ఆషాడమాసం...

జీవితం ఎప్పుడూ రొటీన్ గా వుంటే ఏమి బాగుంటుంది.
ఎప్పుడూ ఏదో ఒక విశేషం వున్న జీవితం నిత్య నూతనంగా వుంటుంది.
కాడ్బరీస్ చాక్లెట్ యాడ్ లాగా తియ్యని వేడుక చేసుకోవటానికి ఏదో ఒక మంచి అవకాశం కోసం ఎదురుచూడాలి
అందిన అవకాశాన్ని ఆనందంగా ఎంజాయ్ చేయాలి ఇది నా అభిప్రాయం.

ఇంతకీ ఇప్పుడిదంతా ఎందుకు చెబుతున్నానంటే ఇది ఆషాడమాసం కదా
సంవత్సరంలో కొన్ని నెలల లాగా ఎలాంటి విశేషం లేకుండా ఉండకుండా
కొన్నిచిన్న చిన్న సరదాలు తెచ్చే ఆషాడమాసం అంటే నాకు చాలా ఇష్టం.

ఆషాడమాసం లో కొత్తగా పెళ్లి అయిన భార్య భర్తలు కలిసి వుండకూడదు.అత్తా,కోడలు ఒకే గడప దాటి నడవకూడదు ఇది ఆషాడం లో ముఖ్యమైన నియమం.
ఇది మన పెద్దలు ఎందుకు పెట్టారో తెలియదు కానీ తర్వాత కాలంలో దీనికి "సైంటిఫిక్ రీజన్స్" కనిపెట్టేసారు.

గోరింటాకు

ఆషాడం లో ఆరుసార్లు గోరింటాకు పెట్టుకోవాలన్నది నాకు చాలా చాలా నచ్చే సరదా...
గోరింటాకు అంటే గోరింటాకే పెట్టుకోవాలి లేకపోతే మానేయాలి ఇది నా నిర్ణయం.

మా చెల్లి కోన్ తో మంచి డిజైన్లు పెడుతుంది కానీ నాకు అస్సలు ఇష్టముండేది కాదు కోన్ తో మెహంది పెట్టుకోవటం.
అయితే గోరింటాకు ఎప్పుడు దొరకదు కదా అందుకని ఆషాడం లో ఇంటిదగ్గరకి అమ్మడానికి వచ్చే గోరింటాకు కోసం ఎదురు చూసి కొనుక్కుని పెట్టుకుంటే ఆ ఎర్రగా పండిన గోరింటాకు చేతుల అందం,చేతులకి ఆ గోరింటాకు వాసనా ఎంత బాగుంటుందో...

ఈ సంవత్సరం మాత్రం నా గోరింటాకు సరదా తీరిపోయింది.
మేము ఇప్పుడుండేది రూరల్ ఏరియా కావటంతో మా పనిమనిషి పని కట్టుకొని మరీ
నాకు గోరింటాకు తెచ్చి పెడుతుంది. ఒక్క ఈ నెలలోనే కాదు నాకు ఎప్పుడు కావాలంటే అప్పుడు.

ఆషాడంలో వచ్చే మరో సంబరం బోనాలు.

ఆషాడం లో మహంకాళి భక్తులు అమ్మవారికి భక్తి శ్రద్ధలతో సమర్పించే నైవేద్యమే ఈ బోనాలు.
ఈ పండుగ ఎక్కువగా హైదరాబాద్,తెలంగాణా,ప్రాంతాలో చేస్తుంటారు.
పండుగ రోజున స్త్రీలు పట్టుచీరలు,నగలతో, తలమీద బోనాల కుండతో అమ్మవారి స్వరూపాల్లాగా వుంటారు.

మా చిన్నప్పటినుండి మా అమ్మ అమ్మవారి పూజ చేసేది కాబట్టి
మా వూరికి దగ్గరలో వున్న నిదానంపాడు అమ్మవారి గుడిలో బోనాలు సమర్పించటం
మాకు ఎప్పటినుండో వస్తున్నఆచారం.
హైదరాబాద్ లో జరిగే బోనాలు లాగానే వుంటుంది ఇక్కడి బోనాల పండగ కూడా.

ఆషాడం డిస్కౌంట్ సేల్...

ఆషాడంలో మా కుటుంబం అందరికీ నచ్చే అతి పెద్ద సరదా ఆషాడం ఆఫర్లలో బట్టల షాపింగ్ చేయడం.
అంటే మిగతా రోజుల్లో బట్టలు కొనము అని కాదు ..
ఎవరు ఏమనుకున్నా కానీ... డిస్కౌంట్ లో షాపింగ్ చెయ్యటం చాలా సరదాగా వుంటుంది.

హైదరాబాద్ చైతన్యపురి సాయిబాబా గుడి దగ్గరినుండి మొదలవుతుంది మా షాపింగ్
ఈ నెలలో సాయంత్రాలు షాపింగ్ కి ఆ ప్రాంతానికి వెళితే చాలు కళ కళలాడుతూ విద్యుత్ దీపాల వెలుగులతో, రకరకాల ఆఫర్లతో సరికొత్త షాపింగ్ ప్రపంచం మనకు స్వాగతం పలుకుతుంటే మనల్ని మనం నిగ్రహించుకోగలమా షాపింగ్ చేయకుండా...

ఇవీ ప్రతి సంవత్సరం ఆషాడంలో నా చిన్నిప్రపంచంలో మా సరదాలు...
ప్రస్తుతానికి ఆషాడంని ఎంజాయ్ చేస్తూ రాబోయే శ్రావణమాసం శుభప్రదంగా వుండాలని కోరుకుంటూ ....

రాజి