,వింటూ ఇదేముందిలే ఇలాంటివి రోజూ జరుగుతూనే వున్నాయి అనుకోవటం,వాటిలో నిజానిజాలు ఎంత? ఎవరిది తప్పు ? అని మనమే నిర్ణయించేసుకోవటం కాసేపటి తర్వాత ఆ విషయాలు మర్చిపోవటం.. వదిలేయటం.. ఇలా మనమందరం ఈ దారుణాలను,అమానుష సంఘటనలను సమాజంలో భాగంగా చాలా తేలికగా తీసుకునే స్థాయికి వచ్చాము...

ఇలాంటి సమయంలో రాజధానిలో జరిగిన సామూహిక అత్యాచారం సంఘటన  ఇంతకుముందు కేసుల్లాగానే  విచారణ,పరిష్కారం అంటూ సంవత్సరాలు పడుతుందిలే  అనుకున్నాము.. కానీ ఈ అత్యాచారం విషయంలో ప్రజల్లో,మహిళా సంఘాల్లో,ముఖ్యంగా యువతరంలో కలిగిన స్పందన అనూహ్యం, ప్రశంసనీయం. వారిలో చెలరేగిన ఆవేశం,దోషులకు ఉరిశిక్షపడాలనే ఆవేదన ప్రభుత్వాన్ని,పాలకులను  ఆలోచనలో పడేలా చేసింది.వీరి దీక్షకు మధ్యవయస్కులు, సాదారణ పౌరులు కూడా మద్దతు పలకటం సమాజంలో మిగిలి ఉన్న మానవత్వానికి నిదర్శనం అని చెప్పొచ్చు.. శాంతియుతంగా నిరసన తెలుపుతున్న యువతను చెదరగొట్టే ప్రయత్నంలో భాగంగా హింసాత్మక చర్యలకు కూడా ప్రభుత్వం వెనుకంజ వేయకపోవటం శోచనీయం...

అమ్మాయిల మీద దాడులు జరిగినప్పుడు అసలు అమ్మాయిల వస్త్రధారణ సరిగా లేదు అందుకే
మగవాళ్ళు పశువుల్లా ప్రవర్తిస్తున్నారు అంటాడు ఒక అధికారి.

అసలు ఆడవాళ్ళకి అర్ధరాత్రి తిరిగే సాతంత్ర్యం,హక్కు ఎవరు ఇచ్చారు? అని ప్రశ్నిస్తాడు  మరో నాయకుడు ..

 అర్ధరాత్రి బాయ్ ఫ్రెండ్ తో తిరిగే ఆడపిల్లలు ఇలాంటివి జరుగుతాయని తెలియదా అంటారు పెద్దవాళ్ళు.

అసలు ఆడవాళ్ళదే  తప్పు ఎక్కడ ఎలా ఉండాలి?ఎక్కడికి ఎప్పుడు వెళ్ళాలి? అని తెలుసుకోవాలి అంటారు సాంప్రదాయవాదులు.( ఇది కొంతవరకు నిజమే)

చట్టం,న్యాయం తన పని తాను  చేసుకుపోతుంది అంటారు మేధావులు..

సరే వీళ్ళ మాటలే నిజమని ఒప్పుకుంటే  సినిమాలు,సినిమాల్లో చెడుని చూసి పెడత్రోవ పట్టే యువత
అంత తేలికగా సినిమాలను చూసి ప్రభావితం అయ్యేటట్లయితే సినిమాల్లో మంచిని చూసి నేర్చుకోవచ్చు
కదా  మంచి వస్త్రధారణ,ప్రవర్తన ఉన్న మహిళల మీద దాడులు జరగట్లేదా?బయట తిరిగే స్వాతంత్ర్యం
లేకపోతె పోనీ ఆఫీసుల్లో స్వేచ్చగా పనిచేసుకునే పరిస్థితులు ఉన్నాయా??కార్యాలయాల్లో,కాలేజీల్లో ప్రయాణాల్లో,కనీసం ఇంట్లో  ఇలా ఇంకెన్నో చోట్ల చెప్పుకోలేని ఇబ్బందులకు గురయ్యి మౌనంగా బాధపడే
మహిళలు ఎందరో  లేరా?

వీటన్నిటికీ కారణం నేరస్తుల్లో చట్టం,న్యాయం మమ్మల్ని ఏమి చేస్తాయిలే అన్న తెగింపు, ఎన్ని తప్పులు
చేసినా చట్టంలోని లొసుగులను ఉపయోగించుకుని తప్పించుకో గలము అనే లెక్కలేనితనం..దీనికి పరిష్కారం లైంగిక నేరాల చట్టాలను సవరించి, మరింత పటిష్టం చేయటం,ఫాస్ట్ ట్రాక్ కోర్టులను ఏర్పాటుచేసి వేగవంతంగా విచారణ పూర్తి  చేయటం,ప్రలోభాలకు లొంగకుండా తీర్పును వెలువరించి,శిక్షను అమలుచేయటం ప్రస్తుత కర్తవ్యం. .అని అందరి అభిప్రాయం .

 అలాగే ప్రభుత్వం, పాలకులు మహిళలలోని లోపాలను ఎత్తిచూపి మీ వల్లనే ఇలా జరుగుతున్నాయంటూ
తప్పును ఆపాదించి,నిందించకుండా మీ ప్రయత్నం లో భాగంగా సరైన శాసనాలను,చట్టాలను చెయ్యాలి.
మహిళలకు రక్షణ కల్పించాలి..ఆపదలో ఉన్నామని ఆశ్రయించిన వాళ్లకు సత్వర సహాయం అందించే రక్షణ యంత్రాంగాన్ని సక్రమంగా అమలు చేయాలి. మనుషుల్లో సాటి మనిషిని మనిషిగా గౌరవించే  సహృదయం,మానవత్వం, నైతికవిలువలు, మంచి.చెడుల విచక్షణా జ్ఞానం పెంపొందాలి.

ఈ సమస్య తీరిపోతే ఇంకే సమస్య రాదన్న నమ్మకం లేకపోయినా, ఉరిశిక్ష,లేక ఇంకే కఠిన శిక్ష పడితేనో
ఇంకో నేరస్తుడెవడూ ఇలాంటి నేరం చేయడన్న నమ్మకం లేకపోయినా మంచి మనస్సుల్లో  మొదలైన
ఈ ఉద్యమం రాజకీయరంగు పులుముకోకుండా  అనుకున్న లక్ష్యం సాధించాలని కోరుకుంటూ,
సభ్యసమాజం తలదించుకునే ఇలాంటి సంఘటనలు  మళ్ళీ జరగకూడదని,  తాను ఎలాంటి తప్పు
చేయకపోయినా  దారుణమైన శిక్ష అనుభవిస్తున్న బాధితురాలికి సరైన న్యాయం జరగాలని
సాటి మనుషులుగా ఆకాంక్షించటం మానవత్వం  ఉన్న ప్రతి  మనిషి  కర్తవ్యం...

అవును పిచ్చెక్కించటం చాలా సులభం ..

ఈ లోకంలో మనిషికో పిచ్చి వుంటుంది ఒకళ్ళకి సినిమాల పిచ్చి,మరొకరికి డబ్బు పిచ్చి,ప్రేమ పిచ్చి,ఇంకొకళ్ళకి పేరు ప్రతిష్టలు, పదవుల కోసం పిచ్చి.. ఇలా పిచ్చి రకరకాలు. ఎవరైనా అర్ధం లేకుండా మాట్లాడుతున్నా విసిగిస్తున్నా నీకేమైనా పిచ్చెక్కిందా అంటుంటాము.. కానీ ఇప్పుడు నేను చెప్పేది అలాంటి పిచ్చి గురించి కాదు.. మానసిక ఆరోగ్యానికి సంబంధించిన పిచ్చి అనే వ్యాధి గురించి..

మనసు ఎంత బలమైనదో అంత బలహీనమైనది కూడానట.అందుకేనేమో ఎదుటి మనిషి ప్రవర్తనను బట్టి మన మనసు స్పందిస్తూ వుంటుంది..మన అనుకున్న వాళ్ళు  ప్రేమిస్తే సంతోషించటం, చిన్నమాట అన్నా బాధపడటం అన్నిటికీ మనసే కదా మూలం.మనసుకు బాధ కలిగినప్పుడు కొన్ని మనసుల భాష మౌనమైతే మరి కొన్ని మనసుల బాధ పిచ్చి...ఎలాంటి వ్యాదికైనా నివారణ ఉన్నట్లే ఈ మానసిక వ్యాధికి పరిష్కారం వుంది.. అలాగే ఎవరికైనా పిచ్చిలేకపోయినా పిచ్చెక్కిస్తా అంటూ.. పిచ్చివాళ్ళగా  తయారుచేసే అవకాశం కూడా వుంది ..

 అవునండీ నేను చెప్పేది నిజమే..! మనం ఎవరినైనా పిచ్చి వాళ్ళు అని నిరూపించాలనుకుంటే  పిచ్చెక్కించటం చాలా సులభం ..మనకి  సంఘం లో కొంత పలుకుబడి,డబ్బు,పరిచయాలు ఉంటే చాలు ఎవరినైనా పిచ్చి వాళ్ళను చేసేయొచ్చు..రెండు రోజుల క్రితం న్యూస్ లో  చూశాను ఒక లాయర్ తన భార్య పిచ్చిదని నిరూపించి విడాకులు తెచ్చుకోవాలనుకున్నాడు.. అనుకున్నదే తడవుగా తనకు తెలిసిన ఒక మానసిక వైద్యునితో కలిసి భార్యకు మత్తు మందులు ఇచ్చి కరెంట్ షాక్ తో పిచ్చిదాన్ని చేసే ప్రయత్నం చేశాదు కానీ ఆ భార్య ఎలాగో తప్పించుకుని, మీడియాను ఆశ్రయించి ఈ విషయాన్ని బయటపెట్టింది..ఇది బయటపడిన ఒక మనిషి సమస్య మాత్రమే ..కానీ నిజంగా మానసిక సమస్య లేకపోయినా మానసిక వైద్యం పేరుతో శిక్ష అనుభవిస్తున్న ఇలాంటి మానసిక రోగులు ఎందరో ..

ప్రేమలో విఫలమయ్యామని ,జీవితంలో అనుకున్నది జరగలేదని, ఎదుటివాళ్ళు తమను సరిగా అర్ధ చేసుకోవటం లేదని, ఇంకా రకరకాల కారణాలతో మానసిక రోగులుగా తయారయ్యేది కొందరైతే, ఒక మనిషి మానసిక పరిస్థితి సరిగా లేనప్పుడు వాళ్ళు ఎలాంటి నేరం చేసినా దాన్ని నేరంగా పరిగణించదుచట్టం.దీన్ని ఆసరాగా చేసుకుని,శిక్ష తప్పించుకోవటానికి పిచ్చి అని నిరూపించుకునే  వాళ్ళు కొందరు, అలాగే ఆస్తుల కోసం, ఇంకా రకరకాల కారణాలతో సొంత వాళ్ళనే కావాలని పిచ్చివాళ్ళను చేసేవాళ్ళు కొందరు

ఎవరికైనా జ్వరం వస్తే అది ఏ జ్వరం అని టెస్ట్ చేసి నిర్ణయిస్తారు డాక్టర్లు.కానీ నాకు తెలిసి మానసిక వైద్యులు ఒక మనిషిని పిచ్చివాడు అని నిర్ణయించటానికి ఎక్కువగా ఆధారపడేది టెస్టుల కంటే  రోగికి సంబంధించిన  సొంత మనుషుల మాటల  మీదనే.. ఒక వ్యక్తి మానసిక ఆరోగ్యం సరిగా లేదని  సైకాలజిస్టు దగ్గరికి వెళ్ళగానే ఆ డాక్టర్ రోగిని బయటికి పంపి, అతని  కుటుంబ సభ్యులను కొన్ని ప్రశ్నలు అడిగి,ఆ రోగి పరిస్థితి గురిచి ఒక అంచనాకు వస్తారు..ఇక్కడ కుటుంబ సభ్యులు రోగి  గురించి ఇచ్చే సమాచారమే  కీలకంగా మారుతుంది..ఇదే మంచి అవకాశంగా తీసుకుని ఎదో కొంచెం మెంటల్ డిప్రెషన్ లో ఉన్న వ్యక్తిని కూడా  అతని ప్రవర్తనను గోరంతలు కొండంతలుగా వర్ణించి,డాక్టర్ ను కూడా నమ్మించి,పిచ్చి కోసం ట్రీట్ మెంట్  ఇప్పించి ఆ వ్యక్తిని  పూర్తి స్థాయి మానసిక రోగిగా మార్చిన సందర్భాలు కూడా లేకపోలేదు..

పిచ్చిని  నిర్ధారించటాని చేసే క్లినికల్ సైకాలజీ టెస్ట్ ల  ద్వారా రోగి ప్రవర్తనా సరళిని గమనించటం, రోగిని ప్రశ్నించడం ద్వారా తెలుసుకునే విషయాలను అన్నిటినీ కలిపి ఒక వ్యక్తి  మానసిక ఆరోగ్య పరిస్థితిని గురించి ఒక అవగాహనకు  వస్తారు సైకాలజిస్టులు ..మానసిక వైద్యం కోసం ఒక మనిషిని ఎవరైనా తీసుకు రాగానే పరోక్షంగా రోగి  ప్రవర్తనను ఇతరుల ద్వారా తెలుసుకోవటం , ఒక నిర్ణయానికి వచ్చేసి ట్రీట్ మెంట్ ప్రారంభించడం  మాత్రమే కాకుండా , న్యూరో  సైకలాజికల్‌ విధానం అమలు చేసి, రోగి ఇచ్చే సహకారం, అతనిలో ఉత్కంఠత ( Anxiety ) , ఇంకా ఇతర ప్రవర్తనలను అంచనా వేయడం జరుగుతుంది. రోగి మెదడు  ఆకస్మికంగా పని చేయకపోయినట్లయితే అనేక కారణాల రీత్యా అంచనాలు జరగవలసి ఉంటుంది.ప్రాథమిక పరీక్షల వల్ల, ప్రశ్నించడం వల్ల రోగికి సంబంధించిన చాలా విషయాలు తెలుస్తాయి. వ్యక్తిగతంగా రోగిని పరీక్షించి, సైకలాజికల్‌  అనాలసిస్ చేయటం వలన  అసలు
ఆ రోగికి ఎటువంటి చికిత్స అవసరమో వైద్యులకు అర్థమవుతుంది.దాని ద్వారా అతనికి  ట్రీట్ మెంట్ చేయటం సులభం అవుతుంది.

ఇదంతా దైవంతో సమానమని నమ్మే వైద్యులు ఒక మానసిక రోగిని కాపాడటానికి చేసే  ప్రయత్నాలు..కానీ అన్ని చోట్లా మోసం,అవినీతి ఉన్నట్లే డబ్బు,పరిచయాలు,స్నేహాల కోసం ఒక మనిషిని పిచ్చివాడిగా నిరూపించగలిగే  సైకాలజిస్టులు కూడా ఉంటారనేది అందరికీ తెలిసిన నిజమే.ఒకప్పుడు పాత సినిమాల్లో,ఇప్పటికీ కొన్ని సీరియల్స్ లో మామూలు మనుషుల్ని పిచ్చివాళ్ళ గా తయారు చేయటం లాంటి కధలు ఉండేవి.అలాంటివి సినిమాల్లోనే కాదు నిజజీవితంలో కూడా జరుగుతున్నాయని  ఈ లాయర్ విషయం ద్వారా మరోసారి  బయటపడింది...

ఇలాంటి విషయాలు  తెలిసినప్పుడు అయ్యో  ఇలా  జరుగుతుందా అని బాధపడటం,తర్వాత
ఎవరి పనుల్లో వాళ్ళం బిజీ అయిపోవటం.ఇంతకన్నా ఏమీ చేయలేని సగటు మనుషులము కదా అంతే మరి..
ఇదంతా నా మనసుకు అనిపించింది ... చెప్పేశాను..ఎవరి పిచ్చి వాళ్లకి ఆనందం అంటారు కదా...

ఏది ఏమైనా కానీ కలత పడిన మనసుకు మరొక  మనసు మాత్రమే స్వాంతనను కలిగిస్తుంది అనేది మాత్రం నిజం. స్వచ్ఛమైన మనసు, ప్రేమపూర్వక స్పర్శ, చిన్న ఓదార్పు మానసికంగా ధైర్యాన్నిస్తుంది..మనసుకు ఎంతో ఆత్మీయతను అందిస్తుంది.. కొండంత అండను, ఉపశమనాన్ని ఇస్తుంది..
 

 

మనసొక మధుకలశం పగిలే వరకే 

అది నిత్య సుందరం 

మానవసేవ ... మాధవసేవ .... మనసేవ

ఆదివారమైనా రోజూ లాగే ఉదయాన్నే పూజ చేసుకుని, తన పనులు తన ఇష్టమొచ్చినట్లు చేసుకుంటున్న మా భారతమ్మతో మాట్లాడుతూ, బ్రేక్ ఫాస్ట్ చేసే పనుల్లో ఉన్న నాకు మా శ్రీవారి ఫోన్ రింగ్ అవటం వినిపించింది.
సండే కదా రెస్ట్ తీసుకుందాం అనుకున్న ఆయనకి 7 గంటలకే మోగిన ఈ ఫోన్ కొంచెం ఇబ్బందే అయినా తప్పక ఫోన్ లిఫ్ట్ చేసినట్లున్నారు.. ఒక చెవి అటేసి ఎవరా అని వింటున్న నాకు ఆ ఫోన్ చేసింది ఎవరో గానీ,ఆ మార్నింగ్ కాల్ మావారికి చాలా సంతోషాన్ని కలిగించిందని అర్ధమయింది.

ఫోన్ కట్ చేసిన వెంటనే నన్ను పిలిచి,ఈ రోజు మనింటికి గెస్ట్ లు వస్తున్నారు అన్నారు.. అనుకోకుండా ఇప్పుడు గెస్ట్ లా అని మనసులో అనుకుంటూనే అయినా ఇప్పుడు ఫోన్ చేస్తున్నారంటే ఏ మధ్యాహ్నానికో వస్తారులే అనుకున్న నాకు మరొక బాంబ్ పేలింది.. ఆ గెస్ట్ లు వస్తుంది బ్రేక్ ఫాస్ట్ కోసం , మరొక 45 మినిట్స్ లో వచ్చేస్తారు అన్నారు..

అంత తక్కువ టైం లో ఎలా,ఏమి చేయాలా అని ఆలోచిస్తున్న నాకు మా శ్రీవారు వచ్చే గెస్ట్ ల గురించి చెప్తున్నారు..
ఆయన మాటలు వింటూనే మా కోసం చేసిన ఇడ్లీ తో పాటూ పూరీ ఆలూ కర్రీ చేద్దామని కావాల్సినవన్నీ తయారు చేసుకున్నాను.

ఇంతకూ వచ్చే వాళ్లెవరంటే మా వారికి చాలా క్లోజ్ ఫ్రెండ్, ఫ్రెండ్ వాళ్ళ కొలీగ్.. మావారి ఫ్రెండ్ ,ఆయన కొలీగ్ ఇద్దరూ ఒక ఆధ్యాత్మిక గురూజీ గారి శిష్యులు, అలాగే కొత్తగా ఆ గురూజీని అనుసరించాలనుకునే వాళ్లకి వీళ్ళు జూనియర్ గురూజీలు. ఇద్దరూ విద్యాధికులే ఒకరు M.Tech,ఒకరు MBA మంచి మంచి కార్పోరేట్ ఉద్యోగాలు వదిలేసుకుని, దేశం లో అవినీతి,అన్యాయాలను చూసి ఓర్చుకోలేక ఒక "కళా కాంతీ" లేకుండా బతుకుతున్న జనాలకు "కళాత్మకంగా" బతకటం ఎలాగో తెలియచేయాలన్న గొప్ప సదుద్దేశ్యంతో ,తపనతో చేస్తున్న పెద్ద పెద్ద ఉద్యోగాలను కూడా వదిలేసి, వీళ్ళిద్దరూ కలిసి ఒక మారు మూల ప్రాంతంలో ఒక అనాధాశ్రమాన్ని నడుపుతున్నారని అనాధ పిల్లలంటే వాళ్లకి చాలా అభిమానమనీ వీళ్ళిద్దరిలో ఆ మేడం కి జిల్లా కలెక్టర్ చేతుల మీదుగా ప్రతిభా అవార్డ్ కూడా వచ్చిందని వాళ్ళు వచ్చే లోపు,నేను బ్రేక్ ఫాస్ట్ రెడీ చేసే లోపు మా వారు గుక్క తిప్పుకోకుండా నాకు చెప్పేశారు...

నేను సమాజసేవ చేయలేకపోయినా చేసే వాళ్ళన్ని అభిమానించే నాకు ఆ వచ్చే వాళ్ళ గురించి తెలుసుకున్న తర్వాత వాళ్ళను చూడాలన్న ఆసక్తి పెరిగిపోయింది.. అన్నీ రెడీ చేసుకుని వాళ్ళ కోసం ఎదురుచూస్తుండగానే వాళ్ళిద్దరూ వచ్చేశారు. వస్తూనే ఆవిడ హడావుడిగా, ఆయన నిదానంగా మాట్లాడుతూ పరిచయం చేసుకుని, మీ ప్లేస్ లో ఈ రోజు మా క్లాస్ (యోగా) వుంది అందుకే ఎలాగూ ఇక్కడిదాకా వచ్చాము మిమ్మల్ని కలిసినట్లు వుంటుంది అని వచ్చేసాము అని చెప్పారు..

అయ్యో అంతకన్నానా మీరు రావటం మాకు,ముఖ్యంగా నాకు చాలా ఆనందం ( వాళ్ళ గురించి విన్న తర్వాత వాళ్ళ మీద నిజంగానే అభిమానం తోనే ఈ మాట అన్నాను ఏదో మాట వరసకి కాదు ) అంటూ వాళ్లకి ముందు ఫ్రెష్ అవుతారా అని బాత్ రూమ్స్ చూపించి,వాళ్ళ కోసం చేసిన పూరీ ,ఖీర్ ఇడ్లీ అన్నీ సెట్ చేసి బ్రేక్ ఫాస్ట్ కోసం రమ్మని పిలిచాను..
మా వారి ఫ్రెండ్ ,వారి కొలీగ్ ఇద్దరూ నా వంట చాలా బాగుందని మెచ్చుకుని, కాఫీ తాగేసి హడావుడి తగ్గటంతో ఇంక అందరం అలా హాల్లో కూర్చున్నాము...

వాళ్ళ క్లాస్ ల గురించి చెప్పి మీరు కూడా ఆ కోర్సులు చేయండి జీవితంలో చాలా ఉపయోగ పడతాయి అని చెప్పారు.
నాకు ఆ క్లాస్ లంటే అంతగా ఆసక్తి లేకపోయినా,వింటూనే వాళ్ళ అనాధాశ్రమం గురించి వివరాలు అడిగి తెలుసుకుంటున్నాను... నా ఆసక్తిని గమనించిన వాళ్ళు మా సేవామందిర్ కి రండి మీకు తప్పకుండా ఆ ప్లేస్,అక్కడి పిల్లలు అన్నీ నచ్చుతాయి అన్నారు... నాకు కూడా వెళ్ళాలనే వున్నా మావారి కి ఈ రోజు ప్లానింగ్ ఏమిటో తెలియదు కదా ఆయన్నే అడగండి అన్నాను.. ఇంకేమి ప్లానింగ్స్ ఉంటాయి లెండి మీ వారికి కూడా మా సేవా మందిర్ పిల్లలంటే చాలా అభిమానం.. పెళ్లి కాకముందు కూడా రెగ్యులర్ గా విజిట్ చేసి పిల్లలకు స్వీట్స్,చాక్లెట్స్ తెచ్చి,వాళ్ళతో టైం స్పెండ్ చేసే వాళ్ళు అని చెప్పారు..

నిజం చెప్పొద్దూ నాకు ఆ క్షణం లో మా వారి మీద గౌరవాభిమానాలు మాటల్లో చెప్పలేనంతగా పెరిగిపోయాయి.
ఇంక అందరూ కలిసి వాళ్ళ అనాధాశ్రమంకి వెళ్ళేలా ప్రోగ్రాం ఫిక్స్ అయ్యింది. అలా వాళ్ళ కార్ లోనే నలుగురం బయల్దేరి వెళ్ళాము. ఆ ఆశ్రమం చాలా మారుమూల ప్రాంతంలో వుంది.. వెళ్ళే దారంతా చిన్న చిన్న పల్లెటూర్లు,మట్టి దారులు,కొన్ని చోట్ల కనీసం దారి కూడా లేకుండా గతుకుల్లో ఇలా వెళ్తుంటే పెద్ద చదువులు చదివి,ఉన్నత ఉద్యోగాలను వదులుకుని సేవా భావం తో అనాధల కోసం జీవితాలను త్యాగం చేసి,ఇలాంటి మారుమూల పల్లెటూర్లో ఉంటున్న అంత గొప్ప మనసున్న మనుషులతో కలిసి ఉన్నందుకు నాకు చాలా గర్వంగా,సంతోషంగా అనిపించింది.

అలా మా ప్రయాణం జరిగిన తర్వాత చుట్టూ ఎత్తైన కొండలు,పంట పొలాల మధ్యలో సేవామందిర్ కనిపించింది..
ఆ వాతావరణం నాకు చాలా నచ్చింది. పిల్లల కోసం జారుడు బల్ల,ఉయ్యాలలు,ఇంకా వాళ్ళే పెంచుతున్న కిచెన్ గార్డెన్ ఇవన్నీచూపించి..పిల్లలు సండే స్పెషల్ క్లాస్ లో వున్నారు డిస్టర్బ్ చేయటం ఎందుకు వాళ్ళు వచ్చిన తర్వాత పరిచయం చేస్తాము అన్నారు.. సరే అన్నాము.

అక్కడే ఒక పాప ఆడుకుంటుంది.3 సంవత్సరాలు ఉండొచ్చు. ఆ పాప పిలవగానే నా దగ్గరికి వచ్చింది. నీ పేరేంటి అని అడిగి తనతో మాట్లాడుతూ తన చెవి వంక చూసాను కొత్తగా చెవులు కుట్టించినట్లు కొంచెం పచ్చి గాయాలు వున్నాయి పాప చెవికి, బంగారు కాడలతో బుట్టలు కూడా వున్నాయి... అమ్మో ఇక్కడ పిల్లలకి బంగారంతో చెవులు కూడా కుట్టిస్తారా అని ఆశ్చర్యపోయి, పాపా మేడం నీకు చెవులు కుట్టించారా ??అని అడిగాను..
అప్పుడు ఆ పాప కాదు మా అమ్మ కుట్టించింది అని చెప్పింది.. నాకేమి అర్ధం కాలేదు .. అదేంటి వీళ్ళందరూ అనాధలని చెప్పారు కదా ఈ పాప అమ్మ అంటుందే అని అనుకున్నాను.. ఆ విషయం అప్పటితో మర్చిపోయి... అక్కడే కూర్చుని ఉన్న నాకు అక్కడ వంట చేసే వాళ్ళు,ఆయాలు ఇంకా కొంత మంది ఆడవాళ్ళ మాటలు వినిపిస్తున్నాయి..

అక్కడ కూర్చున్న ఒకమ్మాయి వయసు 25 సంవత్సరాలు ఉండొచ్చు ఆమె చెప్తుంది అక్కడ వాళ్ళతో ... ఈ సార్
(మా వారి ఫ్రెండ్ )నాకు వరసకి అన్న అవుతాడు మా ఊరే .. భర్త చనిపొయ్యి,పిల్లల్ని చదివించటం కష్టంగా వుందని నా కొడుకుని ఇక్కడ చదివిస్తానని తీసుకు వచ్చాడు... నువ్వు ఫీజులేమీ కట్టాల్సిన పని లేదు అన్నాడు తీరా ఇప్పుడేమో
పిల్లలకి పుస్తకాలని,చాపలని,దుప్పట్లు చించారు డబ్బులు తెండి అని మాటి మాటికి పిలుస్తున్నారు.. అంతంత దూరం నుంచి మేమెలా రావాలమ్మా??
ఇక్కడ ఈ బీడు పొలంలో మొక్కలన్నీ పిల్లలతో పీకించి చదును చేయించారట,చేతులు బొబ్బలెక్కి ఒకటే ఏడుపు,మొన్నటికి మొన్న సార్ వాళ్ళ అమ్మకి చేత కాదని మా పిల్లోడ్ని,ఇంకో ముగ్గుర్ని కలిపి వాళ్ళింటికి తీసుకుపోయ్యి ఇల్లంతా శుభ్రం చేయించారంట .. ఏదో చిన్న చిన్న పనులైతే సరే కానీ మరీ ఇంతగానా అంటూ అక్కడి వాళ్లకి తన బాధ చెప్తుంది..

అప్పుడు నాకొక విషయం అర్ధమయ్యింది.. ఇక్కడ అనాధ పిల్లలతో పాటూ తల్లిదండ్రులు వున్న,ఫీజులు కట్టి చదువుకునే పిల్లలు కూడా వున్నారని..కానీ బయటికి చెప్పుకునేటప్పుడు మాత్రం ఆ విషయం చెప్పారు అందరూ అనాధలే అని చెప్తారనీ...కాసేపటికి లంచ్ బెల్ అయింది పిల్లలంతా బయటికి వచ్చారు.. మేము తీసుకు వచ్చిన స్వీట్స్ అవి పెట్టండి అన్నాను.. వాళ్ళు ఇప్పుడా స్వీట్స్ తింటే తిండి తినరు ఇప్పుడు వద్దు అన్నారు ఆ మేడం...
పిల్లలు లైన్ గా నిలబడి అన్నం, పప్పుతో భోజనం తెచ్చుకుని,అక్కడే చెట్ల కింద కూర్చుని తింటున్నారు..
కొంతమంది బయటి నుండి స్కూల్ కి వచ్చే పిల్లలు వాళ్ళు ఇళ్ళ దగ్గర నుండి తెచ్చుకున్నవి తింటున్నారు..

మాకు కూడా లంచ్ వచ్చింది.కాప్సికం రైస్,కిచిడి,రోటీలు,స్వీట్స్,రైతా ఇంకా ఏవో కొన్ని వెరైటీలు అయ్యో మాకోసం ఇప్పుడివన్నీ చేయించారా ఎందుకండీ శ్రమ అన్నాను.. అప్పుడా మేడం లేదు మేము రోజూ ఇలాగే ఫుడ్ తింటాము..
నాకు కాప్సికం రైస్ అంటే చాలా ఇష్టం అన్నారు..పిల్లలకి కూడా నెలకోసారి ఇలా స్పెషల్ ఫుడ్ పెడతాము అన్నారు..
ఆ వెరైటీ వంటలన్నీ అక్కడ వున్న కొంచెం పెద్ద పిల్లలతో తెప్పించారు వాళ్ళే మాకు వడ్డిస్తున్నారు.. ఆ పిల్లలకి పెట్టకుండా వాళ్ళ ముందు అవన్నీ తినటం నాకెందుకో నచ్చలేదు..

వాళ్ళ రూం లో పెద్ద టీవీ అది ఎవరో పిల్లల కోసం డొనేషన్ ఇచ్చారట.. లంచ్ తర్వాత వాళ్ళ యోగా సీడీ లేవో చూడమని పెట్టారు... అవి మేము చూస్తుంటే పిల్లలు కూడా చూడాలని వచ్చారు.. కానీ అక్కడి ఆయా వచ్చి అందరినీ లాక్కుపోయింది.. ఇక్కడ ఎప్పుడూ ఇంతే టీవీ కూడా చూడనివ్వరు అని పిల్లలు ,క్రమ శిక్షణ అని పెద్దలు చెప్పారు.

మధ్యాహ్నమన్నా కాసేపు ఆ పిల్లలతో కలిసి కూర్చుని మాట్లాడాలి అనుకునే లోపు మనం సిటీ కి వెళ్దాము ఇక్కడ నుండి 40 మినిట్స్ లో వెళ్లిపోవచ్చు కదా ఈ లోపు సినిమా టైం కూడా అవుతుంది అన్నారు.. ఇప్పుడు మేము సినిమాకి వెళ్తున్నామన్నమాట అనుకున్నాను, 45 మినిట్స్ లో సిటీకి వచ్చాము.అక్కడ మా ఆఫీస్ ఇది అంటూ అన్ని సౌకర్యాలు వున్న ఇంటికి తీసుకెళ్లారు .. అక్కడ వాతావరణం చూడగానే అర్ధమయ్యింది ఇది వాళ్ళ అసలు ఇల్లన్నమాట అని..

ఇంక ఈ సార్,మేడం తో పాటూ మరికొంత మంది వాళ్ళ ఫ్రెండ్స్,వాళ్ళ దగ్గర పనిచేసే అసిస్టెంట్లు అందరు కలిసి ఒక పదిమందినీ సినిమాకి తీసుకువెళ్లి, అక్కడి నుండి ఒక రెస్టారెంట్ వెళ్లి డిన్నర్ , ఐ క్రీం పార్లర్ కి తీసుకెళ్ళి మేమెప్పుడూ ఇక్కడికే వస్తుంటాము అంటూ వారి దినచర్యను గర్వంగా చెప్పారు..

అప్పుడు నాకనిపించింది ఇంతలా మా లైఫ్ స్టైల్ ఇది మేము ఏ సిటీలో వుండే వాళ్ళకీ తీసిపోము అన్నట్లు నాకు చెప్తున్నారేంటి కొంపతీసి నేను వీళ్ళని జాలి చూపులు చూడలేదు కదా అని ..!!
చివర్లో మిమ్మల్ని ఇంటి దగ్గర డ్రాప్ చేయమటారా అని అడిగారు వద్దులెండి మీకెందుకు శ్రమ,మీకసలే బోలెడు పనులు అని మేము కాబ్ పిలుచుకుంటాము అని చెప్పి ఇంటికి బయల్దేరాము..

వచ్చే దారిలో నా సందేహాలన్నీ వరుసగా నివృత్తి చేసుకునే పనిలో పడ్డాను..

ఇక్కడ ఫీజులు కట్టి చదువుకునే పిల్లలు వున్నా డొనేషన్స్ కోసం అందరూ అనాధలే అని చెప్తారట కదా??

వాళ్ళ అమ్మమ్మకి బాగాలేకపోయినా, వాళ్ళ వూర్లో ఏదైనా పనులైనా ఈ పిల్లలతో వాళ్లకి చాకిరీలు చేయిస్తారట కదా??
డొనేషన్స్ వస్తున్నప్పుడు పిల్లల దగ్గర దుప్పట్లు,చాపల కోసం డబ్బు తీసుకోవటం ఎందుకు??

ఇక్కడ పల్లెటూరిలో ఆశ్రమం అన్న పేరే కానీ సిటీలో అంత ఇల్లు,మైన్టేనేన్స్,సినిమాలు,సరదాలు,టూర్స్ అన్నిటికీ డబ్బులెలా వస్తాయి?? వీళ్ళేమి ఉద్యోగం చేయరు కదా??

వీళ్ళు పెద్ద ఉద్యోగాలు వదులుకుని వచ్చినా వీళ్ళు ఏదో కోల్పోయారని నాకనిపించలేదు ఒక మంచి స్థాయిలో ఉన్న ఉద్యోగస్తుడు,లేదా వ్యాపారస్తుడు ఎంత హాపీ గా లైఫ్ లీడ్ చేయగలదో అలాగే వుంది వీళ్ళ జీవితం కూడా...
కాకపొతే ఒక్కటే తేడా లక్షలు సంపాదించే సాఫ్ట్ వేర్ ఇంజినీర్ కి,వ్యాపారస్తునికి లేదా ఇంకే జాబ్ హోల్డర్ కైనా ఎక్కడలేని వర్క్ టెన్షన్స్ వుంటాయి,వీళ్ళకి అవేమీ లేవు ... వాళ్లకి ఉన్నదల్లా ఒకే టెన్షన్స్ "ఎక్కడ నుండి ఎలా విరాళాలు సేకరించాలి " అని మాత్రమే..

నా అనుమానాలకి మావారి సమాధానం ఏమి వాళ్ళు పిల్లల కోసం సేకరిస్తున్న డొనేషన్స్ తోనే ఎంజాయ్ చేస్తున్నారా వాళ్ళిద్దరూ ఇంతకుముందు ఉద్యోగాల్లో సంపాదించిన డబ్బేమి ఉండదా వాళ్ళ దగ్గర....
అయినా ఇక్కడ ఎవరికీ లేని సందేహాలన్నీ నీకే వస్తున్నాయా అని??

సరే వాళ్ళు ఉద్యోగాలతో సంపాదించిన డబ్బే అంత ఎక్కువగా వుంది అనుకుంటే వేరే వాళ్ళ దగ్గర విరాళాలు సేకరించటం ఎందుకు??
మేము అనాధల కోసం జీవితం త్యాగం చేసాము,మారు మూల పల్లెటూర్లో ఉంటాము అని జనాలకి చెప్పుకోవటం ఎందుకు సానుభూతి కోసమా?..ఎవరిని మోసం చేయటానికి??

దానికి సమాధానం ఎవరైనా అవకాశం వుంటే ఇలాగే చేస్తారు అంతెందుకు నీకు వస్తే నువ్వు చేయవా ??
అయినా వాళ్ళు నా ఫ్రెండ్స్ కాబట్టి నువ్వు వాళ్ళలో తప్పులు వెతుకుతున్నావు అని..

నా మనసులో అనుకున్నాను నాకు ఇలాంటి ఫ్రెండ్స్ వద్దు అలా పసిపిల్లల పేర్లు చెప్పి డబ్బులు తెచ్చుకుని వాటితో పండగ చేసుకునే బ్రతుకు వద్దు నేనిలాగే వుంటాను నాలాగే, నాకు చేతైతే నాకున్న దాంట్లోనే హెల్ప్ చేస్తాను లేకపోతే మానుకుంటాను అంతే కాని ఇలా పిల్లల పేర్లు చెప్పుకుని కొంచెం వాళ్లకి పెట్టి కొంచెం నేను తినను అని..

మొత్తానికి నేనేదో ఊహించుకుని వెళ్ళిన అనాధాశ్రమం విజిట్ ఒక సినిమా,స్టార్ హోటల్ లో డిన్నర్, కొంతమంది గొప్ప వాళ్ళ పరిచయం తో ఇలా ముగిసిందన్నమాట..

ఈ సమాజంలో పేదవారికి,అసహాయులకు మంచి మనసుతో దానం చేసే దాతలు ఎందరో వున్నారు కానీ ఆ డబ్బు నిజంగా వారికి చేరుతుందా లేకపోతే మధ్యలోనే ఇలాంటి సమాజోద్దారకుల చేతుల్లోనే కరిగిపోతుందా అన్నదే ఆలోచించాల్సిన విషయం..

Remember, You also will need Care . . .
sometime !!!