మయూరి సినిమా అందరికీ తెలిసిన సినిమానే నేను కొత్తగా చెప్పేదేమీ లేదు
కానీ నాకు ఇష్టమైన సినిమా గురించిన నా అభిప్రాయం
నా చిన్ని ప్రపంచంలో....నాకు ఎప్పటికీ గుర్తుండిపొయేలా , ఎంతగానో నచ్చిన సినిమాలు చాలా వున్నాయి.
వాటిలో టాప్ 10 లో వుండే సినిమా మయూరి.
చిన్నప్పుడు ఇంగ్లీష్ సబ్జెక్టు లో సుధాచంద్రన్ జీవిత చరిత్ర ఒక లెసన్ వుండేది.
ఆ లెసన్ చెప్తూ మా టీచర్ ఇది మయూరి అనే సినిమాగా వచ్చింది.
సినిమా చూడండి చాలా బాగుంటుంది అని చెప్పారు.
అప్పుడు మొదటిసారి మయూరి సినిమా చూశాను.అప్పటినుండి నేను మయూరి ఫాన్ అయిపోయాను.
ఎన్ని సార్లు టివీ లో వచ్చినా మిస్ అవ్వకుండా చూసే సినిమా మయూరి.
మనిషి తలచుకుంటే ఏదైనా సాధించగలడు అని,ప్రయత్నం చేస్తే విజయం వరిస్తుందని తెలియచేయటానికి
మయూరి నిజజీవితం గురించి స్ఫూర్తి కలిగించే విధంగా,
చిన్నప్పటి పాఠంగా చదివాను .
మళ్ళీ కొంతకాలానికి నేను డిగ్రీ పూర్తీ చేసి, ICET ,EDCET కోచింగ్ కోసం
విజయవాడ SUPERWHIZZ
కోచింగ్ సెంటర్ లో జాయిన్ అయ్యాను.
షార్ట్ టర్మ్ కోచింగ్ అయిపోయిన తర్వాత ఒక రోజు SUPERWHIZZ డైరెక్టర్ గుప్తా గారు తుమ్మలపల్లి కళాక్షేత్రంలో feedback claass ఏర్పాటు చేశారు
.
ఆ క్లాస్ లో ఆయన చెప్పిన మాటలు నాకు ఇప్పటికీ గుర్తుకువస్తుంటాయి.
ప్రతి మనిషీ జీవితం
లో ఏదో ఒక క్షణంలో నిరాశ నిస్పృహలకు,
నేనికేమీ చేయలేననే ఆశక్తతకు లోనవుతాడు.
ఆలాంటి సమయంలోనే మనిషి ధైర్యాన్ని కోల్పోకుండా మనం ఏది సాధించాలి అనుకున్నామో
దానికోసం రెట్టింపు కృషి చేయాలి ,విజయాన్ని సాధించాలి.
ఇవన్నీ చెప్తూ ఆయన క్లాస్ లో మయూరి సినిమాలోని కొన్ని సన్నివేశాలను చూపించారు.
నిజంగా ఒక సామాన్య మనిషి జీవితం మరి కొందరి జీవితంలో స్పూర్తిని నింపడానికి ఉపయోగపడింది అంటే
అంతకంటే ఆ మనిషి జీవితంలో సాధించే విజయం ఇంకేముంటుంది?
మయూరి సినిమా కధ విషయానికి వస్తే ....మయూరికి నాట్యం అంటే చాలా ఇష్టం.ఎప్పటికైనా నాట్యం లో మంచి పేరు సాధించాలన్నది ఆమె ఆశయం.
కానీ ఇంట్లో డాన్సు అచ్చిరాలేదన్న కారణంగా .
.మయూరి పిన్ని నాట్యం నేర్చుకోవటానికి ఇష్టపడకపోవటంతో ,
ఇంట్లో తెలియకుండా ఒక స్నేహితుని సహకారంతో డాన్సు నేర్చుకుని తన కలలు నిజం చేసుకుంటున్న సమయంలో జరిగిన ఒక ప్రమాదంలో తన కాలు కోల్పోతుంది.
జరిగిన ప్రమాదం లో మయూరికి సానుభూతి చూపకపోగా మాటలతో హింసిస్తుంది ఆమె పిన్ని.
తన స్వార్ధం కోసమే మయూరికి నాట్యం నేర్పి, ప్రదర్శనలు ఇప్పించి,ఆమెని పెళ్లి చేసుకుంటానన్న మోహన్
మయూరికి కాలు పోగానే నిన్ను పెళ్లి చేసుకుంటే నాది కూడా అవిటి బతుకేనంటూ అవహేళన చేస్తాడు.
ఈ సంఘటనలతో బాధపడిన మయూరి ఇల్లు వదిలి వెళ్లి,స్నేహితురాలి వద్ద ఉంటూ
జైపూర్ ఫుట్ గురించి తెలుసుకుని, తన బామ్మ సహకారంతో ,
తను సాధించాలనుకున్న నాట్యాన్ని తిరిగి నేర్చుకుని మనిషి తలచుకుంటే ఏది అసాధ్యం కాదు అని నిరూపిస్తుంది.
ఈ సినిమాలో మనుషుల వ్యక్తిత్వాలను చాలా చక్కగా చిత్రీకరించారు...కోరుకున్న గమ్యాన్ని చేరటం కోసం ఆత్మవిశ్వాసంతో కష్టాన్ని అధిగమించిన వ్యక్తిత్వం కలిగిన అమ్మాయి మయూరి.
మయూరి తండ్రి మంచి మనసుతో కూతురిని అర్ధం చేసుకుంటాడు కానీ భార్య,కుటుంబాన్ని కాదనుకోలేని వ్యక్తి.
ఇక మయూరి పిన్ని ఎప్పుడో జరిగిన అనర్ధాలను దృష్టిలో ఉంచుకుని మయూరిని డాన్స్ కి దూరంగా ఉంచాలన్నది ఆమె పట్టుదల.
ఇక సినిమాలో ముఖ్యమైన పాత్ర పోషించింది,నాకు నచ్చే పాత్రలు అని చెప్పదగినవి
మయూరి బామ్మ నిర్మలమ్మ, వాళ్ళింట్లో పని చేసే సత్యం.
మయూరికి కష్ట కాలంలో ఎంతో చేదోడు వాదోడుగా నిలిచి,తనలో ఆత్మస్థైర్యాని నింపి ఆమె విజయానికి బాటలు వేసిన వ్యక్తులు వీళ్ళిద్దరూ.
జీవితంలో విజయం సాధించిన ప్రతి మనిషి వెనుక ఇలాంటి వ్యక్తులు తప్పకుండా వుంటారు.
ఇక సినిమాలో కీలక పాత్ర అని చెప్పదగినది మోహన్ పాత్ర.
స్వార్ధానికి నిలువెత్తు ఉదాహరణ మోహన్
అతను బైక్ మీద వెళ్తున్నప్పుడు కాలినడకన వెళ్ళే వాళ్ళని సరిగా నడవరని విమర్శించడం,
వెంటనే అతను నడిచి వెళ్తున్నప్పుడు బైక్ మీద వెళ్ళే వాళ్ళను విమర్శిస్తూ జనాలకి బొత్తిగా సివిక్ సెన్సు లేకుండా పోయిందండీ అనే సంఘటనలోనే అతని వ్యక్తిత్వాన్ని చాలా చక్కగా చిత్రీకరించారు.
ఇదే స్వార్ధాన్ని మయూరి విషయంలో కూడా చూపించిన మోహన్
అతని వలననే ప్రమాదానికి గురి అయిన మయూరి అసహాయ పరిస్థితిలో వుండి
తనను పెళ్లి చేసుకోమని అడగటానికి వచ్చినప్పుడు ఎంతో అవమానించి మాట్లాడతాడు.
కానీ అతని మాటలు విన్న మయూరి కుంగిపోకుండా, అతని ముందే నేను సాధించగలను అని,
తను అనుకున్న గమ్యాన్ని సాధించి నాట్య మయూరిగా విజయ తీరాలని చేరుకుంటుంది.
మయూరి తిరిగి నర్తకిగా పేరు తెచ్చుకోగానే మోహన్ ఏ మాత్రం పశ్చాత్తాపం లేకుండా మయూరికి మళ్ళీ దగ్గరవ్వాలని ప్రయత్నిస్తాడు,
కానీ మయూరి అతనిని నిరాకరించి తగిన గుణపాఠం చెప్తుంది.
జీవితంలో కష్ట,నష్టాలు అందరికీ వస్తాయి కానీ వాటిని ఎదిరించి పోరాడితేనె విజయం సాధించగలం అని
నిజ జీవితంలో జరిగిన సంఘటన ద్వారా రుజువు చేసిన మయూరి సుధాచంద్రన్ అందరికీ ఆదర్శం.
మనల్ని అవమానించిన వాళ్ళమీద మనం పగ తీర్చుకోవటం అంటే తిరిగి మనం కూడా వాళ్లకి ఏదో ఒక నష్టం కలగచేయటం,వాళ్ళని బాధించటం కాదు.
మనం ఏదైతే సాధించలేమని,చేయలేమని మనల్ని అవమానించారో అది సాధించటం అని నా అభిప్రాయం.
నేను నమ్మే సిద్ధాంతం కూడా అదే..
మా అమ్మమ్మ ఎప్పుడూ చెప్తుండే ఒక మాట, నాకు ఎప్పుడూ గుర్తుండే మాట ...
పట్టు పట్టరాదు
పట్టి విడువరాదు
పట్టి విడుచుటకంటే
పడిచచ్చుటే మేలు
