పరుగాపక పయనించవె తలపుల నావా.. కెరటాలకు తలవంచితె తరగదు త్రోవా.. ఎదిరించిన సుడిగాలిని జయించినావా.. మది కోరిన మధు సీమలు వరించిరావా..

8, మార్చి 2015, ఆదివారం

మహిళ – సమాజంలో ఎలా ఉండాలి - Article in Mana Telugu Times




మహిళా దినోత్సవం సందర్భంగా నేను రాసిన వ్యాసం manatelugutimes లో ప్రచురించారు.అంతమంది రచయితల మధ్యలో నా వ్యాసం చూసుకోవటం చాలా సంతోషంగా ఉంది. 
Thank You So Much Mana Telugu Times Team  
మహిళ – సమాజంలో ఎలా ఉండాలి - http://www.manatelugutimes.com/archives/1037

 "ఆడదే ఆధారం మన కధ  ఆడనే ఆరంభం ఆడదే సంతోషం మనిషికి ఆడదే సంతాపం." ఇది ఒక సినిమా పాట మాత్రమే కాదు అక్షరసత్యం కూడా. పురాణ కాలం నుండి ఇప్పటిదాకా స్త్రీ ప్రధాన పాత్ర పోషించని చరిత్రే లేదంటే  అతిశయోక్తి కాదేమో.మంచి సమాజానికి మూలం మంచి కుటుంబం అయితే  ఆ మంచి కుటుంబానికి మూలం మంచి మహిళ మాత్రమే. తల్లిగా, బిడ్డగా, తోబుట్టువుగా,భార్యగా,స్నేహితురాలిగా ఇలా ఎన్నో రూపాల్లో మగువ లేని ప్రపంచాన్ని ఊహించలేము.

ఒకప్పుడు స్త్రీని వంటింటి కుందేలుగా ఉంచేశారని,మహిళలకి తీరనిఅన్యాయం జరుగుతుందని భావించిన కొందరు అభ్యుదయ భావాలు కలిగిన సంఘ సంస్కర్తలు,మేధావులు ఎన్నో శ్రమలకోర్చి ఒకప్పటి దురాచారాలైన సతీ సహగమనం ,బాల్య వివాహాలు,కన్యాశుల్కం లాంటివి నిర్మూలించి వాటి స్థానంలో వితంతు వివాహాలు,స్త్రీ విద్య లాంటి ఎన్నో మంచి కార్యక్రమాలను ప్రోత్సహించారు,మహిళల రక్షణ కోసం తగిన చట్టాలను చేసి, స్త్రీలకు సముచిత స్థానాన్ని, గౌరవాన్ని కల్పించి ఒక గొప్ప మార్పుకు కారణమయ్యారు.కానీ ప్రస్తుత పరిస్థితులని చూస్తే ప్రతి మార్పు మంచితో పాటు చెడుకు కూడా స్థానం కల్పిస్తుంది అనిపిస్తుంది.

మా అమ్మమ్మ కాలంలో ఆడపిల్లలు పెళ్లి కాగానే,పుట్టింటి వాళ్ళు పెట్టిన పసుపు-కుంకుమ,చీరె- సారే చూసుకుని మురిసిపోయి మెట్టినింటికి వెళ్ళిన తర్వాత కూడా , అటు పుట్టిల్లు,ఇటు మెట్టిల్లు క్షేమంగా ఉండాలని కోరుకునే వాళ్ళమని, పుట్టింటి ఆస్తులను ఆశించే వాళ్ళము కాదని మా అమ్మమ్మ చెప్పేది. కానీ తర్వాత కాలంలో వచ్చిన NTR's women's right on father's property(1985) కుటుంబానికి సంబంధించిన ఆస్తుల విషయంలో ఎన్నో వివాదాలకి కారణమయ్యింది. అప్పటిదాకా ఇచ్చిన కట్నంతో తృప్తి పడే ఆడపిల్లలు అటు అత్తింటి వాళ్ళ ఒత్తిడివల్ల కానీ,వాళ్ళ ఇష్టపూర్వకంగా కానీ ఆస్తుల కోసం పుట్టింటి గడపను వదిలి కోర్టుల  గడపను తొక్కుతున్నారు.ఈ మధ్యకాలంలో ఈ పరిస్థితి మరీ ఎక్కువయ్యింది.రియల్ ఎస్టేట్ పుణ్యమా అని ఊహించని రీతిలో ధరలు పెరిగిన భూముల కోసం తల్లిదండ్రుల మీద, తోడబుట్టిన సోదరుల మీద partition suit (విభజన దావా) కోసం  కోర్టులకి వస్తున్న ఆడవాళ్ళని చూస్తే ఆశ్చర్యం అనిపిస్తుంది.ఆశ  ఉండొచ్చు కానీ అది దురాశ కాకూడదు కదా.. !

"సేవలతో అత్తమామ సంతసించగా పదిమందిని ఆదరించు కల్పవల్లిగా" మహిళ ఉండాలని, ఆమే ఆదర్శ మహిళ  అని ఒకప్పటి అభిప్రాయం కానీ ప్రస్తుతం పదిమందిని ఆదరించటమేమో కానీ ఇప్పుడు కుటుంబమంటే  భార్యా,భర్త,వాళ్ళ పిల్లలే.ఒకవేళ ఎవరైనా ఉమ్మడి కుటుంబంలో ఉన్నారు అంటే..  ఎంత కలిసి ఉన్నా మనసుల్లో  ఎన్నో బేధభావాలు తప్పకుండా ఉంటాయి.దేవత సినిమాలో సావిత్రిలాగా మాకు సేవలు చేయకపోయినా పర్లేదు కానీ మా మీద ఏ 498 (a )కేసో పెట్టకపోతే చాల్లే అనుకునే తల్లిదండ్రులు,అక్కచెల్లెళ్ళు,అన్నదమ్ములు ఉన్నారని చెప్పటంలో ఎలాంటి సందేహం లేదు.కేవలం ఇలాంటి కేసులకి భయపడి,దూరంగా ఉంటేనే మంచిదనుకుని గత్యంతరం లేక కన్నకొడుకుని,తోబుట్టువుల్ని వదులుకుని ఎవరికీ వారే అన్నట్లు ఒంటరిగా ఉంటున్న కుటుంబాలు  ఎన్నో..

కుటుంబ హింసకి సంబంధించి నిజంగా హింసకి గురయిన ఆడవాళ్ళు చట్టాన్ని ఆశ్రయిస్తే మంచిదే కానీ, కేవలం భర్తని బెదిరించి లొంగదీసు కోవటానికి,అతని కుటుంబ సభ్యుల మీద కక్ష తీర్చుకోవటానికి మాత్రమే చట్టాలను ఆయుధాలుగా ప్రయోగిస్తున్న స్త్రీల పుణ్యమా అని నిజంగా బాధపడుతున్న వాళ్లకి కూడా ఇబ్బందులు కలుగుతున్నాయి. పంతాలు,పట్టింపుల కోసం పిల్లల్ని కూడా బలి చేయటానికి వెనుకాడని, మాత్రుత్వానికే మచ్చ తెచ్చే ఇలాంటి వాళ్ళ వలన 498 a ipc కేసులు పెట్టే వాళ్ళందరూ ఇలాగే  తప్పుడు కేసులు పెడుతున్నారనే అపోహ కలుగుతుంది.తద్వారా నిజమైన బాధితులను కూడా న్యాయవ్యవస్థ అనుమానాస్పద దృష్టితో చూడాల్సి వస్తుంది.

ఇంక అత్యాచారాలు,ప్రేమోన్మాదాలకి నేటి సమాజంలో కొదవే లేదు.ఎదుటివారి ప్రేమ,స్నేహం లో ఎంత నిజాయితీ ఉంది అనేది తెలుసుకోవాల్సిన వివేకం ప్రతి మహిళకీ అవసరం.తమ ప్రేమ నిజమైనంత మాత్రాన ఎదుటి వాళ్ళు కూడా అంటే నిజాయితీగా ఉంటారనే నియమమేమీ లేదు కదా..ఒకప్పుడు అబ్బాయిలు అమ్మాయిల్ని మోసం చేసేవాళ్ళు.కానీ ఇప్పుడు అబ్బాయిల్ని మోసం చేసే అమ్మాయిలు కూడా ఉంటున్నారనేది నిర్వివాదాంశం.అలాగే  పరిస్థితులు ఏవైనా సరే .. పెళ్ళయ్యి, పిల్లలు ఉన్న మహిళలు కూడా ప్రేమికుడితో కలిసి ఎటో  వెళ్ళిపోతున్న కేసులు ప్రస్తుత కాలంలో నమోదు కావటం మరొక విచారించాల్సిన విషయం. మనము  ఎంత జాగ్రత్తగా ఉన్నా ఎదుటివాళ్ళ వలన ప్రమాదం రాదని నమ్మలేని ఈ రోజుల్లో "తెలుసుకొనవె యువతీ అలా నడుచుకోనవే యువతీ" అని చెప్పే పెద్దల మాటల్ని వినటంలో తప్పులేదు కదా..!

అసూయ ముందు పుట్టి ఆడవాళ్ళు తర్వాత పుట్టారు అంటారు కదా.. అది కూడా నిజమే "తోటి ఆడవాళ్ళ మీద ఆడవాళ్ళకి ఉండే అసూయ" గురించి చెప్పనలవి కాదేమో.స్నేహశీలిగా,అందరితో కలుపుగోలుగా ఆప్యాయంగా ఉండే మహిళలు ఉన్నట్లే  ఎవరి ముందు వాళ్లకి తగిన మాటలు మాట్లాడుతూ,ఒకరి గురించి ఇంకొకరి దగ్గర అవాకులు,చవాకులు మాట్లాడి,ఎవరి మీదైనా కోపం వచ్చిందా వాళ్ళని ఎంత ఇబ్బందులకైనా గురి చేయగల చుప్పనాతి శూర్పణఖలు కూడా ఉంటారు.ఇద్దరు ఆడవాళ్ళు ఒకచోట కలిస్తే మగవాళ్ళ గురించి మాట్లాడతారో,లేదో తెలియదు కానీ మరొక స్త్రీ గురించి మాత్రం ఖచ్చితంగా మాట్లాడుకుంటారనేది జగద్విదితమే.. ఒకప్పుడు ఇవి ఇంటి అరుగుల దగ్గర,నీళ్ళ పంపుల దగ్గర జరిగితే, ఇప్పుడు విద్యాధికులైన మహిళలు సంచరించే నెట్ ప్రపంచం లో కూడా ఇలాంటి రాజకీయాలు జరుగుతున్నాయట. ఒక మగవాడి వలన కూడా జరగనంత కీడు ఇలాంటి మహిళల వల్ల  మరో  మహిళకి జరగటం బాధాకరమైన విషయం.

ఎన్నో రంగాల్లో తనకంటూ ఒక గొప్ప స్థానాన్ని సాధించి,ఎంతో మందికి ఆదర్శంగా నిలిచిన మహిళలున్న మన ప్రపంచంలో కేవలం క్షణికమైన కోపావేశాలు,స్వార్ధం,ఈర్ష్యా ,ద్వేషం,అసూయల మూలంగా సృష్టికి కారణ భూతమైన మహిళ ఆ సృష్టినే నాశనం చేసే ఒక భయానక భూతంగా కూడా మారిపోతుంది.సృష్టిలోని ఏ జీవి  కూడా తన సహజ లక్షణాలను వదులుకోదు.అటువంటిది ప్రేమ,దయ,జాలి,ఆప్యాయత,అనురాగం,క్షమ,సహనం ఇలా ఎన్నో మంచి గుణాలకి నెలవుగా, భగవంతుడు తనకు మారుగా సృష్టించిన స్త్రీ మాత్రం తన సహజ లక్షణాలను కోల్పోయి సమాజంలో ఎన్నో అనిశ్చిత పరిస్థితులకి దారితీసేలా ప్రవర్తిస్తుంది.

తప్పుని ఖండించాలి,చెడుని శిక్షించాలి  అలాగే అది తప్పా,ఒప్పా అన్న విచక్షణా జ్ఞానాన్ని కూడా తప్పకుండా కలిగి ఉండాలి.మంచి కోసం వచ్చిన మార్పుని మంచి కోసమే ఉపయోగించాలి.మహిళలమైన మన ద్వారా మరొక మహిళకి అన్యాయం జరిగేలా  ప్రవర్తించకూడదు..అప్పుడే ప్రతి మహిళా ఆదర్శ మహిళ అవుతుంది.మంచి అమ్మ  ద్వారా మంచి పిల్లలు,మంచి పిల్లలతో మంచి కుటుంబం,మంచి కుటుంబాలతో మంచి సమాజం తయారవుతుంది ,ఎందరో మహానుభావులు మహిళల కోసం చేసిన త్యాగాలకి ఒక అర్ధం,పరమార్ధం ఏర్పడుతుంది.

మహిళా దినోత్సవం సందర్భంగా మహిళలని కించపరచటానికి ఈ వ్యాసం  రాయలేదు.అందరు ఆడవాళ్ళు ఇలాగే ఉన్నారని నా అభిప్రాయం కాదు.ప్రస్తుతం జరుగున్న కొన్ని విషయాలను దృష్టిలో ఉంచుకుని మాత్రమే నా ఆలోచనలను  ఇలా  పంచుకుంటున్నాను..

ప్రేమకు, సహనానికి మరో రూపమైన ఎందరో మహిళామణులు
అందరికీ మహిళా దినోత్సవ శుభాకాంక్షలు 


Related Posts Plugin for WordPress, Blogger...